O Le Manumalo a lo Tatou Faaola

I lo’u valaauga o se Aposetolo, sa tele ina ou malaga ma maua le avanoa e feiloai ai i tamaiti, autalavou, ma tagata matutua i le tele o le lalolagi. E i ai taimi o le olioli tele i le olaga, ae o le mea e tasi ua ou vaaia i o’u lava mata ma lagonaina i le taele o lo’u loto e faapea, e faaopoopo atu i le fiafia ma le olioli, o le olaga e i ai taimi o le loto nutimomoia ma mafatiaga.

Ou te lagona le faateleina o le tosina atu i le alofa o le Faaola ma faamanuiaga e le gata ua folafola mai ia i tatou e ala i Lana Togiola. I o tatou tofotofoga, o le a fesoasoani pe fesoasoani mai le Faaola, ia i tatou (tagai i le Alema 7:12). Na te le’i puipuia i tatou mai aafiaga faigata o le olaga, ae sa Ia puipuia i tatou mai mafatiaga ma vavaeesega e faavavau mai le Tama Faalelagi. Na Ia faatagaina i tatou, e ala i Ona puapuaga uma, ina ia maua le avanoa e maua ai le olioli atoatoa ma le fiafia e faavavau i le afioaga o le Atua.

Ou te le mafaia, i soo se upu ou te iloa, ona faamatala lagona i lo’u loto mo mea atonu na tutupu i le loto o le Faaola, mafaufau, tino, ma le agaga i Ona taimi paia o mafatiaga uma mo agasala ma tiga o tagata uma.

Na amata ina ua afio atu Iesu “i se nofoaga ua ta’ua o Ketesemane” (Mataio 26:36). Na Ia fetalai atu i Ona soo, “Ua matua tiga lo’u loto e oo i le oti” (Mataio 26:38 Ona Ia tatalo faatolu lea mo Lona Tama ina ia tuu atu lenei ipu e aveese ese atu mai ia te Ia. Ae sa Ia fetalai, “ae aua le faia lo’u loto, a o lou finagalo.” “Ia faia Lou finagalo” (Mataio 26:39, 42, 44).

E aunoa ma se agasala, sa inuina e Iesu le ipu oona. Na Ia tauaveina i Ona lava luga a tatou agasala uma ma puapuagatia i talaatu o lo tatou malamalama faaletino ina ia mafai a o tatou o mai ia te Ia ma salamo, o le a aveesea a tatou agasala ma avega mai ia i tatou (tagai i le 2 Korinito 5:21). Sa Ia faia le mea e leai se isi e mafai ona faia e faataga ai i tatou e toe foi atu i le afioaga o lo tatou Tama.

Ina ua mavae puapuaga i Ketesemane, sa faaauau pea Ona mafatiaga—o le faalataina e se tasi sa savavali faatasi ma Ia, o le tauemuga a o le’i oo i taitai amioletonu, o le tiga o Lona tino sa sasaina, o le pale tuitui na oomi atu i Lona ao e fitafita leaga ma le le alolofa (tagai i le Ioane 18:12; Mareko 15:16–20), ma le laau mamafa na lafo i luga o faalavalava o Lona tua a o agai atu o Ia i Kolokota (tagai i le Ioane 19:16–17).

I luga o le satauro, sa lagona ai le toe foi mai o le tiga ogaoga sa lagoina i Ketesemane. O Iesu Keriso, le Alo o le Atua, na tauaveina na o ia le poloaiga paia a Lona Tama e tuuina atu Lona soifua. Sa le mafai e fitafita ma taitai ona aveesea mai ia te Ia. I le migao ma le lotomaualalo, sa punou ifo ai le ao o Iesuma fetalai atu, “Ua mae’a” (Ioane 19:30).

Faatasi ai ma Lana misiona paia ua faataunuuina, o le a avea nei o Ia ma tagata muamua i le talafaasolopito uma o tagata soifua ua toetu mai le tuugamau i le tino ola pea.

Na motusia e Iesu Keriso ia filifili ma noataga o le nofopologa e faavavau o le oti mo tagata uma o e sa ola pe o le a ola i le lalolagi. Sa ia faatoilaloina o latou fili uma lava; o le fili o le oti sa faavavau ona mou ese atu.

Sa saunoa mai Peresitene Russell M. Nelson e faape: “Sa ave e Iesu Keriso i Ona lava luga au agasala, ou tiga, ou lototiga, ma ou vaivaiga. E te lē tau tauaveina na mea na o oe! O le a Ia faamagalo oe pe a e salamo. O le a Ia faamanuia oe i mea e te manaomia. O le a Ia faamalolo i lou agaga ua faamanu’alia.”

I le avea ai ma se tasi o Ana Aposetolo faauuina, ua ou oo ai i taimi faaleagaga ma faaletagata lava ia na aumaia ai ia te a’u se molimau mautinoa ma le patino o loo soifua o Ia. I lenei vaitau o le Eseta, tau ina ia tumau malie nei upu i o tatou mafaufau ma loto: “Aua ne’i galo ia te a’u, Le Faaola e, na e tafetotoi ma maliu mo a’u,” a o tatou olioli i pesega, “Ua toetu o Ia! Ua toetu o Ia! … Ua faatoilaloina le oti; ua saoloto le tagata. Ua manumalo Keriso.”