Mai le Tu Mātila i le Tutu Faatasi

“Sa le lelei tele tagata i le taimi muamua,” o le faamatalaga lea a Tyler. “O le a agalelei i latou i ou foliga, ae o le a latou toe liliu ma talanoa e uiga ia te a’u. ‘O le teine fou e Mamona, ma e le inu kofe,’ po o le ‘Ua ova lelei tele foi naia ia; ai o se faafoliga.’”

I na popofou, sa pau le mea na iloa e Tyler fai o le agalelei pea ma faaauau pea ona ola i ona talitonuga. I sina mea itiiti i lea taimi ma lea taimi, a o faasolo ina iloa o ia e isi, na amata ai ona faia se eseesega tele.

“Sa ou feiloai i ni uo lelei i le au volipolo, lea na fesoasoani ia te a’u e faia ni uo i le taumafanafana atoa. O le taimi lava na ou faia ai ni uo se toatele ma faaali atu i tagata po o ai a’u, sa amata ona fesoasoani tagata ia te a’u. Sa amata ona iloa a’u e tagata ma iloa ai sa ou agalelei moni lava.”

A o faasolo ina iloa lelei o ia e tagata po o ai moni lava o ia, sa amata ona latou faia ni fesili faamaoni e uiga i ona talitonuga.

“Sa i ai sa’u vasega e itula le umi lea na liliu mai ai tagata uma ia te a’u ma fai mai ni fesili e uiga i o’u talitonuga,” o le tala lea a Tyler. “Sa na ona latou fia iloa lava ona latou te manatu e matuai eseese lava a tatou aoaoga.”

Ae sa le’i faataga e Tyler le lauiloa e fememea’i ai o ia. “Sa ou tali atu ma le faamaoni ia i latou. Tou te silafia—sa ou taliina i latou i le mea sili na ou mafaia.”

O nisi o ana talanoaga sa foliga faapenei:

“E le’o oe o se Kerisiano?”

“Leai, o a’u o se Kerisiano. Ou te talitonu ia Iesu Keriso.”

“Ia, e ese lau tusi. O le a lena tusi? O le a le mea e faatatau i ai?”

“O se tasi molimau ia Iesu Keriso, ina ua afio mai o Ia i le atu Amerika.”

“E a? Na afio mai Keriso i le atu Amerika?”

“Ioe!”

“Ia, e te faitauina le Tusi Paia? E mautinoa lava e te le faitauina le Tusi Paia.”

“Ou te faitauina! Ou te faitauina le Lomiga a King James.”

“Oi, e mo’i Faapena foi a’u!”

Talu ai o le toatele o ana uo fou ma tagata o le vasega o ni Kerisiano foi, sa maua ai e Tyler ni talitonuga sa tutusa ai i latou ma fausia mai ai iina. “O le tulaga taatele autu o le matou talitonu uma lava ia Iesu Keriso. Matou te taumafai uma lava ia avea e faapei o Keriso ma avea ma Ona soo,” o lana tala lea.

E le gata ina maua le sootaga a Tyler ma ana uo i luga o lo latou talitonuga i le Faaola, ae latou te fesoasoani le tasi i le isi ia avea ma tagata sili latou te mafaia. “Matou te taumafai uma lava ia avea ma tagata e sili atu ona lelei, lea ua na o le avea e faapei o Keriso. Matou te fesoasoani i le tasi ma le isi.” Ua puipuia nei e ana uo fou ia Tyler ma talia ona eseesega faalelotu! Na te faia foi lena lava mea e tasi mo i latou.

E faapefea ona fesoasoani Tyler ma ana uo i le tasi ma le isi i o latou talitonuga faalelotu eseese? E ala i le o atu ma faia mea lelei, e pei lava ona sa faia e le Faaola (tagai i le Galuega 10:38).

“I se tasi taimi sa matou tusia ai ni faamatalaga o fuaiupu o le Tusi Paia ma tuu i luga o taavale a tagata. Sa matou tusia ‘E alofa Iesu ia te oe’ ma mea faapena. O le a matou taumafai ia agalelei ma fesoasoani i tagata o loo tauivi.”

“Ou te taumafai ia lelei aua o le ituaiga tagata lena na i ai Keriso: o se tagata lelei. E taumafai foi au uo ia avea ma ni tagata sili atu ona lelei.”

Ua iloa e Tyler ona o ia o se tagata O Le Ekalesia a Iesu Keriso o le Au Paia o Aso e Gata Ai, o le a tu matila o ia ona e ese o ia. Na te iloa foi lagona o le tuuatoatasi ma le faaesea.

“Ou te taumafai ia avea ma tagata ua ou i ai. Ou te ataata atu i tagata uma, ma ou te agalelei i tagata uma. E oo lava i tagata e matuai ese lava mai ia te a’u i le aoga—o a’u o se uo ia i latou. Ou te savali e ui atu i faletetele, ma a ou vaai ia i latou, ou te faatalofa ma fesili atu pe o a mai o latou aso. O faatinoga faigofie o le agalelei ma le auauna atu i isi tagata o la’u auala lea e taitai ai e ala i faataitaiga,” o lana tala lea.

E ola Tyler i lana molimau e ala i le avea o se vaega o ana gaoioiga i aso taitasi ma fegalegaleaiga ma tagata. “Ou te iloa e alofa patino Keriso ia te a’u. Ou te vaai ia te Ia i lo’u olaga i aso uma. Pe a tuuina mai e tagata ia te a’u ni upu faamalo pe fai mai se mea manaia, ou te iloa o Ia o loo ta’u mai ia te a’u se mea sa ou manaomia mo lena aso.”

“Ou te iloa e faafofoga mai le Tama Faalelagi i a’u tatalo uma, ma Na te silafia o’u mafaufauga ma faamoemoega. Afai ou te tauivi e avea e faapei o Ia, o le a avea aia’u ma se tagata e sili atu ona lelei.

“Ma aisea e le avea ai ma se tagata e sili atu ona lelei?”