O Le A Se Mea e Mafai ona Tatou Aoaoina mai ia Israelu?

Na tuuina atu e le Alii ia Isaraelu ni faatonuga uiga ese mo la latou tausamiga o le Paseka: “Ia faapea foi ona outou aai ai, o o outou sulugatiti ia fusia, ma o outou see i o outou vae, ma o outou tootoo i o outou lima, tou te aai ai faataalise” (Esoto 12:11).

Aisea na ta’u atu ai ia i latou e aai “ai faataalise”? Pe o le a vave ona latou tuua Aikupito? Pe le’i tele ea se taimi e aai ai?

Atonu e mafai ona e mafaufau i ni mafuaaga faafaatusa. Ua e vaai i le faatusa o le “fusi o outou sulugatiti” i se isi mea i tusitusiga paia (tagai i le Mataupu Faavae ma Feagaiga 27:15–18, mo se faataitaiga). Sa toso i luga e tagata o latou ofu talaloa ma nonoa faataamilo i o latou sulugatiti ina ia saunia e tamomoe. O se tasi o uiga iinei atonu e te le iloa lava le taimi e manaomia ai oe e le Alii, o lea e tatau ai ona e saunia i taimi uma.

O le taumamafa faavave o Isaraelu i le tausamiga o le Paseka, atonu sa faamanatu atu ai e le Alii ia i latou ia saunia mo Lana laveaiga. Manatua le mea o le a Ia fetalai mulimuli ane ai e uiga i Lona Afio Mai Faalua: “O lea, ia outou mataala ai; auā tou te le iloa po o le fea itu aso e sau ai lo outou Alii” (Mataio 24:42). E tatau ona tatou saunia! Ma e pei foi o Isaraelu, e mafai ona tatou vaai atu i lo tatou perofeta soifua mo le taitaiga.

Sa faasaolotoina tagata Isaraelu! Na laveaiina i latou e le Alii mai Tagata Aikupito e ala i le vaeluaina o le Sami Ulaula—o se vavega e le mafaaseseina.

I le tali atu i ai, sa faamanatuina e Isaraelu! Sa latou usuina se pese e viia ma faafetai ai i le Alii (tagai i le Esoto 15:1–19). Sa sisiva Miriama ma isi tamaitai ma taina topa (tagai i le Esoto 15:20–21).

E i ai nisi o mea ua faamoemoe le Alii tatou te taulimaina ma le migao ma le faanoanoa. E i ai tulaga e le talafeagai ai talieega ma faafiafiaga. Ae e le faapea la o se soo e tatau ona faamamalu i taimi uma! O le talalelei o se “leo o le fiafia” (Mataupu Faavae ma Feagaiga 128:19). Ua tumu tusitusiga paia i faatonuga e olioli ai:

“Afai ua e fiafia, vivii atu i le Alii i pesega, ma musika, ma siva, faatasi ma se tatalo o le viiga ma le faafetai. (Mataupu Faavae ma Feagaiga 136:28).

“Ina pepese ia ia Ieova o outou o e amiotonu; e ono lava i e amio sao [tatau, talafeagai] ona vivii atu” (Salamo 33:1).

“Ina fiafia ia ia Ieova, ma olioli o outou o e amiotonu; ina alalaga ia ma le fiafia o outou uma o e ua faamaoni o outou loto” (Salamo 32:11).

Ia lagona le saoloto e faamanatu vavega e faia e le Atua i lou olaga!

Ina ua alu Mose i le mauga e talanoa i le Alii, sa alu atu o ia mo aso e 40 (tagai i le Esoto 24:18). O tagata Isaraelu, o e na vaai i vavega matagofie ae sa tuputupu ae pea lo latou faatuatua, sa fefefe nei le toe foi mai Mose. Sa latou fouvale i le Atua ma ole atu ia Arona e fai se tamai povi auro ina ia mafai ai ona latou tapuai atu i ai, nai lo le Alii (tagai i le Esoto 32).

I se isi faaupuga, ina ua faigata mea uma, sa latou popole, liliu ese mai le Atua, ma toe liliu atu i o latou ala agasala.

E tofu uma i tatou ma taimi o le lē mautonu. O nisi taimi atonu e foliga mai e le manino le mea e finagalo le Alii tatou te faia. O nisi taimi tatou te tatalo ai mo tali ma au ina le onosai pe a latou le oo mai i le taimi lava lena.

O le a la se mea tatou te faia? Tatou te taofimau i lo tatou faatuatua. Tatou te pipiimau i mea ua uma ona tatou iloa a o faatalitali e aoao atili.

Atonu e le faaosoosoina oe e fausia se tupua e tapuai ai pe a e lotovaivai. Ae faapefea le faaosoosoga e fai mea e aumaia ai le faamalieina vave nai lo le olioli tumau?

Aua nei pa’ū atu i lena mailei! Faatali i le Alii mo le umi e alu ai. Filifili e faalagolao ia te Ia. O le a Ia tuuina atu e le aunoa Ana folafolaga.