O Lau Sootaga ma Oe
O le ala e te mafaufau ai ma taulimaina ai oe lava ia, e tāua moni lava.
Ata na tusia e Townen Jones
Pe a e mafaufau e uiga i sootaga, atonu e te mafaufau i au fegalegaleaiga ma ou matua, tei, uo, tagata o le vasega, po o tagata i le lotu. Ae o loo i ai se isi sootaga tāua e mafai ona le amanaiaina i nisi taimi.
Na saunoa peresitene Dieter F. Uchtdorf, a o avea ma Fesoasoani Lua i le Au Peresitene Sili, e i ai a tatou sootaga taua “ma lo tatou Atua, ma o tatou aiga, ma o tatou uso a tagata, ma i tatou lava.” O le auala e te mafaufau ai ia te oe lava—ma le taulimaina o oe lava—e faia ai se eseesega tele!
O nisi nei o auala e mafai ona e fausia ma faamalosia ai lau sootaga ma oe.
Siaki Atu i Totonu ma Oe Lava Ia
Mafaufau e faaalu sina taimi e ole atu ai i le Tama Faalelagi e fesoasoani ia te oe ia iloa pe o faapefea moni mai oe i le taimi nei. Atonu o loo lelei mea uma, pe atonu foi e te iloaina e le o lelei mea uma e pei ona e manao ia i ai. O le taofi ae sei iloilo au fegalegaleaiga faaagafesootai, soifua maloloina faaletino, faaleagaga, ma isi vaega o lou olaga e mafai ona fesoasoani ia te oe e iloa ai vaega e te manao e fetuunai pe faaleleia.
Faatulaga ni Tuaoi Maloloina
I au fegalegaleaiga, e tāua le faailoa atu i isi po o a amioga o le a e taliaina—e faatulaga ai ni tuaoi. Atonu e te lagona le le mautonu i le taimi muamua, ae o le faailoa atu i tagata o tulaga faatonuina a le Alii o loo e ola ai, o mea e te le toafimalie ai, o mea e le o ia te oe le gafatia e fai ai i le taimi nei, ma le auala e te manao e taulimaina ai oe, e mafai ona avea ma se fesoasoani tele.
I lenei auala, e te faaalia ai le faaaloalo mo oe lava ia ma lou soifua manuia. E fesoasoani foi lenei mea ia te oe e taulima ai ou manaoga ma atiina ae ai ni sootaga lelei atu, maloloina, ma sili atu ona paleni ma isi. I le taimi lava e tasi, o le taliaina o avanoa e fesoasoani ia te oe e faalautele ma tuputupu ae ai—e pei o le tuuina atu o se lauga i le lotu—o le a fausia ai oe ma lou talitonuga mautinoa.
Faaavanoa se Taimi mo Mea e Te Fiafia I Ai
E le manatu faapito le mautinoa o loo e ola maloloina ma toe faaolaola i le lotolotoi o ou tiutetauave uma. O le faitauina o se tusi lelei, matamata i le ata tifaga e sili ona e fiafia i ai, faaaluina o le taimi i fafo, po o le auai i musika, siva, taaloga, po o faatufugaga e mafai ona e maua ai le malosi faafouina e faafetaiaia ai manaoga o le olaga faapea foi ma le malosi fou e fesoasoani ma auauna atu ai i isi.
Fesootai ma le Lagi.
O le mea e sili ona tāua, e mafai ona e maua se sootaga sili atu ma oe lava pe a e galue i se sootaga moni ma tumau ma lou Tama Faalelagi. E mafai ona e faalatalata atili atu ia te Ia e ala i le tatalo, suesueina o tusitusiga paia, taimi i le malumalu, ma isi auala. A o e faia, na saunoa mai Peresitene Uchtdorf o le a e “aoao e vaai ia te oe lava e pei ona silasila mai le Tama Faalelagi ia te oe—o Lona afafine po o le atalii faapelepele e i ai se gafatia faalelagi.”
O le vaai ia te oe lava i lenei auala o le a fesoasoani ia te oe e taulimaina ai oe lava i le onosai atili, agalelei, faaaloalo, ma le faamagaloga. E mafai ona e maua le malosi i totonu e suia ai, faia ia sili atu ona lelei i aso taitasi, ma galue ia avea ma tagata uma e silafia e le Tama Faalelagi e mafai ona avea ai oe.