Na Veika Kece e Vakavinakataki Ni o Vakararavi Vua na Kalou

Ena gauna oqo, au sa tekivu vakatitiqataka na dina ni kosipeli, na noqu ivakadinadina, vakakina o cei o Jisu Karisito. Ena dua na gauna, au a vakataroga na ka e baleti Koya ka tekivu vakasamataka niu sega ni vakabauta na kalou. E kaukauwa ka batabata na yaloqu me vaka e dua na vatu ni aisi.

Na iwase ni noqu bula oya a dredre sara ka veiveisau. Au nanuma baleta ni gauna eda muduka kina na noda vakabauti Jisu Karisito kei na Nona kaukauwa, sa sega ni vakaibalebale na noda bula ka na yaco meda rarawa.

A qai vakauqeti au o tamaqu meu sa tekivu lako tale i lotu. Au a muria e dina ga niu se veilecayaki tiko ka levu tu na noqu taro.

Ena dua na siga e valenilotu, au a raica e dua na pepakabi me baleta na semineri. Oqo e vakacaudreva mai e dua na yalo au taleitaka. Au a torovi noqu bisopi meu tarogi koya. A vakuri au sara ki na veitalanoa ni ilawalawa ni semineri ka tukuna vei au ni tekivu ena 5:30 ena mataka.

Au sa mani tekivu lakova na semineri. Oqo a vukei au meu vakaitokani vou ka rawata e dua na ivakadinadina ni Lotu kei na ivolanikalou. E dua na noqu qasenivuli a vakayaloqaqataka sara ga na noqu kalasi ka vakavotuya mai na vinaka e dui tu vei keitou. Au sa raica rawa ni noda vulica na ivolanikalou e vakatara vakaidina meda kila na iVakabula. E tiko e dua na duidui ena nomu rogoca na nona ivakadinadina e dua mai na nomu vakasaqara na nomu ena vuli kei na vakabauta.

E liu, au kila tu me baleta na Tamada Vakalomalagi kei Jisu Karisito mai na veika era tukuna vei au na tani. Ia e sega ni rawa ni da vakararavi tu ga vakatabakidua ki na nodra ivakadinadina na tani. Ena gadrevi me da kila na iVakabula vakataki keda .

E gadrevi me da vakarautaka na gauna me baleta na iVakabula kei na veika vakalou me rawa ni yaco meda dua vei ira na Nona tisaipeli. Au sa vulica ni na yaco mo kilai Koya ena gauna o:

1. Vaqarai Koya kina vagumatua.

2. Wili ivolanikalou.

3. Segata mo vinaka cake vakayalo.

4. Masu.

5. Dau gole ki na valetabu.

6. Qaravi ira na tamata.

7. Lolo.

8. Muria na Nona ivakaraitaki.

9. Me vinaka na yalomu.

10. Besetaka mo vosa vakacataka se kaseti ira na tani.

Na veika oqo a vukei au meu kila na iVakabula—ka yaco me dua na Nona tisaipeli. Sa ka bibi me da tisaipeli i Jisu Karisito baleta ni rawa ni da vakayagataka kina na Nona rarama me vukei ira kina na tani. Mai na noda ivakaraitaki vinaka, era na raica na tani na levu ni veivakalougatataki ni kosipeli.

Niu lesu mai ki lotu, au tu saraga ena botonisauloa—sinai ena vakatitiqa, sega noqu itokani, sega na inuinui, sega ni kila se o cei dina o au se cava na noqu inaki.

Ia oqo, na kosipeli na “yameyame” sa vakararamataka na noqu bula ka vukei au meu cakava na veika dodonu ka yaco meu tamata vinaka cake. Ke sega na kosipeli, au sega ni kila na vanua au na tu kina.

Na veika kece e vinaka cake ena bula ni o vakararavi vua na Kalou. Mai na gauna o sa vakasaqarai Koya kina, o sa na tekivu kaba tani mai na qara ka tekivu mo torocake. E dina, era na lako ga mai na veika dredre, ia na veivakabauti kei na gagadre oqo ni vakabauta ena laveti kemuni vakamalua. Ena taura beka na gauna, ia ena vinaka cake mai na veika!

Ni o vakararavi vua na Tamada Vakalomalagi, o na rawa ni sotava na veika cava ga o lako curuma—se bolebole, vakatitiqa, leqa ni bula, se galili. Me vaka oqo, o na rawata beka na maka vinaka ena dua na veitarogi, vakavinakataka cake na nomu bula, se ciqoma na isaunitaro—so na gauna na isaunitaro o se tekivu vakasaqara mai ni o se qai yabaki 10, me vaka ga a yaco vei au—kevaka o vakasaqarai Koya ka vakararavi Vua.

Au kila vakamatua na veika oqo. Au vakavinavinaka ki na kosipeli, au rawa ni kaya niu sa veisau. Ia, sa veisau na ka kecega—na yaloqu, vakasama, itovo, kei na ivakavuvuli. Au sa kila oqo na dina, ka sa vakavuna na veisau kecega. Sa vinaka cake na ka kecega baleta na kosipeli i Jisu Karisito.