Na Vanua ni Nona Salatu
Ena rairai sega ni dau rawarawa beka na salatu ni iVakabula, ia ena lako vata kei keda o Koya ka liutaki keda ki na vanua eda via lako kina.
Droini mai vei Yukai Du
Eda dau digitaka tu na salatu baleta ni liutaki keda ki na vanua eda via lako kina. Ia sa levu cake na ka ena salatu mai na kena icavacava walega. E tiko talega na vanua— na kena mataqali ena vakadeitaki keda.
Sa sureti keda o Jisu Karisito meda lako vata kei Koya (raica na Mosese 6:34; Maika 6:8; 1 Joni 2:6; Vunau kei na Veiyalayalati 19:23). Na sala e sureti keda kina o Koya meda lako kina oya na salatu ni veiyalayalati—na salatu ki na vakacegu, reki, kei na bula tawamudu vata kei na Tamada Vakalomalagi—na vanua eda via tiko kina.
Ia e vakacava tu li na salatu oqo? Na mataqali vanua cava eda na takosova nida lako vata kei na iVakabula?
Qiqo
“Ni sa qiqo na matamata ni koro ka rabailailai na sala sa basika ki na bula” (Maciu 7:14).
Ni vaka me vakatatabutaki na Nona salatu, sa tiko na vuna. Na qiqo ni sala sa tarovi iko mai na kena kalowaci na vanua o rawa ni mavoa se yali kina.
Vakadodonu
“Ni sa dodonu na Nona gaunisala” (Alama 37:12).
Na Nona e sega ni salatu veigoleyaki. E sa sala dodonu duadua kina noda lalawa ni bula tawamudu. E sega ni veivukiyaki. Ia so na gauna eda sa vakakina. Ena vuku ni Veisorovaki ni iVakabula, sa rawa ni da veivutuni kusarawa ka lesu kina Nona salatu.
Baba Sobu ka Veivatuvatu So na Gauna
“Na salatu [i vale kivua na Kalou] e baba sobu ka veivatuvatu so na gauna” (Peresitedi Henry B. Eyring ena Mataveiliutaki Taumada, ”Vukei Ira ena Nodra Sala ki Vale,” koniferedi raraba ni Epe. 2010 [Ensign se Liaona, Me 2010, 25]).
Na lako cake i baba e rawa ni drakidrakita, ka o na rairai sega ni raibaleta na dela ni baba o kabata tiko qori. Ia sa vaqaqacotaki ka vakauqeti iko na iVakabula ni ko sasagataka mo cakava na veika dredre sa sureta tu o Koya mo cakava.
Na veivatuvatu ena nomu salatu e rawa ni duatani mai vei ira tale eso. Na nomu bolebole kei na ituvaki eso sa nomu saraga. Ia na iVakabula sa itokani veitokoni vinaka duadua ka na vukei iko ni sotava na dredre kecega.
Waqa vinaka
“A nomuni vosa na cina ki na yavaqu, kei na rarama ki na noqu sala.” (Same 119:105). “Ia nai valavala ni rarama, me vaka sa tu ena rarama ko koya” (1 Joni 1:7).
Ni sa vakabutobutotaki na nomu salatu, sa rawa ni vakararamataka na iVakabula na nomu sala, ke me dua madaga na ikalawa ka qai dua tale ena nomu ilakolako i vale kivua na Tamamu Vakalomalagi.
Taqomaki
“Io, kevaka au sa lako e loma ni buca ni yaloyalo ni mate, au na sega ni rerevaka na ca: ni kemuni sa tiko vata kei au” (Same 23:4).
Se vakacava sara na kena rerevaki, veivakaleqai, se dredre tu na nomu salatu, sa rawa nio kune vakacegu mo kila nio lako vata kei Jisu Karisito, ena lako vata kei iko o Koya ka liutaki iko mo taqomaki lesu kivua na Tamada Vakalomalagi.