iToko ni iTabagone ni 2026
”Lako vata kei Au”—Meda Wasea Mada
Na itoko ni yabaki oqo e tolu ga na vosa na kena balavu, ia na veivosa yadua oqori e levu sara na ka ena vakavulici keda kina.
Me vakataka na itoko ni itabagone ena yabaki sa oti, “Raica na Karisito,” na itoko ni yabaki oqo—“Lako vata kei Au”—sa dua na ivakarau ni vosa. Ena bula oqo, e vuqa vei keda ena sega ni donumaki keda na madigi ni rai se lako vata kei na iVakabula. Na cava na kena ibalebale me da “lako“ vata kei na dua e sega ni tiko vata kei keda vakayago? Me da vidavida mada oqori:
Taubale
NI kacivi Inoke na Turaga me dua na parofita, a yalayala vua, “Au na vakadonuya na nomu vosa kecega; ia ena dro tani mai matamu na veiulunivanua, ka vagolea tani na drodro ni uciwai; ia, ko na tu vei au, ka’u na tu vei iko; o koya mo lako kina vata kei au” (Mosese 6:34
Kevaka a yalataki vei iko ni lako vata kei na Kalou e kena ibalebale ni na tokona o Koya na nomu vosa, vagalalataka na veivakataotaki ena nomu sala, ka dau tiko vata ga kei iko—io, na cava o na sega ni lako vata kina kei Koya?
Itukutuku cecere: Sa yalataki vei iko oqo, me vaka beka ga ena Sigatabu sa oti. Ni o taura na sakaramede, o yalataka mo “dau nanumi Koya ka muria na Nona ivunau”—ena dua tale na kena vosa, me da lako vata kei Koya. Na cava o cakava kina na ka oqo? “Me tiko ga kei iko na nona Yalotabu“ (Vunau kei na Veiyalayalati 20:77; vakaikuritaki).
Ia, o na raica ni a sega ni tukuna vei Inoke na Turaga, “Tucake eke ka vakararai wavoki vata kei au.” E sega ni kaya o koya, “dabe sobu ka vakacegu mada vakalailai vata kei au.” A kaya o Koya, “Mo lako vata kei au.” E dodonu me da cakacakataka na veidusimaki vakayalo eda ciqoma. E dodonu meda cakava ka tukuna na veika eda vakabauta ni dodonu.
Me vaka e vakaraitaka o Peresitedi Marion G. Romney (1897–1988), e dua na daunivakasala ena Mataveiliutaki Taumada, “E rawa walega ni tubera na yavada ko Koya ni da sa tosoya na yavada.“
Ia raica se cava tale e sega ni tukuna na Turaga. E sega ni kaya o koya, “Cici vata kei au.” E sega ni kaya o koya, “Rikava na nomu itatao kecega vata kei au.” E sega ni kerei keda o Koya meda “cici vakatotolo cake mai na [noda] kaukauwa” (Mosaia 4:27). E sega ni namaka o Koya me da toso ena kena totolo duadua. E sega ni namaka o Koya me da kakua ni caka cala se yalolailai. E vinakata ga o Koya meda toso tikoga.
Vata kei
Eda lako vata kei na iVakabula. Sega ni liu vei Koya. Sega dina sara ni yawa mai Vua!
Ni ko sa lako vata tiko kei na dua tale, o na lako tikivi koya. Ia ena kena ibalebale oqo, eda na tiko vakalailai ena daku ni iVakabula. E veiliutaki, ka da muria—vakavoleka.
Ni ko sa tiko ena sala dodonu, na salatu e sega ni “veimuataki” vei Jisu—Sa tiko talega kina o Koya! Nanuma na sakaramede. Ena dau tiko vata ga kei kemuni na Turaga ena Nona Yalotabu, kevaka ko ni na sureti Koya tiko.
Na Tamada Vakalomalagi kei Jisu Karisito erau sega soti ni kauwaitaka na vanua o tiko kina ena salatu me vaka na nodrau kauwaitaka na vanua o qara tu kina. Erau na sotavi iko ena vanua cava ga o tiko kina. E sega talega ni dua na ka se vakacava na berabera ni nomu taubale.
O au
E gadrevi me da cakacakataka (LAKO). E gadrevi meda cakava me vaka e vakarota na Kalou kei na veivakauqeti ni Yalotabu (VATA KAYA). Ka sa gadrevi meda cakava na veika kece oqo e sega vata kei na dua tale, ia o Jisu Karisito (AU).
(Me vaka ni ratou duabau ga ena inaki o Jisu Karisito, na Tamana Vakalomalagi, kei na Yalo Tabu—raica na Joni 10:30; 17:21; Vunau kei na Veiyalayalati 35:2—e dodonu me tukuni ni o sa “lako vata tiko kei na Kalou,” “lako vata kei na iVakabula,” “lako vata kei na Yalotabu,” se dua ga na ka vakakoya.)
E levu tu na domo me da muria ena vuravura oqo. E sega ni lailai na dauveivakayarayarataki, tamata rogo, kei na daunipolitiki era na vinakata mo “lako” vata kei ira (se solia mada ga vei ira na ilavo). Na veika era kaya na tani ena rawa ni yaga, ia kevaka walega me salavata kei na ivakavuvuli ni iVakabula.
Lako vata kei Koya.