Pe A Mae’a Au Mea Sese—E Oo Lava i Mea Leaga
E tele mea e mafai ona tatou aoao mai ia Peteru e uiga i le Faaola, Lana Togiola, ma le toe taumafai.
O le Faafiti a Peteru, saunia e Carl Bloch
O le toatele o i tatou ua faia ia le itiiti ifo ma le tasi se manatuaga tatou te moomoo maimau pe ana mafai ona tatou faagalo. Pe o se taimi o le maasiasi a’ia’i, o se faalavelave tiga faaletino, po o se finauga ina ua e fai atu upu e te moomoo maimau pe ana mafai ona e toe faafoi mai, e tele taimi i le olaga pe a foliga mai e matua faatosina lava le i ai o se faamau “toe fai” po o se “tapeese”.
Ua Faataunuuina se Valoaga Oona
O le Aposetolo o Peteru o se tagata ofoofogia i le Feagaiga Fou. Sa ia te ia le faatuatua ma le lototele e savali ai i luga o le vai e agai atu ia Iesu, ae na o ni nai taimi mulimuli ane, sa ia faatagaina ai lona fefe e faatoilalo o ia ma amata ona magoto, ma tagi atu i le Alii mo se fesoasoani (tagai i le Mataio 14:28–31). E ui tatou te le iloa auiliiliga uma o le soifuaga o Peteru, ae tatou te iloa i se tasi taimi na ia tagi ai ma le le fiafia.
I ni nai itula a o le’i pu’e faapagotaina Iesu Keriso, sa Ia valoia ai o le a faafiti faatolu Peteru ia te Ia a o le’i vivini faalua moa. Sa musu Peteru e talitonu i se valoaga faapena ma “talatala atu ma le loto i ai, afai ou te oti faatasi ma oe, ou te le faafitia oe i soo se mea poto” (Mareko 14:31).
Ioe, na moni le valoaga a le Faaola. Faatasi ai ma le mata’u ma le fefe na siomia ai le pu’e faapagotaina o le Faaola, na le mafai ai e le toa o Peteru ona toilalo ia te ia. Ina ua uma ona ia faafiti faalua i lona iloaina o le Faaola, ma i le faatolu ona tauanauina atu pea o ia, o Peteru “ua amata ona fetuu ma palauvale, ua faapea atu, Ou te le iloa lenei tagata o le ua outou tautatala i ai” (Mareko14:71).
Ina ua faalua ona vivini le moa ma manatua e Peteru le valoaga a le Faaola, “ua ia … tagi lotulotu” (Mataio 26:75).
Ae e le o le mutaaga lena o lana tala!
Na Liua se Tulimanu, e Faavavau
E ala i mea uma e mafai ona tatou aoaoina i tusitusiga paia, o popolega o Peteru e le’i toe lofituina ai lava lana molimau ia Iesu Keriso. Sa ia molimau atu ma le lototoa e uiga i le Faaola i avanoa uma, e tusa lava po o le a le tulaga lamatia patino i le faia o lena mea. Manatua, sa aoao atu e Peteru se nuu o e faatoa uma ona faasatauroina Iesu Keriso! Sa moni le tulaga matautia.
Ina ua faamalolo e Peteru se tagata pipili talu mai lona fanau mai, ma poloaiina o ia, “I le suafa o Iesu Keriso o le Nasareta, ina tulai ia ma savali” (Galuega 3:6), sa puefaapagotaina o ia faatasi ma Ioane ma fesiligia pe na faapefea ona ia faatinoina lenei vavega.
Sa tali atu Peteru ma le lototoa, “Ia iloa e outou uma, atoa ma le nuu uma o Isaraelu, o le suafa o Iesu Keriso o le Nasareta, o le na faasatauroina e outou, o le ua faatuina e le Atua nai e ua oti, o ia lava ua tu mai ai lenei tagata ua malolo i o outou luma.
“O le maa lenei na faaleaogaina e outou tufuga faifale, ua avea ia ma tulimanu aupitoaluga. E leai foi se tasi ua i ai le ola; e leai lava se isi igoa i lalo o le lagi ua foaiina mai i tagata, e mafai ona faaolaina ai i tatou” (Galuega 4:10–12).
Oka se tali ina a lototele! Ma le faamaoniga manino o ona talitonuga maumaututu.
Auauna Le Atoatoa, E Mafai Ona Auauna Atu Ma le Atoatoa
O le a taitasi i tatou ma agasala i lenei olaga. E ui lava i a tatou taumafaiga sili ona lelei, o le a tatou le ausia o tatou faamoemoe ma faamoemoega mai lea taimi i lea taimi. E pei ona aoao mai Peresitene Jeffrey R. Holland, o le Peresitene o le Korama a Aposetolo e Toasefululua, “Vagana ai i le tulaga o Lona Alo Pele e toatasi, o tagata lē atoatoa o tagata uma lava e tatau ona galulue faatasi ma le Atua.”
O lou tāua faaleagaga e le faauigaina pe faatapulaaina i au mea sese—e oo lava i mea tetele! Ona sa salamo o ia ma faamagalo o ia e Keriso, o le faafitia e Peteru o Keriso sa le taofia ai o ia mai le molimau mulimuli ane, aoao atu, ma le liua ma le mana tele. Ua tumu tusitusiga paia i faataitaiga o isi soo o e agasala, salamo, ma faaauau pea ma le faatuatua ia Keriso.
O le a taumafai pea Satani e faatalitonu oe o loo faaopoopo au mea sese ma o le a le mafai lava ona e faatoilaloina. Aua le amanaiaina ana pepelo!
Na aoao mai Sister Tamara W. Runia, Fesoasoani Muamua i le Au Peresitene Aoao o Tamaitai Talavou: “E tatau ona e faalogo i lenei mea, o lea o le a ou fai leotele atu ai nei upu: E le o oe o le leo i lou ulu po o mea sese ua e faia. E ono manaomia foi ona e faileoteleina atu lena mea. Ta’u ia Satani, ‘Leai, e le o nei.’ Tuu o ia i ou tua.
“Ia lagonaina lena malosiaga, le salamo faaleatua lea e liliu atu ai oe agai i lou Faaola, ma mata’itu Lona alofa tunoa o ulu atu i lou olaga ma olaga o i latou e te alofa i ai. Ou te tautino atu, o le taimi lava tatou te aumaia ai ma le lototele se loto momomo agai atu ia te Ia, e i ai o Ia iina i le taimi lava lea.
Christus Consolator, saunia e Carl Heinrich Bloch
O Ou Aso Susulu o I Luma Atu
O lenei vaitau o le Eseta, a o e mafaufau loloto atoatoa i le Togiola a le Faaola, ia manatua o le tomai e salamo ai ma toe taumafai o se tasi lea o meaalofa silisili e mafai ona e mauaina. Ona o Iesu Keriso, e mafai ai ona faamagaloina au mea sese sili ona leaga ona lafoai ese lea e pei o ni filifili mamafa.
“E faavavau le malamalama o le Faaola nai lo le pogisa o le maasiasi,” na aoao mai ai Sister Runia.
Ona o Iesu Keriso, e mafai ai e le faamoemoe ona susulu atu i luma i taimi uma a o e taulai atu ia te Ia.