3 Na Sala Me Cakitaki Kina o Setani ka Digitaki Jisu Karisito
Na kilai vinaka ni ka a yaco ena bula taumada e rawa ni vukea na nomu caka digidigi vinaka ena gauna oqo.
Droini mai vei Dean MacAdam
Ni sa vakaraitaka na Tamada Vakalomalagi na Nona ituvatuva baleta na noda bula marau tawamudu kei na torocake, a yalataka o Koya me tala mai e dua na iVakabula me vukei keda. Ni taroga tu na Tamada Vakalomalagi, “O cei me’u tala?” (Eparaama 3:27), a kaya o Jisu Karisito, “Na Daulomani [i Tamana] ka Digitaki mai na ivakatekivu“ (Mosese 4:2), “Koi au oqo, mo ni talai au“ (Eparaama 3:27). A sega ni kerea e dua na ka o Koya, e vinakata ga me cakava na lomai Tamada (raica na Mosese 4:2).
Qai basika tu o Lusefa. Kaya talega o koya, “ni talai au“ (raica na Mosese 4:1). Ia sa kocokoco o Lusefa, ka sega ni via solibula ena vukuda. A vinakata o koya na veidokai, kaukauwa, kei na lagilagi ni Kalou me baleti koya ga (raica na Mosese 4:1). A gadreva o Lusefa me vakarusa na noda galala ni digidigi. Na sala a nanuma o koya me vakayacora kina e tawamatata. Ia eda kila tu ni sega na galala ni digidigi, eda na sega ni rawa ni torocake ka yaco me vakataka na Tamada Vakalomalagi. Ia, sa vakakina, nona vorata o Lusefa na Tamada Vakalomalagi ka saqata na Nona ituvatuva.
Na veisaqasaqa i Lusefa sa vakavuna na ivalu mai lomalagi, ka mani “vakasavi sobu mai;“ ka sa “yaco me ko Setani“ (Mosese 4:3–4). E dua na ikatolu ni lewevuqa mai lomalagi era muri koya (raica na Vunau kei na Veiyalayalati 29:36). Ia eda cakacakataka na noda galala ni digidigi ka muri Jisu Karisito.
Na ivalu ka tekivu mai lomalagi sa tomani tiko nikua. E saga tikoga o Setani kei ira na nona imuri me ra saqati keda. Oqo e tolu na sala me vakatakilai kina na imoimoi kei na iwalewale i Setani, levea na nona dai, ka digitaki Jisu Karisito ena noda bula taucoko.
1. Kakua ni Vakatara na Yaloca me Qaqa
Ena veiyabaki sa oti, au a saga meu vakauqeti ira na noqu itokani e koronivuli me ra kakua ni cakava nodra vuli e vale baleta niu a sega ni cakava na noqu. Au a cala tu, ia au vakasamataka ke keimami sotava taucoko na leqa, au na via lomavinaka toka vakai au. Na noqu itovo lolovira e vakananumi au ena ivakarau ni bula i Setani kivei keda. Baleta ni sa yaloca o koya, sa vinakata tu me vakacacana na noda rawa ni rawata na bula tawamudu.
Sa veilecayaki sara o Setani ena nona lomaca me—ni kila tu ni na malumalumu vakaoti—saga sara vagumatua me “vakatetea na cakacaka ni butobuto” (Ilamani 6:28), me vakamalumalumutaka e vuqa vei keda e rawa vua.
Na veicavilaki i Setani e sega ni tuvatuva eda digitaka. Eda rawa ni vakayagataka na noda galala ni muri Jisu Karisito ka cakitaka tikoga na veivakayarayarataki beci, lolovira, ka yalani vakaikoya i Setani. Sa solia na Nona bula na iVakabula me rawa ni da vakataka na ka e kila tu eda rawa ni vakataka ka tovolea na kamikacica ni bula tawamudu.
2. Kakua ni Yalorere
Au vakasamataka eso na gauna na vuna era a digitaka kina na ikatolu ni wase ni luvena vakayalo na Kalou me ra cakitaka na Nona ituvatuva. Sa kila tu o Setani ni rau sa sala veirawai me vakamalumalumutaki kina na vakabauta na rere kei na vakatitiqa. E rawa ni temaki keda o koya meda vakatitiqataka na keda yaga se vakauqeti keda ni da sega ni rawa ni savasava vakaidina ena Veisorovaki i Jisu Karisito. Se na rawa ni tovolea o koya meda yalorere ni veivutuni tu se muria na ituvatuva ni Kalou.
Ni da sotava na veivakatovolei kei na dredre, eda rawa ni digitaka me da vakararavi ki na ituvatuva ni Kalou kei Jisu Karisito. Sa vosota tu o Koya na ka kecega me rawa ni noda qaqa o Koya ni da sotava na rere, ia ena Vukuna, eda sa rawa ni ulabaleta tu.
3. Mareqeta na Ka Taucoko e Dolea vei Iko na iVakabula
Sa vu ni veivakaturagataki kei na veivakaukauwataki vei keda na Tamada Vakalomalagi kei Jisu Karisito. O cei tale e kaya ni rau via vukei keda meda vinaka sara ka solia vei keda na ka kecega e tiko vei rau ka sega ni vakasuka kina? Na ka kecega e tiko kivua na Tamada sa rawa ni noda! Sa soli vei keda oqo ena vuku ga i Jisu Karisito.
Niu vakasamataka na tawananumikoya kei na kaukauwa veivueti ni iVakabula, au sa via muri Koya. Sa qaqa uasivi duadua o Jisu Karisito ena ituvatuva uasivi duadua. Nida digitaki Koya, sa vukei keda o Koya ni vorata na meca, muria na ituvatuva ni Tamada Vakalomalagi, ka rawata na noda icavacava vakalou.