“Ren Ei Meinisin Repwe Sinei Pwe Ami Nei Chon Kaeo“
Ach tongei Kot me Noun semirit a ew pochokunen kapasen pwarata ngeni fonufan pwe iei ewe ennetin Mwichefen an ewe Chon Amanau.
Chommong ier a no am me Sister Uchdort aua sai non erun Germany. Me mwen chok Easter, me aua korato emon chienem mi och, esap emon chon ewe Mwichefen, an epwe fitikem non angangen fen ngeni Kot non Raninifen. Am aua tongei chiechiem ei achengicheng, a chok mecheres me fetanoch am aporousa ngeni ifa ussun am mefi ussun ewe Chon Amanau me An Mwichefen me tingorei an epwe feito me kuna! A etiwa ewe tingor me fitikem ren ekkewe mwichen ew pranch mi kaneto.
Ika ka fen wato emon chienom ngeni fan ren ewe aewin fansoun, ka tongeni weweiti ena napanapen memef ua mefi non ena sosoren Raninifen. Ua mochen mettoch meinisin repwe unusoch. Chienem ewe emon mi watte an sukunen pekin souneng. Ua unusen epinukunuk pwe ekkewe mwichen ei pranch repwe fori ew murinon napanapoch ngeni me angangoch ne pwarano ewe Mwichefen.
Ewe pranch ra chufengen non ekkewe rum ra rentini won ewe oruen sasarin ewe sitowa. Ren am aupwe tori ikana, aua tota won kewe nato nukunupen ewe imw, pasini ewe pochokunen popon seni ekkewe mettoch ra isois ikena.
Nupwen ewe mwichen sakramen a poputa, ua ekieki chienei ewe an a keran iei aewin fansoun an epwe fiti, me use tongeni upwe kouno ne eteneki ekkewe mettoch a fori ai upwe ekis nunur. Ren awewe, ewe kon, ese wesewesen ngingin ewe Mwichen Kon Tabernacle Choir. Onokin, okurangen semirit sa tongeni rong atun ewe sakramen. Ekkewe chon afanafan ra achocho ngeni ar tongeni, nge rese rese nipwakoch ne afanafan nein aramas. Ua momot non ai use kinamwe unusen ewe mwich, anean pwe meni Sunday School epwe murinno.
Ese pwan.
Unusen ewe soran uwa oureki ussun met chienem ewe epwene ekieki ren ei fan am aua uweato ngeni.
Mwirin, nupwen aua niwiniti neimw, uwa kun ai upwe porous ngeni chienem ewe. Ua mochen upwe awewei pwe ei ew chok kukkun pranch me ese kon pwarano ewe Mwichefen ren unusan. Nge me mwen upwe apasa ew kapas, a foseta.
“A men murinno,” a apasa.
Use chiwen mwenin kapas.
I a sopweno, “Ua fokkun ingeiti ussun murinon nikinikin kewe aramas fengen non om fan. Ussun ir meinisin ra sokofesen nonomur, nge mi fat ren ennetin pwe ra tongefengenir. Iei met uwa ekieki pwe Kraist a mochen An Mwichefen epwe iei ussun.“
Iwe, uwa mwitir aier ren napanapen ai apungur. Ua mochen kewe mwich repwe unusoch ar repwe einga chienei we. Nge met ewe kewe memper ra pwarano ew netip-unus ren ngunun tong, kirekiroch, nikitu, me tipetong.
Ena Nuku Epwe Napeno non Fonufan
Achengicheng pwi me fefinei, achengicheng chienei, Ua tongei Ewe Mwichefenin Jises Kraist ren Aramas mi Pin non Fansoun Soponon. Iei An ewe Chon Amanau Mwichefen mi ennet me manau, me a aitikich ewe unusochun ewe kapas allim mi niwinsefanito an Jises Kraist. An manamanen mumutan pristut a nom ikei. Jises Kraist a pwisin emweni ei Mwichefen, seni chon angang I a kokorir me mutata, me ren emon soufos mi manau, pwan mwo Preseten Russell M. Nelson. Ewe Chon Amanau a fen ngeni ekkewe Souneng non Fansoun Soponon ew auchean misin ar repwe ioni fengeni noun Kot semirit me amonata ewe fonufan ren ewe Oruen Wareto an ewe Chon Amanau. Ua pwarata pwe meinisin ekkei mi pung.
Nge auchean ach sipwe chechemeni pwe nupwen chommong aramas ra sinei ewe Mwichefenin Jises Kraist ren ewe aewin fansoun, rese ekieki ussun mumutan pristut ika ekkewe angangepin ika ewe kochufengenin Israel. Met repwe eteneki, pwan meinisin, ifa ussun repwe mefi nupwen ra nom rech me ifa ussun ach eteneki fengenikich.
“Tong fengen,” Jises a apasa. “Ren ei meinisin repwe sinei pwe ami Nei chon kaeo.” Fan chommong, an emon aewin kapasen pwarata ussun Jises Kraist a feitto nupwen neminewe ika atewe a mefi tong nein chon kaeo noun Jises Kraist.
Ewe Chon Amanau a affata pwe I a eniwinato An Mwichefen pwe “ena nuku … epwe napeno won fonufan.” Ina minne, nupwen aramas ra churi ach mwichen Mwichefen, ewe Chon Amanau a mochen ir repwe feinno fiti pochokunen nuku non I! Ewe tong chienach kewe ra mefi me neich epwe seikireta arapakan ngeni Jises Kraist! Ina ach we mecheresin kokkot iteiten sia chufengen.
Ese nifinifin ion a kukkuta watten nuku non Kraist ika ew nefin mi arap ngeni Samach won Nang epwe mefi kinamwe non imw non Ewe Mwichefenin Jises Kraist ren Aramas mi Pin non Fansoun Soponon. Korireto ngeni ach kewe mwich a chok ussun pukupukun ach korireto non imwach kewe.
Ewe Unusochun me ewe Wesewesan!
Iei, ua eteneki pwe ua awewei ewe unusochun. Me non ei manau iei, sise kon sinei ewe unusochun. Me “tori ewe murinon ran,” iteitan epwe wor ew nefin nefinen ewe unusochun me wesewesan. Iwe, met sipwe fori nupwen ewe Mwichefen ese nikinikin ewe murinon ran? Nupwen, ren met chok popun, ach wart ese mo foneni wesewesen nuku me tong? Ika inet a mefi pwe sise masenong non?
Och mettoch sisap fori ina sisap fangeta won ewe unusoch!
Ewe itenapen peich ren ewe Puken Mormon a apachanong ei auchean ourour: “Ika mi wor nipwakingaw,” a apasa, “ir ekkewe mwan an aramas, ina minne, ousap esita ekkewe mettchun Kot.”
Met ew puk—ika ew mwichefen ika emon aramas—a wor an “tipis” me “muan” me epwe chiwen angangen Kot?
Ai ponuen ei kapas eis mi osomongun ewer!
Iwe, nupwen sia onomu inisich ngeni tekian nonnomun ewe Samon sipwene pwan nikitu fengen. Kich mi chiwen mamarita, me kich meinisin sia anongonong won ewe Chon Amanau ren met sia fori mi fis angangan. Mei pung ren emon me emon kich, me mi pung ren ewe muun Kot won fonufan.
Ewe Samon a korikicheto esap chok ach sipwe choni An ewe Muu nge sipwe pwan achocho ne pachenong non an we koutan. Kot a kuna ewe mwichen aramas a “ew chok ar ekiek me ew netip.” Me ren ach sipwe ew netip, mi auchea sipwe kutta nimenimochun, netip, me a auchea epwe wor ew watten siwinin netip.
Nge ena esap wewen siwini netipei an epwe wenewen ngeni netipom. Esap pwan wewen siwini netipom an epwe wenewen ngeni netipei. Wewen pwe kich meinisin sipwe siwini netipach ach sipwe wenewen ngeni ewe Samon.
Ika sise mo nom ikana, chechemeni: ren an ewe Samon aninis, ese wor och mettoch esap tufich.
Masenong me Choni
Me ika ka mefi ussun pwe kose kon masenong, kose mochen kopwe sinei pwe kose anamon. Sise mo fen pin nom non nonnomun ei manau nupwen sia mefi ussun sise sisinei emon non ewe rum? Ua fen kukuna ei nap seni fan ew. Nupwen ua 11 ier, ra oumwesi ai we famini repwe tou seni imwem ewe me mokut ngeni ew neni am ause sisinei. Meinisin mettoch ra sokono seni met ngang mi oruni. Me ai ngingin fos a affata ngeni ekkewe ekkoch semirit pwe ngang ua sokono seni met ra oruni. Non ew fansoun nupwen ua wesewesen mochen upwe pachenong non ew chiechi, ua mefi ai tipitipingaw me koturungaw.
Ikei won fonufan, napengeni ekkewe sokofesen sia eteneki—ekkewe sokofesenin ekkoch me neich sia aea ne enenia ekkoch—ren mettochun fonufan: napanapen inis, ir chon ia, kapas, ussun ar ufouf, oruni, pwan ekkoch. Nge “Kot ese nenengeni kewe mettoch ussun met aramas ra fori. Aramas ra nenengeni napanapen nukun inisir, nge ewe Samon a nenengeni ewe netip.”
Seni An nenengeni me weweiti, mi wor ew kinikinin tetenin aramas a feitto mwen meinisin ekkoch: noun Kot semirit. Me sia masenong non ei ew.
Pusin ina nonomuch ach sipwe mochen nom nein aramas ekkewe ra nenengeni, kapas, mokutukut, me ekiek ussun kich sia fori. Mi wor neni fan iten ena.
Nge non an ewe Chon Amanau we Mwichefen, sia chufengen meinisin noun Kot semirit ekkewe ra mochen repwe chufengen me kutta ewe ennet. Esap nikinikin inis, non pekin poletiks, oruni, ika ach mwichen aramas ra aea fengen mettoch meinisin. Esap ren nonnofengenin nonnomuch ewe a ochu fengeni kich. Pwe ach ewe popun, ach tong ngeni Kot me tong ngeni chon oruch, neniach kewe ngeni Jises Kraist me An kapas allim mi niwinsefanito. Kich “ew non Kraist.”
Ewe chufengen sia kukkuta esap ren an meinisin repwe uta non chok ew neni; epwe ren an meinisin repwe sapeno non ew chok an—ngeni Jises Kraist. Kich ew esap pokiten ian ewe sia fen nom ie nge ian sia achocho ngeni ach sipwe no ie, esap pokiten kich ion nge ion sia kukkuta ach sipwe winiti.
Ina met An Kraist Mwichefen mi ennet a ussun.
Ew Inis
Ika ka tongei Kot, ika ka mochen sinei ochu I ren om tapweno mwirin Noun we, iwe mwirin ka mesenong ikei. Ika ka ennetin kutta om kopwe aponueta An ewe Chon Amanau kewe annuk—inamo ika kose mo unusoch—iwe ka emon mi masenong ren Ewe Mwichefenin Jises Kraist ren Aramas mi Pin non Fansoun Soponon.
Nge met ika ka sokono seni aramas unukum? Ena ese fori om kopwe emon ese masenong—a fori om kopwe emon mi namot ren kinikinin ewe inisin Kraist. Meinisin ra auchea non ewe inisin Kraist. Ekkewe chonun mas ra esinna ekkewe mettoch ekkewe mas rese tongeni. Kewe apachapach ra fori kewe mettoch ekkewe pau ra nipwakingaw won .
Ena esap wewen pwe om angang pwe kopwe siwini meinisin aramas ar repwe ussun en. Nge a wewen pwe a wor mettoch mi auchea kopwe fori—me a wor mettoch mi auchea kopwe kaeo!
Ew Mongungu
Non meinisin kinikinin mwichenap, sia feioch fiti amwasangasangen kon seni mwichen kon mi angeoch. Nupwen ka rongorong, kopwew eteneki pwe ekkewe chon kon meinisin rese kon ekkewe ngingi mi chok nonno. Fan ekkoch ew kinikin a nukei ewe ngingi, fan ekkoch pwan ew. Nge meinisin ra anisi ewe ngiochun ngingi, me ra unusono ne chufengen. Emon me emon chon ewe mwichen kon a nonno chok ar nukanap chochon popun: ar repwe mwareiti Kot me seikata netipach ngeni I. Emon me emon mwan ika fefin ar ekiek ika netiper a nom won ew chok popun mi auchea. Me nupwen ena a fis, ra ennetin winiti ew mongungu.
Ika kose mo choni Ewe Mwichefenin Jises Kraist ren Aramas mi Pin non Fansoun Soponon, sia korukoto om kopwe fiti kich nupwen sia pwapwa non An ewe Chon Amanau “konun tongen angasa.” Sia mochen ami. Am aua tongeikemi. Ewe Mwichefen epwe murinono ren ami achocho ne anisi ewe Samon me Noun semirit.
Ika oua fen pwarano, seni papatais, seni ami fori ami pwon ngeni Kot, ami mochen ne, “tonong non ewe tit an Kot, me oupwe iteni noun aramas,” kinisou ngenikemi ren ami oua kinikinin ei wachemuken me auchean angang me ren ami anisi ne fori ewe Mwichefenin Jises Kraist met ewe Chon Amanau a mochen pwe epwe ina.
Usun ua sinei seni chienei we non Germany, ach tongei Kot me Noun semirit a ew pochokunen kapasen pwarata ngeni fonufan pwe iei ewe ennetin Mwichefen an ewe Chon Amanau.
Amo Kot epwe efeiochu kich sipwe nikitu me achocho ne kutta ach sipwe awesano ekkewe unusochun mettoch ach Chon Amanau, Chon Angasano, me Masta a fen watiw fan itach—pun meinisin repwe sinei pwe kich Noun chon Kaeo Non iten Jises Kraist mi pin, amen.