Nomu Mape Lesu ki Vale
Cava na vuna e bibi sara kina me kilai vakavinaka na yavu ni veivakabulai?
Droini mai vei Mackenzie Alexander
Ena iVola i Momani, a tekivuna na nona itukutuku na parofita o Jeromi ni kaya, ”Se cava tale meu na vola me vakuria na ka era sa vola oti tu na noqu qase? Era sa sega li ni vakatakila na yavu ni veivakabulai? (Jeromi 1:2)
Ke a nanuma o koya ni oya ga na ka eda gadreva tu, sa dodonu me ka bibi sara na yavu ni veivakabulai!
E sa vakakina! E sa mape uasivi duadua ni noda bula. A kaya taumada o Peresitedi Russell M. Nelson, “Na kilai vinaka ni ituvatuva talei ni Kalou e kauta tani na veika tawakilai ni bula kei na veilecayaki ni noda veisiga ni mataka.”
Ia e rawa vakacava ni vukei iko na mape oqo mo vakatulewataka kina na veilecayaki ni bula?
Au a Lako Mai Vei?
Sa Tamada Vakalomalagi na Kalou. O a bula vata tu kei Koya ni bera nomu sucu mai. Sa lomani iko o Koya!
A vakamacalataka o Elder Alan T. Phillips ena Vitusagavulu, ”O iko o sega ni dua na vatuka ni bula vakacalaka, luveniyali ni maliwa lala, se na itini ni ka bula kei na gauna kei na madigi. Na vanua e tiko kina na cakacaka ni liga, e tiko kina na kenadau.”
Ni dredre tu na bula, esa veivakacegui me kilai ni o sa tiko eke ena dua na inaki ka wanonovi tu mai vua na Tamada Vakalomalagi lomani.
Au sa Lako Tiko Beka Evei?
O sega ni tiko eke mo lako tu vakaveitalia—sa tiko na nomu icavacava! E vinakata na Tamada Vakalomalagi mo lesu i vale ki Vua ka yaco mo vakataki Koya. Sa vakarautaka o Koya na yavu ni veivakabulai mo rawata kina na veivakalougatataki taucoko ni Nona matanitu (raica na Vunau kei na Veiyalayalati 14:7).
Na kilai ni yavu ni Tamada Vakalomalagi ena vukei iko ena bula oqo. Nio ”rai vakabalavu” ka vakasamataka na silesitieli, sa rawarawa sara ni caka e vuqa na digidigi—oka kina na digidigi ni muri Jisu Karisito
Au Na Yaco Vakacava Kikea?
Mai na kena soli tu vei keda na icavacava, na yavu ni veivakabulai e vakaraitaka talega na salatu meda yaco kina kikea.
Sa ivakaraitaki uasivi duadua o Jisu Karisito ena muri ni salatu lesu ki vale. Kevaka o rai ki Vua—ka lako vata kei Koya—ena vukei iko o Koya mo lesu kivua nai Tamada Vakalomalagi ka yaco mo vakataki Koya vakalevu cake. Me vaka a vakamacalataka o Elder Sergio R. Vargas ena Vitusagavulu, ”E tiko e vuniyaloda yadua na gagadre levu meda lesu kina noda itikotiko vakalomalagi, ka sa noda ivakarau ni veituberi vakalomalagi o Jisu Karisito. Sai Koya na sala.”
Vakacava Keu Sa Yali?
Ena mape sara mada ga, o na rawa ni gole cala. O na dau caka cala tikoga. Ia kua ni lomaleqa! Sa vakarautaka na Tamada Vakalomalagi e dua na Dauveivueti mo rawa kina ni veivutuni tikoga, lesu tale ki Vua, ka yaco mo vakataki Koya vakalevu cake. Nanuma: ”Eda sega ni tiko ena salatu ni veiyalayalati me sega kina na caka cala. Eda tiko ena salatu ena veivutuni tiko e veisiga.”
Ni o vulica na yavu ni veivakabulai, nanuma ni a vakarautaki tu ena loloma. E vinakata tu na Tamada Vakalomalagi mo lesu ki vale. Kevaka o muria na Nona mape, ena vukei iko o Koya mo yaco kikea.