Tumunochu Manau

A soposopono: “Ua angei watten tong me aninis seni amwe famini non ewe wart. A fokkun nununo. [Nei] we pisop me presetenin ewe Mwichen Fopun a fen nununo me emuchu ar repwe pwarano ar tong me aninis. … Ua fen kuna poun ewe Samon … a emweni ei me ai ewe famini. … Ew wart ussun chok ai iei ewe famini mi namot ngeni meinisin, akaewin ngeni emon fopun mi nom non ei kinikinin.”

Ei fopun me an ewe famini, me an ewe famini non ewe wart, ra etiwa noun ewe monukon emon at ren tong non ei February.

Pereseten Russell M. Nelson a apasa, “Ew esisinen an ewe Samon ewe ennetin Mwichefen mi manau epwe tetenoch fansoun meinisin … achocho ne iamwiri emon me emon noun Kot semirit … [iamwirir fiti kirekirochun-tong] ngeni ewe emon, ussun chok I a fori.”

Nupwen emon fefin nipich a kuna pwe epwe ne nouni emon semirit ese nom non kokkot, aurekin pochokunen inis, tirukoruk non pekin ngun, saw, kapaseis ren pekin sukun, pupunu ese fat, netipengawen tanon anean a tongeni, non fansoun metek me a emweni emon fefin murino an epwe finata mettoch epwe ngeni osukosuk me niamam.

Ren ion mi rongorong a fen sinei ewe anononun metek me niamam seni an efisi ika pachenong non ew angangen atai popo, kose mochen chemeni: Ika mo sise tongeni siwini met a fis me nom, Kot a tongeni echikara met a fen fis me nom. Musono a tongeni fis ren ewe manamanen An fangono manau nupwen oua kun ngeni I ren tipetekison me aier ren unusen netip.

Ru fos ra kan pachengeni ewe epinipinin uputiw non ei manau: manau me finata. Manau ew wesewesesn auchean kinikinin an Samach kokot mi unusoch, me ren An annuk sia aucheani me eppeti manau; me sia fini ewe soposoponon manau nupwen epwe foruta. Sia pwan aucheani ewe niffangen pungun finata—anisi kich ne apochokuna ne fori mi pung minne kapunguno seni Kot a fang ngeni kich pwapwa ese much.

Nupwen emon fefin me emon mwan ra nom non ew fansoun aweires, ra mesengeni ew finata mi aweires, ach kapas, pouch, netipach—non pekin ngun, pekin ekiek, me pekin aora moni—a tongeni efieiochu ir ar repwe tongeni efeiochur repwe mefi an ewe Chon Amanau tong me, usun Preseten Henry B. Eyring a fen apasa, a wato epwe afata meser non pekin ngun seni “met ra ekieki pwe ra kuna” ngeni “met rese mo tongeni kuna.”

Pereseten Dallin H. Oaks a apasa: “Napanapan ach ekiek ren atai popo ese anongonong won wewe mi pwano nupwen manau won fonufan a poputa. … A fen foruno ren ach weweiti pwe … meinisin semiritin ngun noun Kot repwe feitto ngeni fonufan ren ew popun mi ning, me fetanin manauen emon me emon a fen poputa me mwan an foruta me epwe soposopono ren fansoun esemuch epwe feitto.”

Ewe kapasen ewe Samon ussun ewe semirit ese mo uputiw, a kawor mongungun seni ewe Aewin Presetensi me ewe Mwichen ekkewe Engon me Ruemon Aposel, ese mo sokkono me enniwin me ren kapasen soufos non ekkewe fansoun, a awora tichikin ren met ewe Samon a mochen fan itach.

“Ewe Mwichefenin Jises Kraist ren Aramas mi Pin non Fansoun Soponon a nuku non ewe epinipinin manauen aramas. Ina minne, ewe Mwichefen a u ngeni angangen atai popo ren won pusin winikapom ika pusin mokutukutun non ew neni, iwe a auroura chon Mwichefen ar resap fang ngeni, fori, pesei, me moni, ika ota ewe foforun atai popo.

“Ewe [Samon] a mutata ekkoch ketiwenon … nupwen:

• Nupwen popo a fis ren achomanau ika nisou nefinen ruemon pepecheri ir mi kon kanefengen, ika

• Emon a sinenap non pekin anisi pochokunen aramas a ekieki pwe manauen ika pochokunen ewe inenap a watte osukosuk, ika

• Emon a sinenap non pekin anisi pochokunen aramas a ekieki pwe ewe monukon ese mo uputiw a karan wanu wikan a watte osukosukan a tongeni an esap manau pekinon an uputiw.

Ewe Aewin Peresetensi a sopweno: “Atai popo ew mettoch mi watte osukosukan. [Pwan mwo non ekkei ketiwenon napanap] epwe wor ekiekin mwirin chok ren io we e efisi ei a fen angei pungunon seni iotek” me aurour ngeni ekkoch.

Inik ier a no, noun ewe Samon kewe soufos ra awora ew esinesin ngeni ewe fonufan. Mi pachenong ekkei kapas:

“Aua … pwarata pwe Kot a annuku pwe ekkewe manamanen nounou semirit mi pin repwe chok fis nefinen chok emon mwan me emon fefin, mi pupunu fengen fan annukun ewe muu.

“Aua pwarata pwe ewe napanap minne manau mi för mi kefinita seni nang. Aua apungano ewe epinipinin manau me auchean non An Kot kokkot ese much.”

Amari me tumunu manau ese mo uputiw esap ew wis non muun. Ew annukun pung a kapunguno seni ewe Samon seni Noun kewe soufos.

Preseten J. Reuben Clark Jr., i chon ewe Aewin Presetensi me nom, a kapas usun nouch sarafo ikenai: “Ekkewe sarafon ewe Mwichefen ra echiken mettochun ewe Ngun; ra mochen kaeo ewe kapas allim, me ra mochen non wenecharan, esap apwangapwangan. Ra mochen repwe sinei ussun … ach achifoua; ra mochen repwe angei kapasen pwarata usun [ewe] ennet. Ir ra … chon kutta porousan, chon kutta ennet.” Mut ngeni kich sipwe kakapas ngenir fan chommong fiti epinukunuk me kirekiroch ngeni ekkewe serafo non imwach, me ren emon me emon kich non ach kewe mwichen Relief Society me mwicheichen elter, ussun an ewe Samon annukun nimenimoch, ewe auchean manau me tumununun ekkewe rese mo uputiw fiti iner kewe.

Emon achengicheng sister a mak ngeni ei usun met a fis ngeni fite ier a no: “Ren emon 17-ier-in … , Ua tepereni pwe uwa popo fiti ekis ika ese fen wor aninis seni neiwe kamwet. Ua mefi sau me anamon [nge ngang] use mo nge ekiekin [atai ai we popo]. … A [wor] ai auchean famini me nei ewe pisop, ewe uwa kan chuchuri iteitan ren emwen. … Ua kun ngeni Kot. Ua kaeo ekkewe pukefel. …me iotek [me] kuna pochokun seni ai Chon Amanau me angangen aier. … Ua angei ponuwan [ai kewe iotek] minne use tongeni amam … Ew netipeta, nge ua sinei pwe upwe anomu nei we nengin an epwe mumuno … Ua iotek fan iten upwe poracho ngeni [me] mefi fatochun ewe tong an ewe chon Amanau seni aier, ua sinei pwe Kot … a ponueni iotek me apochokuna kich.”

Ew pean pupunu ra fokkun tong ra muti emon nengin monukon me ra aiti ewe kapas allim. Iei neminewe a pupunu a pwisin or ew an murinon famini.

Fan ekkoch, anononun weires me riaffoun fatangaw a tongeni chiechi ngeni ewe tumunun manau.

Kukutochok ew pean pupunu minne ngang me Kathy aua men tonger a mak ngeniei usun ewe achengicheng monukon ra awitiwiti.

Ewe sam a makkei: “[Nupwen punuwei we a] 10 wiken an ewe popo am oua kuna pwe noum ewe manamanen monukon a wor osukosuken non inisin a efisata terin inisin, a iteni Down syndrome. Aua mefi ewe pekusun ekiek … seni ewe nenien safei pwe aupwe atano. Ekkoch wik mwirin am oua sinei … noum we semirit ese mo uputiw … epwe namot ngeni an epwe wor angang won ngasangasan non aewin ierin. Non unusen met a fis am oua chok ikiotek fan iten aninis seni nang, … am oua mefi ewe Ngun a ngenikem kinamwe. Am oua angei pwarata me wewe pwe noum we nengin a emon semirit a kefinita meren Samach won Nang me wor an ennetin mochen an epwe nom non am famini me feitto ngeni fonufan.”

Inen ewe monukan ewe a makkei: ”[Aua] unusen mairu, tirukoruk, me ennetin nichipung ren ewe porous. … Nupwen ai uwa 14 wiken popo, aua sinei pwe noum ewe monukon a wor osukosuken ngasangasan, ew minne a tongeni epwe efisata mano. Am oua churi chommong tokter me kewe mi angangoch seni 10-18 wiken popo. … Ren ew me ew am kewe fansoun churi toktor, ra eis ika am mi mochen sopweno ai we popo ika atano. … Ewe Chon Amanau a echikara netipei me ngeniei ew memefin kinamwe me meseik ren noum ewe nengin monukon. … [Samach won Nang] a fen eniwini me eniwini ne pwari ngeni ei pwe I a wor an kokot mi unusoch fan itei [me] ua nuku I.”

Ra etiwa ewe nengin monukon fiti pwapwa eu wik a no. I a nour me ir ra noun.

Tinikopun nuku me amwararen pwaracho ir esisinen noun Jises Kraist chon kaeo.

Non ekkewe ier, a wor ai tufichin churi mwan me fefin ekkewe a wor ar tekisosonun mochen repwe niwiniti ewe anen pwon me ngeni ar efeiochun pirstut me tempel, chommong ier mwirin ar kouno seni ei mwichefen.

Non ew fansoun, upwe interfiuni emon mwan fan iten ewe Aewin Peresetensi ren niwinsefanin an pristut me efeiochun non tempel.

Mwirin an apupunu non ewe tempel mi pin, me mwirin an a wor unumon noun murinon semirit, ewe mwan ese chiwen wenechar ngeni punuwan me an pwon mi pin. Emon fefin ese pupunu a popo me a mochen atai an ewe popo.

Punuwen ewe mwan we a tingorei ewe fefin an epwe nounatiw ewe monukon me pwonei pwe epwe amarata ewe semirit nupwen a uputiw, fiti noun kewe pusin.

Ewe fefin ese wor punuwan a tipeew ngeni an esap awesano ewe popo.

Iei a fen ukukun 10 ier. Ewe fefin mi tekison a mot fan mesei a tongei ewe at ussun nge pukutan noun me a ureniei usun an punuwan achocho ngeni an epwe siwin me an epwe tongei me tumunu me ewe famini. Ewe sam a kechiw nupwen neminewe a kapas.

Ifa ussun an ei murinon fefin noun Kot a tongeni angei ei semirit pwe ussun pukutan noun epwe tongeni ew achechemen kirikiringawen punuwan ewe iteitan? Ifa usun? Pokiten a kuna pochokun non Jises Kraist me a nuku non feiochun manau, ewe manau mi pin. I a sinei ewe semirit ese mo uputiw i emon noun Kot semirit, mi nimenimoch ese wor an tipis.

Pwi me fefinei achengicheng, ewe kukununon tongen semirit rese mo uputiw non unusen fonufan ew watten aurek. Kot a tumunuochu manau. Iei An angang me An ning an epwe apwonueta ewe manau fochofoch me manau esemuch ngeni Noun semirit. Ussun noun Jises Kraist chon kaeo, sia tumunochu manau. “Ren ei aramas meinisin repwe sinei pwe ami nei chon kaeo, Ika oupwe tong fengen nefinemi.” Amo sipwe aea fengen ach tong pwan fen anapano ngeni ekkana ra fokkun mochen ach aninis. Ua pwarano ai tong ngenikemi me An Samach won Nang tong fan iten Noun semirit ra feitto ngeni fonufan. Non iten Jises Kraist, amen.