O La’u Lu’i o le Vaiaso Paia

Ina ua valaaulia i matou e lo’u faiaoga seminare e suesue i suafa e lima po o faalaniga o Iesu Keriso i le Vaiaso Paia i le tausaga ua te’a, sa ou fiafia lava.

Sa ou filifilia ni faalaniga e suesue ma faitau i tusitusiga paia e o faatasi ma i latou. Ona ou sailia lea o faalaniga i luga o le initoneti e aoao ai lo latou talaaga faasolopito.

O se tasi o faalaniga sa ou suesueina o le “Kamuta,” talu ai atonu na aoaoina e Iesu lenei matata mai ia Iosefa. Sa ou aoaoina o tagata e faapopoleina e fesootai ma le toefuataiga ma le lipeaina—e pei o le ala e mafai ai e Keriso ona toefuatai ma lipea i tatou. O lena manatu sa faaauau pea ona oo mai i isi faalaniga.

Mo se faataitaiga, a o ou sailiili i le “Alii o le Filemu,” sa ou iloa ai o le upu Eperu mo le filemu, shalom, e faaata mai ai le atoatoa, lotogatasi, soifua manuia, ma le toefuataiga. Ou te lagona e pei ua fetaui lelei lava lena ma le auala, e ala i Lana taulaga togiola ma lo tatou salamo, na faamalolo ai e Keriso le vavaeeseina mai le Tama Faalelagi na mafua mai i a tatou agasala. Ona o mea na tutupu i le Eseta, ua mafai ai ona faatasi lo tatou Alii o le Filemu ma i tatou ma faaatoatoaina ai i tatou.

O le vaitaimi tonu lea, sa ou feagai ai ma luitau ma lagonaina e pei e leai se tasi ou te faalagolago i ai. Sa ou alu ese mai la’u sootaga ma Iesu Keriso ona sa ou manatu e tatau ona ou fesoasoani ia te a’u lava. Ae o lenei suesuega na fesoasoani ou te iloa ai o o’u faafitauli e le ni mea e a a’u ina ia onosaia na o a’u. Sa i ai Keriso iina e tauave le avega. O le taimi lava sa ou tuu atu ai ia te Ia e fesoasoani mai ia te a’u, sa ou lagonaina le filemu. Ou te iloa e mafai e Iesu Keriso ona toefuatai vaega uma o lo’u olaga pe afai ou te faatagaina o Ia.

A o e faaaluina le taimi e suesue ai le soifuaga ma uiga auaumama o Iesu Keriso, o le a e iloa ai o loo i ai pea o Ia iina mo oe. Ina ua ou filifili e faaalu se taimi faatasi ma Ia ma faamasani atili ia te Ia, sa mafai ona ou vaaia lo’u tāua i Ona mata. Sa ou lagonaina Lona alofa mo a’u i faalaniga uma sa ou suesueina.