E Tasi i le Miliona

Ata na tusia e Katelyn Budge

O a’u e tasi i le miliona—o lo’u maua ai i le ma’i o le Cleidocranial dysplasia [faaletonu o le tutupu o ponaivi ma nifo] ua faamanino mai ai lena mea.

O le Cleiodocranial dysplasia e aafia ai le tulaga tuputupu a’e o ponaivi ma nifo. Sa faia ni o’u taotoga se lima: tolu mo le tulaga pi’o o lo’u ivitu ma le lua mo le faasa’oina o le sooga o le ponaivi i lo’u suilapalapa.

Ou te le’i malamalama pe aisea na faatagaina ai a’u e le Tama Faalelagi e onosaia le tele o le tiga ma alu soo i le potu mo taotoga. I o’u taotoga mulimuli, sa ou i ai i le falemai mo aso e 23, ma sa lofituina le tiga. E ui lava i fualaau, sa le mafai ona ou maua le malologa mo lo’u tino. Sa ou tatalo mo le Tama Faalelagi e fesoasoani mai ia te a’u.

Sa ou maua se uunaiga mai le Agaga Paia o lo’u tiga o se faamanatu itiiti lea o le mea na puapuagatia ai Iesu Keriso mo a’u. O le mafaufau e uiga i le alofa o Iesu Keriso na faatumulia ai a’u i le malosi ou te le’i talitonu sa ia te a’u.

Ou te iloa e ui lava ina foliga faigata mea, faatasi ai ma sina faatuatua itiiti ma se molimau mausali, e mafai ona tatou maua le filemu ma le malosi a o tatou taumafai e ausia sini ua tatou maua. E alofa le Atua ia te a’u, na tuuina mai e Iesu Keriso Lona soifua mo a’u, ma Na te faatagaina i tatou e o mai ma le malosi sili atu pe a mavae aafiaga tiga taitasi.