Lako vata kei Au

O sa bau kerei mada mo cakava e dua na ka o a sega ni nanuma ni rawa mo cakava? E rairai o sega beka ni kaukauwa vinaka se maqosa, se o lomaleqa ni ra na dredre na tani ka vakalewai iko. Kevaka o vakila oqori, e sega ni o iko duadua.

Ena udolu na yabaki sa oti, a tiko kina e dua na tamata na yacana o Inoke. A kerei Inoke na Kalou me vunautaka na veivutuni vei ira na tamata—eso vei ira na tamata ca duadua e qai bau laurai e vuravura.

E sega ni nanuma o Inoke ni rawa ni cakava. A tukuna vua na Kalou o koya ni se gone sara, e sega na nona itokani, ka sega soti ni maqosa sara o koya (raica na Mosese 6:31).

Ia a yalayala vei Inoke na Kalou. A kaya vua na tamata yalorere oqo, “Mo lako yani ka kitaka na ka au sa vakarota vei iko” ka ”Raica sa tiko vata kei iko na Yaloqu, ia au na vakadonuya na nomu vosa kecega; ia ena dro tani mai matamu na veiulunivanua, ka vagolea tani na drodro ni uciwai; ia, ko na tu vei au, ka’u na tu vei iko; o koya mo lako kina vata kei au” (Mosese 6:32, 34

“Lako Vata kei Au” Sa qai dua dina na veisureti rawarawa ka totoka.

Sa yalataka na Kalou vei Inoke ni kevaka me na yaloqaqa ka tekivu, ena tiko vata kei koya na Kalou ena veikalawa yadua ena sala. Na Kalou ena vakaukauwataki Inoke ka vaqaqacotaki koya me cakava e levu cake na ka ka vukei koya me yaco me levu cake mai na ka e rawa ni vakasamataka.

E dua vei ira na yacana na iVakabula ko Imanueli, se ”na Kalou sa tiko vata kei keda” (Maciu 1:23). E tiko ena yaca ni Turaga kei na Nona ivakarau me lako vata kei keda. Sa noda na digidigi—eda na lako talega vata kei Koya?

Ena gauna oqo, eda rai vei Inoke vaka tamata ni vakabauta ka parofita cecere ka iliuliu. Ia ni bera o Inoke na parofita, a tiko e dua na Inoke gone ka vakatitiqataki koya tiko ia se digitaka tikoga me lako vata kei na Kalou.

Ni sa dredre na bula, ni ko sega ni vakila ni sa rauta na nomu bula, nanuma na yalayala ni Turaga vei Inoke, vakakina vei iko. Ena lako vata kei iko o Koya, Ena sega ni biuti iko taudua o Koya, sega mada ga ena dua na ikalawa.

Imanueli. Kalou sa tiko kei keda Kalou sa tiko vata kei iko.

Me vakataki kemuni na cauravou, a kerei Inoke na Turaga me vakayacora na itavi bibi eso vakamatabete. Sa nona itavi me vunautaka na veivutuni vei ira na tamata ca. A vakaraitaka o Inoke na nona vakatitiqa. ”[O au] e dua ga na gone,” a kaya. “Era sa cati au kece na tamata Au sa berabera ni vosa; na cava beka au nomuni tamata kina?” Mosese 6:31

A sauma na Turaga ena qaqa kei na veivakadeitaki. ”Lako yani ka kitaka me vaka au sa vakarota vei iko Mo dolava na gusumu, ka na qai vakasinaiti . Sa tiko vata kei iko na Noqu Yalo Tabu … ; era na dro e matamu na veiulunivanua … ;o koya mo lako kina vata kei au” (Mosese 6:32, 34).

A vulica o Inoke ni gauna e solia kina vei keda na Turaga e dua na itavi, eda sega ni sotava duadua. Ni da sa cakava ka maroroya na veiyalayalati kei Karisito, eda sa lako vata kei Koya ka wasea na Nona kaukauwa—eda sa yaco me iyaya ni cakacaka e Ligana.

Me vakataki Inoke, e dua na nomu itavi bibi: veiqaravi, veiqaravi ena valetabu, qarava na sakaramede, vulica na ivolanikalou, bulataka na ivakatagedegede vakosipeli, veivutuni, vakavakarau ki na kaulotu, kei na vuqa tale. E rawa ni da vakadrukai! O na vakila ni o sega ni veiganiti. Sa daumaka oya. E sega ni baleta na kena caka duadua. E baleta na digidigi nikua—na siga nikua kei na veisiga yadua—me da lako vata kei na Kalou.

Ena Nona veivuke, eda rawa ni cakava na veika kecega. Ena vakaukauwataki iko o Koya, veivosoti, ka rawa kina mo ulabaleta na veika o rawa ni rawata. E lomani iko o Koya! Me vaka ni keitou Mataveiliutaki Raraba ni Cauravou, keitou lomani kemuni ka nanamaki meda duavata ena nomuni dikeva na itoko veivakauqeti ni 2026: ”Lako Vata kei Au.”