Ewe Fansoun Mettoch Meinisin Repwe Sofosefan

Ewe wesewesen mwichen ewe Mwichefenin Jises Kraist ren Aramas mi Pin non Fansoun Soponon ewe amuchunon me nein kewe sokkun manaman sia kuna. Ewe aewin me non kewe manaman sia kuna a fis 10 ier me mwan me non upstate New York.

Non ewe spring non 1820, emon kukkun at itan Joseph Smith a feino nein ekkewe ira unukun imwan we epwe iotek. A wor an kapas eis usun manauen ngunun, me a fokkun mochen “epwe sinei menni me nein ekkewe [mwichefen] mi pung, pwe [epwe] sinei an epwe fiti.” Joseph a nuku pwe Kot epwe ponuweni an iotek me emweni i.

Kose mochen kopwe sinei pwe Joseph ese chok iotek an epwe sinei met mi pung. Nge, a iotek an epwe sinei met mi pung pwe epwe fori met mi pung. Joseph a tingor non nuku me a mochen epwe fori anongonong won ponuwen an we iotek.

“Non [ponuwan] ren an [ennetin] iotek, Kot ewe Sam me Noun we, Jises Kraist, ra pwato ren Joseph me poputani ewe fansoun ‘mettoch meinisin repwe sofo sefan’ (Foffor 3:21) usun mi osini me non ewe Paipel. Non ei nemasepwi, a kaeo pwe mwirin manon ekkewe Aposel akom, An Kraist we Mwichefen non ewe Testamen Sofo a poutuno seni fonufan.” Joseph Smith a fokkun ainisoch ne eniwinsefanieto ewe nongonong, ewe mumuta, me ewe pwon me angangepin ren an ewe Chon Amanau we Mwichefen me nom.

Joseph a pwarata: “Ua kuna ruemon Aramas, ukukun ninger use tongeni awewei, nge ra chok ukuta asetai non asepwan. Emon me neir a fos ngeniei, a kokkoriei ren itei, a itini ngeni ewe emon me a apasa—Iei nei we At mi Achengicheng. Ausening ngeni!”

Seni ei nemasepwi me kewe sokkun manaman mi fis, Joseph Smith a weweochuti pwe Kot me Jises Kraist ir mi fokkun sinei i, a fokkun ekieki usun an manau ese much, me a wor ar misiin epwe wisen fori. A pwan kaeo kewe auchean nesen usun ekkewe wis, napanap, me unusoch usun ewe Mokuren Kot—me ewe Sam me ewe Nau ra imufesen non Ununur. Jises Kraist i ewe Noun Kot non ngun me non futuk.

Joseph Smith a pwarata pwe Samach won Nang me Jises Kraist ir wesewesen aramas. A apasa, “Ewe Sam mi wor inisin ren futuk, me chuu a usun chok emon mwan; pwan Noun we; nge ewe Ngun mi Fel ese wor inisin ren futuk me chuu, nge a emon Ngun.”

Ua pwarata ewe pwaton ewe Sam me Noun we ngeni Joseph Smith a fokkun auchea me non ewe amwararen “niwinsefaniton mettoch meinisin minne ekkewe soufos mi pin ra kapas usun seni nepoputan fonufan.”

Ewe oruwan non ewe kinikinin ekkewe amwararen manaman mi fis minne ra efisata tettenin an ewe Chon Amanau we mwichefel mi niwinsefan ina ewe chiakun me feiton ewe Puken Mormon.

“Aua sopweno ne pwarata pwe Joseph Smith a angei ewe niffang me manamanen Kot an epwe chiakuni ew uruon nom: ewe Puken Mormon— Pwan ew Kapasen Pwarata usun Jises Kraist. … Ei puk mi pin mi pachenong ew uruon pwisin an Jises Kraist angang nein aramas non ewe Esopun Fonufan mwirin chok An Manausefanita. [Ewe Puken Mormon] a aitikich usun popun manau me awewei ewe nongonongen Kraist, ewe ionapen ena popun. Ren ew chiechien pukefel ngeni ewe Paipel, ewe Puken Mormon a pwarata pwe aramas meinisin ir at me nengin noun Samach mi tong won Nang, pwe mi wor An kokkot mi pin fan iten manauach, me Noun we, Jises Kraist, a kapas ikenai usun pwan non ranin nom.”

Ren chochon an ewe Chon Amanau we Mwichefel mi niwinsefanito, “Sia nuku ewe Paipen pwe ina ewe kapasen Kot ika pwe ewe awewen mei pung; sia pwan nuku ewe Puken Mormon pwe kapasen Kot” Ewe Puken Mormon pwan eu kapasen pwarata usun Jises Kraist, a apungano ewe ennet ren ewe Paipel, me eniwinato fatochun me auchean ennet mi turuno seni ewe Paipel.

Ewe Mwichefenin Jises Kraist ren Aramas mi Pin non Fansoun Soponon a asukuna pwe ewe wesewesen Mwichefen a kouta seni ewe Chon Amanau, ren pusin an mumuta, annuk, me pwon i pin me angangepin, a turuno seni ei fonufan. Pwan masowen ewe osini ren niwisefaniton mettoch meinisin non ewe fansoun soponon, soufos me nom me pusin aposel ra ngeni Joseph ewe mumutan pristut me ngeni i ekkewe ki. Iei ewe ounungatin non ewe kinikinin ekkewe amwararen manaman mi fis minne ra efisata tettenin an an ewe Chon Amanau we mwichefel mi niwinsefanito.

Mumutan ewe Pristut a mut ngeni noun Kot kewe chon angang repwe “tupuni [I] me angang non Itan.” “Kien pristut ikkena kewe mumuta en epwe tufichin anganga ewe pristut fan iten noun Kot kewe semirit.”

Fan emwenien ewe Sam me ewe Nau, John ewe Sou Papatais mi manausefan a eniwinato, non 1829, ewe mumutan papatais ren mono fan konik ren omusomusen tipis. Non ena chok ier, unumon me nein ekkewe akkomwen Engon me Ruemon Aposel—Peter, James, me John—ra eniwinato ewe wisen aposel me pwan mumutan pristut me kii.

Onu ier mwirin ewe wesewesen mwichen ewe Mwichefen, non ewe Tempel Kirtland, Moses, Elias, and Elijah ra annuku ngeni Joseph ewe pwan eu mumuta a auchea ngeni an epwe awesi an Kot angang non ewe fansoun soponon.

Moses a wato ekkewe kien ewe ionfengenin Israel.

Elias a wato ewe kinikinin kapas allimen Abraham, pachenong ewe niwisefaniton ewe pwon mi pin An Abraham.

Elijah a wato ekkewe kien ewe manamanen riri fengen, awora ewe mumuta minne a otufichi angangen angangepin won fonufan an epwe riri tori fansoun ese much, ren ochufengeni famini non fansoun ese much mano esap eimunir.

Nupwen Joseph Smith a chiakuni ewe Puken Mormon, a angei pwarata mi affata pwe ewe Mwichefenin Jises Kraist epwe forsefan. Nge ewe Samon a aiti ngeni Joseph pwe esap mwitir ne aueta An we Mwichefen. Nge, “seni ewe ngunun osini me pwarata” ewe Samon a pwari ngeni Joseph “ewe fansoun … [i] epwe poputa ne ousefanieta An we Mwichefen [sefan] won ei fonufan.”

Ewe Mwichefen a kouta non wesewesen tetetnochun mwirin chok ewe niwinsefaniton ewe pristut me katoun ewe Puken Mormon. Ewe aewin kapin ewe Puken Mormon a kawor non March 26,, 1830, me ewe Mwichefen a foruta non April 6.

“Ewe Mwichefenin Jises Kraist ren Aramas mi Pin non Fansoun Soponon … ina an Kraist we Mwichefen non ewe fansoun ewe Testamen Sofo a niwisefanito. Ei Mwichefen mi fost non unusochun manauen foun nongonongun we, Jises Kraist, me non An Achasefan esemuch me wesewesen Manausefan. Jises Kraist a pwan kori sefani Aposel me ngenir mumutan pristut. A tingorei kich meinisin sipwe feito Ren me An Mwichefen, ach sipwe angei ewe Ngun mi Fel, ekkewe angangepinin manau ese much, me angei pwapwa esemuch.”

Ewe pwaton ewe Sam me Noun we ngeni Joseph Smith, ewe chiaku me feiton ewe Puken Mormon, me ewe niwisefaniton ewe mumutan pristut me kewe kii a auchea ngeni ewe mwichen an ewe Samon we mwichefen mi niwinsefanito 195 ier ano ikenai.

Non ewe Testamenin Nomw, ewe soufos Daniel a awewei eu tan usun efou fau epwe fanafaneu seni eu chuk nge ese wor e atapa me epwe aurano unusen fonufan. Eu ier mwirin forutan ewe Mwichefen, ewe Samon a aiti ngeni Joseph Smith pwe ekkewe kien ewe muun Kot repwe pwan niwinsefanito “wato ngeni aramas won fonufan” me ewe kapas allimen [Jises Kraist epwe] soposopono tori nesoponon fonufan, usun ewe fau a turu seni eu chuk nge ese wor e atapa.”

Ua pwarata: Ewe Samon a apwonueta An pwon. An ewe Chon Amanau we Mwichefen mi niwinsefanito a foruta non unusen fonufan me non ewe angang seni minne an Kot “ochufengeni meinisn mettoch non eu non Kraist, me ruepek non nang, me non fonufan; usun non i.”

An ewe Samon angang non fansoun soponon “a eu popun a amwasanga noun Kot aramas non sokkun ier meinisin; achok eu ekiek ren ekkewe soufos, pris me king ra ingeno ren met mi sokono; ra neno mwer ren pwapwa ne soposopono tori ewe ran minne sia manau; me ren pochokunen pwapwan nang ra konu me makkei me osini usun ach fansoun.”

Non ei waten me saingonon meinisin kinikin fansoun kapas allim, “eu unusan me wesinon me unusochun chufengen, me kochufengenin kewe kinikinin fansoun, me ki, me manaman, me ning repwe fis, me repwe pwato seni ewe fansoun Adam pwan tori ikenai. Me esap chok ei, nge ekkewe mettoch minne ese mwo pwato seni nepoputan fonufan … repwe pwato … non ei, ewe kinikinin fansoun ren ewe unusen fansoun.”

Ewe Soufos Joseph a sopweno ne awewei, “Meinisin kewe angangepin me wis minne a namot seni ewe Pristut, fan emwenien me annuk seni ewe mi Tekia non menni nein ekkewe kinikinin fansounin, meinisin epwe wor non ewe saingonon kinikinin fansoun, … oponuwetan ewe niwinsefanito minne ra kapas usun meinisin ekkewe Soufos mi Pin.”

Ua sossot ne chechemeni eu mecheresin nios ren aucehan me amwararen “ochun porous” emon aramas ekis me ekis non fonufan a tongeni epwe angei—ewe porous minne ewe Samon Jises Kraist a eniwinsefanieto An kapas allim me Mwichefen non ewe fansoun soponon.

Ua etiwa meinisin repwe kaeo usun me apungano ei porous. Ua pwon pwe emon me emon “ekkewe repwe kaeo porousen ewe Niwinsefanito me angang fiti nuku repwe feioch [seni manamanen ewe Ngun mi Fel] ne angei ar pwisin sinei usun auchean me popun pwe epwe ammonatan ewe fonufan ren ewe Aruen Wareto an ach ewe Samon me Chon Amanau, Jises Kraist.” Nupwen kopwe ennetin iotek ren ekkewe ru ekiek om kopwe angei me fori ren ponuwan seni Kot, usun ewe anuon Joseph Smith, om tufichin esina me weweiti usun auchean epwe fokkun napono.

Ua pwarata pwe Kot, ewe Sam Ese Much, I Samach. Ua pwarata me nuku pwe Jises Kraist i ewe Noun ewe Sam mi Achengicheng me I Anaemon non futuk. I ach Chon Amanau me Chon Angaseno.

Me ua pwapwa ne pwarata pwe ewe Sam me ewe Nau ra pwa ngeni ewe at Joseph Smith, minne a poputani ewe Niwinsefaniton an ewe Chon Amanau kapas allim non ewe fansoun soponon. Ewe Puken Mormon pwan eu kapasen pwarata usun Jises Kraist me a anomu ewe kapasen Kot. Mumutan pristut ne tupuni ewe Chon Amanau me foffor non Itan a niwisefanito won fonufan. Me Ewe Mwichefenin Jises Kraist ren Aramas mi Pin non Fansoun Soponon, iei An Kraist we Mwichefen non ewe Testamen Sofo mi niwinsefan. Ua pwarata ai ennetin pwarata pwe ekkei mettoch meinisin mi ennet non iten ewe Samon Jises Kraist mi pin, amen.