Filifili e Pese

Ata na tusia e Katelyn Budge

Sa ou fiafia lava e auai i le lotu, ae sa i ai se mea se tasi ou te lei fiafia lava i ai: o le usuina o viiga.

Po o le a lava le tele o le faamalosiauina o a’u e o’u matua, sa le mafai lava ona ou fiafia i ai. Sa la sainia foi a’u mo le aufaipese o le konafesi a le siteki, ma le faamoemoe o le a fesoasoani lena mea. Ae ou te le pese lava—sa na ona ou memumemu o o’u laugutu ina ia foliga mai ai sa ou auai.

Ona oo mai lea o se taimi na suia ai mea uma.

I le taimi o le konafesi aoao ia Aperila 2025, sa tuuina mai ai e Peresitene D. Todd Christofferson se lauga na matua taia ai a’u. Sa ia fai mai, “Tatou te tapuai e ala i le usuina o viiga (e le na o le faalogologo ae usu viiga).”

O na upu sa tuia ai lo’u fatu. Ou te le’i mafaufau lava e usu ni viiga o se faatinoga o le tapuai muamua. Na faafuasei lava, ona ou salamo i na taimi uma sa ou filifilia ai le gūgū nai lo le pese. Sa vave ona ou faia se tautinoga—e le na o le usuina mai lena taimi, ae ia uunaia isi e usuina foi, e ala i le faasoa atu o lo’u aafiaga.

Sa masani ona uunaia i matou e lo matou epikopo i le autalavou e matamata i lauga o konafesi aoao, ma fai mai o le a latou taialaina i matou i o matou olaga i aso taitasi. Ou te le’i malamalama moni lava seia oo i lenei lauga. Ua ou vaai nei i le mamana ma le patino e mafai ona i ai sāvali.

O lenei aafiaga sa faamalosia ai la’u molimau. Ua ou aoaoina e oo lava i se mea faigofie e pei o le usuina o se viiga e mafai ona tatou latalata atili atu ai i le Tama Faalelagi.