Ewe Wachemuken Niffang Ese Much: An Jises Kraist ewe Achasefan, Manausefan, Niwinsefanito.

Ekkoch ier a no, am ewe klasin kapas allim nesosor aua amwochu non ekiek ekkewe uwekisin non Paipen. Ren pukupukun ua mesemonu ngeni kewe mochomochen uwokisin. Ei a pachenong John 11:35—ewe mwochomwochen me nein uwokisin non pukefel, ruu chok fos—“Jises a kechiw.”

Ren ngang iei, ren an Jises a kechiw non netipengaw me pwapwa a pwarata ussun ewe amwararen ennet: ewe Noun Kot a feitto non ununun aramas ngeni ei manau iei me kaeo anongonong ngeni ewe inis ifa ussun an epwe nom rech iteitan me efeiochu kich.

Nupwen sia puchoruta non netipechou ika pwapwa, Jises Kraist a unusen weweiti. A tongeni nom non ekkewe fansoun nupwen sia wesen mochen ewe wachemuken niffang ese much—An Jises Kraist we Achasefan, Manausefan, niwinsefanito.

Mary me Martha ra kechiw ren mongeer ewe Lazarus, ewe afen mano. Mokut fiti netipetong, Jises a kechiw. I a amanauata Lazarus.

Jesus a nengeni Jerusalem non ewe fansoun Passover. A kechiw, ese tufichin ionfengeni Noun aramas ussun emon inenapen chuko ngeni etenin kewe. Ikenai An Achasefan a ngeni kich epinukunuk nupwen sia netipengaw ren met epwe tongeni fis.

Ewe Samonun ewe ataken kreip a kechiw nupwen A eisini noun kewe chon angang, minne epwe tongeni pachekichenong ussun brother me sister chon iamwir, “Met upwe tongeni fori ngeni ai we atake?”

Mary a uta non an riaffou ren ewe nenien peias. Jises a fokkun pwetete ne eis, “Pwata ka kechiw?” Mi sinei “pwe kechiw epwe soposopono non ew pwin, nge pwapwa epwe war nesossor.“ Manausefan a wato saramen ew minefon ran ren meinisin.

Non fonuen Puken Mormon, nupwen ewe watten mwichen aramas ra uta ngeni I, An Jises pwapwa a urono. A kechiw.

“Me i a angei nour kewe kukkun semirit, emon me emon, me efeiochur, me iotek ngeni ewe Sam fan iter.

“Iwe nupwen a wes ne fori ei a kechiw sefan.“

Iei ei Easter non Jises Kraist: A ponueni mochenin netipach me kewe kapas eis an ngunuch. A tonano chonun mesach,tiwenon chok chonun mesach ren pwapwa.

Nupwen chonun mesach ra suputiw, fan ekkoch sia omusomus, sia saw. Nge sia sinei pwe Jises Kraist a weweiti metekin me pwapwan manau pwapwa a tongeni ngeni kich pochokun pekinon pusin achnupwen sia weweiti kipwin me ngarangar.

Non South Amerika, emon sam a kechiw. Ew saramen non manauan, noun ewe kukkun nengin a mano. “Upwe fangeno mettoch meinisin ai upwe kuna sefan,” a kechiw non pei. Ua pwan kechiw.

Ren ewe efeiochun ewe Puebla Mexico Tempel, a sup chonun mesen emon achengicheng sister ren pwapwa. Mesemesan neminewe a pwarano nuku me asoren fangeno. A apasa, “Todos mis hijos estan aqui en el templo hoy —“Meinisin nei semirit ra nom ikei non ewe tempel ikenai.” Tettenin aramas ra chufengen non ewe imwen ewe Samon ra wato surun chonun mas ren pwapwa me kinisou.

Non osukosuken mauun, famini me chon orur ra u fengen. Kipwinin chonunmas ra ekis me ekis ne awora anen ar epinukunuk. Nouwan a chechech, emon fefin non eu kukun sopw a apasa, “Chon Ori, me mwen upwe mano, ua mochen opwe sinei ian opwe kuna me ian ami kewe famini mi poutuno.”

Emon nie saramaramen fefin me emon ateochun mwan repwe apupunu ra riri non ewe imwen ewe Samon. Neminewe a 70 ier, ussun pwan atewe. Emon niochun fopun epwe pupunu, a fokkun nimenimoch ne utiwit ngeni ei ffansoun. A saw ne nueti fetanei ufan ewe ufoufen opupunu ne nuetano ikkei, me ikenan. A kechiwen pwapwa. An Kot pwon a ponueta. An pwon mi pin a wato feioch.

Nupwen an churi emon sister ese wor punuwan, emon anuon Boyd K. Packer a kaeo ew nesen mi ekinamwe. Mwirin ew tipefesen me punuwan ewe, ewe sister a apasau ew omuchunon ametekin kapas. Ew akseten a angeano manauen punuwan ewe non ena ran. “Ren nime ier,” ewe fefin mi mano punuwan a chok kechiw, “Ua fen nom non riaffou ai sinei pwe kewe omuchunon kapas a rong seni tunawei mi fokkun ngaw mine a tou.”

Easter non Jises Kraist a anisikich ne forsefani, chasefan, fori pungun nefinach, won ir me ruepek ewe ponupon. Jises a tongeni echikara netipechou, I a tongeni awora omusomus. I a tongeni epichikicheno me ekkoch seni kewe mettoch kich ika ir ra fen apasa ika fori ika esap ren ena iwe sipwe fotek.

Easter non Jises Kraist a mut ngeni kich sipwe mefi an Kot ketiw. Ei fonufan a apasa ngeni kich pwe sia kon tam, kon mwoch, kon poromwong, kon aukukun, sise mirit, nioch, ika nafangaw non ngun. Seni ewe ekesiwin ren ewe ngun mi fen non Jises Kraist sia tongeni suseni nipwakingaw ngeni unusoch.

Fiti pwapwan Easter, sia konu, “Mano a kuf; aramas a ngaseno. Kraist a fen wineni ewe maun ” An Kraist we Manausefan a epichikicheno seni mano, seni ewe apwangapwangen me unusengawen inis. An Kraist Achasefan a pwan fori sefanikich non pekin ngun. I a suk cha seni inisin meinisin, an kechiw a fiti cha ussun nge, repwe awora ngenikich ngaseno seni tipis me imufesen. I a ochusefanikich, unusan me pin, kich fengen meinisin me Kot. Non mettoch meinisin mi murinno, Jises Kraist a eniwinisefani non watten—esap chok ren met a fis nge pwan met a tongeni.

Manauen Jises me an saram a pwarata ussun An Kot tong ren meinisin Noun semirit. Pokiten Kot Samach a tongei meinisin noun semirit non sokopaten ier me fonu, sia kuna An auchean tingor ach sipwe feitto kutta kinamwe me pwapwa non I non chommong oruni me nonomun aramas. Ianmo, inetmo, ion mo kich, sia aea fengen nonnnomun manauach ussun noun ewe chok emon chon Forata. Usun chok, chon tapweno mwirin Islam, Judaism, and Christianity ra aea fengen mettochun mwirimwirin Abraham me riri fengen non pwon mi pin seni mettoch mi fis non Egypt me nom.

Sam Abraham a feitto ngeni Egypt me a efeioch.

Joseph, a amomono non Egypt, a sinei an Pharaoh ewe tan ren ukukun tamen fisu ierin ras, me fisu ierin echik. Joseph a amanaua an famini me noun kewe aramas. Joseph a kechiw nupwen a kuna an Kot watten kokkot,ikewe meinisin mettoch ra angang fengen ren mi murinno ren ekkana ra aponueta ar kewe pwon mi pin.

Moses, e marita me non Egypt non imwen Pharaoh, a angei me mwirin a eniwinito sefani kewe kien ionsefanin Noun Kot kewe semirit.

Aponueta osini, Joseph, Mary, me ewe monukon Kraist ra kutta nenien tumun me non Egypt . Non Cairo, emon Muslim mi souneng a apasa: “Ekkewe sensen Quran ra aitikich pwe Joseph, Mary, me ewe monukon Jises ra kuna tumun me nenien tumun me non fonuei we. Me non fonuei, Jises an emon semirit a mongo anem kewe mongo, a karan eipweipwen fetan, apasa an aewin kapas. Ikei non fonuei, aua nuku kewe ira ra pworetiw fan ar repwe ngeni I me An famini foun ira. An nom non fonuei a efeiohu noum kewe aramas me ewe fonu.”

An Kot kokotun nongonongoch me pungun finata a mut ngenikich ach sipwe kaeo ren pusin met ach sinei. Ekkoch me ach kewe watten nesenin manau ra feitto seni kewe mettoch sise tongeni fini. Non tong, Jises Kraist a feitiw fan me feita asen mettoch meinisin. A pwapwa non ach tufichin pusin forata mettoch me fokkun pwapwa, kirekiroch ese fiti epinukunukun niffang, nuku ngeni aier me omusomus. Me A kechiw non netipengaw ren nonnon watten riaffouch aramas, kirikiringaw, pungungaw—napengeni a feito seni an aramas finata—ussun an ekkewe nang me ewe Kotun nang mi fitir.

Ew me ew fansoun Paska a pwarata tetenin me ochufengenin ngun me ruu kinikinin ewe auchean foforun achasefan, manausefan, me niwinsefanito seni Jises Kraist. Ei pinin me esisinen ochufengen ese fis seni akseten ika serefengen chok. Ewe Raninifen mwen Easter, Wik mi Pin, me Easter a fori apwapwan An Kraist Achasefan me Manausefan. Ren ikenai, iteiten April 6 sia achechema ewe poputan me forutan Ewe Mwichefenin Jises Kraist ren Aramas mi Pin non Fansoun Soponon. Ei Niwinsefanito a ew popun sia chufengen non ewe aewin Raninifen iteiten April non mwichenap.

Niwinsefanito a pwan feito nupwen ewe Jises Kraist mi manausefan, Moses, Elias, me Elijah ra eniwinato ekkewe kien pristut me mumuta ren ewe minefon tempel Kirtland non Raninifen non Easter, April 3, 1836.Non ena neni non ena ran ngeni ewe Mwichefenin Jises Kraist mi niwinsefanito a feito An Kot mumuta me feioch ne ioni fengeni Noun semirit, amonata Noun semirit ar repwe niwino ren I, me ochufengeni famini ese much. Niwinsefanito non ena ran a apwonueta osini ren an fis non ir me ruu Easter me Passover.

Pachenong ewe Kirtland Tempel, ua karan chok churi ekkoch neni mi pin non Ohio ikewe ewe Soufos Joseph me ekkoch ra kuna non nemesepwi Kot Samach me Noun we, Jises Kraist. Ewe Soufos Joseph a kuna ifa ussun nang. Non nang, Samach won nang, non Jises Kraist, “a amanaua meinisin angangen poun”non ew muun ning. Ekkewe chok mi ketiweu ekkewe ra “amam ewe Nau mwirin ewe Sam a fen pwarano i.”

Nupwen An angangen afanafan a poputa, Jises a affata An misin an epwe efeiochu emon me emon kich ren met sia mochen angei—non fansoun meinisin, iteiten fonu, nonnomuch meinisin. Mwirin an echikefen ren 40 ran, Jises a tonong non ew sinakok me anea, “Ewe Ngunun ewe Samon a nom woi, pokiten a epiti ei ai upwe afanafana ewe kapas allim ngeni kewe mi osupwang; i a tinieino ai upwe echikara ewe mi netipeta, ai upwe afanafana ngaseno ngeni ekkewe mi fotek, me apwaki mesen mi chun, me angasa ir mi kinasekis.”

Woungaw, netipeta, fotek, chun, kinasekis—ina emon me emon kich.

Ewe puken Isaiah a sopweno an ewe Messia pwonen epinukunuk, ngaseno, nukunuk: “Fini ngenir ekkana ra netipechou non Zion, … ngenir ningochun fanangen akei, ewe oinen pwapwa ren netipehchou, ewe ufoufen ingeiti ewe ngunun chourek.”

Ren ei, sia pupuchor ne kechiw, “upwe ennetin meseik non ewe Samon, nguni epwe pwapwa non ai Kot; pun a oufoufaei ngeni ekkewe ufoufen amanau, i a ponueino ngeni ewe ufoufen wenechar.”

Iteiten Paska sia apwapwai, ussun ew unusen esisin, ren ewe wachemuken niffang ese much meren Jises Kraist—An Achasefan, An (me ewe pwonen ach) ennetin pungun Manausefan, Niwinsefaniton An Mwichefen non fansoun soponon fiti kewe kien pristut me mumuta an epwe efeiochu meinisin Noun Kot semirit. Sia meseik non ekkewe ufoufen amanaua me ewe ufoufen aramas wenechar. Sipwe pupuchor ne apasa, “Hosanna ngeni Kot me ewe Nam!”

“Pun Kot a fakkun tongei chon fonufan, ina minne a fangeno Noun we Anamon, pun iteiten aramas mi nuku i resap poutmwanino, nge repwe kuna manau esemuch.”

Amo sipwe en me kuna non an Jises Kraist achasefan, manausefan, me niwinsefanito—kinamwe, winiti, me pachenong—ena minne a nikitu ngeni ennetin me meseik, pwapwa feinfeino, Ua iotek non Itan mi pin, Jises Kraist, amen.