Kalasi Vou, Veimadigi Vou
Toso tu kina dua na kalasi se kuoramu vou? Oqo e vica ga na ka mo vakanamata kina!
Droini mai vei Cinta Fosch
Na itekivu ni dua na yabaki vou e dau kauta mai na veisau lelevu—oka kina na veisau kina dua tale na kalasi se kuoramu vou ena lotu! Se o biubiu mai na Lalai, curu kina iSoqosoqo ni Veivukei se kuoramu ni italatala qase, se toki tu kina kalasi ni Goneyalewa ka tarava se kuoramu ni Matabete i Eroni, oqo e tolu na ka mo namaka tiko.
1. Tamata Vou
Ena rairai dredre toka na tiko ena dua na kalasi vata kei ira na tamata qase cake mai vei iko, ia e levu sara na ka o ni tautauvata kina mai na ka o nanuma. Oni sa tisaipeli taucoko i Jisu Karisito ka sa tovolea tiko ni muri Koya. Na veisau ki na kalasi eso sa madigi ni rogoca na veivakararamataki vou mai vei ira na tamata ka duidui na veika era sotava mai vei iko—ka dua na gauna mo caka veitokani vou kina.
2. iTaviqaravi Vou Eso
Sa ka marautaki na parokaramu eso ni Cauravou kei na Goneyalewa! E rawa ni tiko vei iko na sala vou eso mo sema kina vei ira na itabagone tale eso, oka kina na itaviqaravi kei na keba ni kalasi kei na kuoramu. Nio sa yabaki 14, sa rawa talega mo tiko ena koniferedi, danisi, kei na semineri ni FSY.
Vaka itabagone qase cake, sa rawa nio tiko ena inisitute kei na itaviqaravi e tuvanaka na iSoqosoqo ni Veivukei, kuoramu ni italatala qase, se tabanalevu ni itabagone qase cake se vanua ni vakasoqoni vata.
3. Madigi Vou Eso
Nio sa qase cake, sa levu na nomu madigi mo qarava ena Lotu, vaka na vakayacori ni papitaiso ena vukudra na mate, vakalougatataki ni sakaramede, se vakayacori ni dua na veikacivi (oka kina na ilesilesi ni veiqaravi). Vakayagataka sara na veimadigi oqo mo tubu vakayalo ka marautaka na kena vaqaqacotaka na nomu isema kivua na Tamada Vakalomalagi, o Jisu Karisito, kei ira na tamata o qarava.
Nio caka veisau tu kina dua na kalasi vou, nanuma ni ”dou sa duabau ga koi kemudou kecega e na vuku i Karisito Jisu” (Kalatia 3:28). Nio yavutaka na ka o lakocuruma ena lotu ki Vua, ena vukei iko o Koya mo kune marau ena vanua cava ga o tiko kina.