Yalayala Talei ni iTuvatuva nei Tamada

Mai vei Elder David A. Bednar

Ena Kuoramu ni iApositolo Le Tinikarua

E dodonu me dau vakavinavinaka na yaloda ni da vakasamataka na nona ituvatuva cecere na Kalou vei keda.

e dua na cauravou ena yasa ni dua na ka levu ka vesuka vata na mua e rua ni dua na wavu

Na ituvatuva nei Tamada Vakalomalagi e vakamacalataka na “yalayala e levu sara ka talei” (raica na 2 Pita 1:3–4) kei na dina e vakamacalataka na keda ivakatakilakila kei na inaki tawamudu.

E vakamacalataki ena “Na Matavuvale: Ai Vakaro ki Vuravura Raraba: “Na tamata kece sara—na tagane kei na yalewa—era sa buli me ra ucuya na Kalou. Oi keda yadudua eda sa luvena tagane se yalewa lomani vakayalo na noda itubutubu vakalomalagi, ka tiko noda dui inaki vakalou kei na noda icavacava.”

Sa yalataka vei keda na Tamada Vakalomalagi ni kevaka eda muria na Nona ituvatuva kei na ivakaraitaki nei Luvena Lomani, muria na ivakaro, ka vosota ena vakabauta me yacova na ivakataotioti, ena “noda na bula tawamudu, na isolisoli uasivi duadua vei ira na isolisoli kecega ni Kalou“ (Vunau kei na Veiyalayalati 14:7).

Na cakacaka ni Kalou e vakanamata ki na nodra toso kei na nodra bula vakacerecerei na Luvena. Na veitiki yadua ni Nona ituvatuva e tuvai me vakalougatataki keda baleta “ni sa ka talei [e Matana] na tamata“ (Vunau kei na Veiyalayalati 18:10).

iTuvatuva Nei Tamada

Ena matabose taumada, a vakaraitaka vei ira na Luvena vakayalo na Tamada Vakalomalagi na Nona ituvatuva me baleta na nodra itosotoso tawamudu kei na marau. A tukuna vei keda ni na talai keda ki vuravura me vakadinadinataki keda, me raica kevaka eda na talairawarawa Vua ka da rawata me da “raica se ra na muria se sega na veika kece sa vakarota vei ira na Turaga na nodra Kalou“ (raica na Eparaama 3:24–26).

A sa kaya ko Koya: “Ko cei me’u tala? A sa sauma e dua sa vaka na Luve ni Tamata: Koi au oqo, mo ni talai au. A sa kaya e dua tale: Koi au oqo; mo ni talai au. A sa vosa na Turaga ka kaya: Au na talai koya sa bole e liu.

“A sa cudru sara na kena ikarua, ia mai na siga ko ya sa lewevuqa sa muri koya” (Eparaama 3:27–28).

E dua ga na ituvatuva a vakaraitaki—na ituvatuva nei Tamana. A sega ni taroga na Tamada Vakalomalagi na taro, “Na cava meda cakava?“ A sega ni vakasaqara na nanuma eso, kerea na vakatutu, se taroga na vakasama. Na inaki ni Nona taro e vakatabakidua ki vua e dodonu me talai mai me vakadavori kina na iwalewale kei na ivakarau ni Nona ituvatuva.

vuravura kei na matanisiga, vula, kei na kalokalo

A sega ni vakaraitaka o Lusefa e dua na ituvatuva ka ra a sega ni duavata kina na lewevuqa era a vakaitavi ena matabose taumada. O koya e a vakaduiduile! A segata o koya me vakarusa na galala ni digidigi ni tamata, a vakasevi sobu, ka “yaco me ko Setani, na tevoro, na tama ni veika lasu kecega, me vakaisini ira ka vakamatabokotaka na tamata, ka vakabobulataki ira me vaka na lomana“ (raica na Mosese 4:1, 3–4). Na dokadoka, qaciqacia, kei na kocokoco e vakauqeti koya me vorata na ituvatuva ni Tamada.

e dua na cauravou, o Jisu Karisito, kei na yavu ni veivakabulai

Na iTuvatuva nei Tamada kei na Kosipeli ni iVakabula

Na ituvatuva e vakamacalataka na cakacaka nei Tamada kei na Luvena me rawati kina na veivakalougatataki ni bula tawamudu vei ira kece na kawatamata.

Na kosipeli i Jisu Karisito sai koya na sala eda ciqoma kina na veivakalougatataki e yalataki tu ena ituvatuva ni Kalou, o ya na ivunau, ivakavuvuli, cakacaka vakalotu, kei na veiyalayalati sa dodonu me da vakabauta ka muria. “Ni sa sega sara e dua tale na yaca sa soli e ruku i lomalagi, ko Jisu Karisito ga oqo ka me ra vakabulai kina na tamata” (2 Nifai 25:20). E dina sara, na Turaga ko Jisu Karisito, “na sala, kei na vu-ni-dina, kei na vu-ni-bula, sa sega ni torovi [Tamana] walega e dua na tamata, ena [Vukuna] ga” (Joni 14:6, vakaikuritaki

ivola vata kei na ituvatuva ni veivakabulai e droinitaki tu e loma

iTutu ni iTuvatuva ena iVola i Momani

Eda vulica na dina bibi ena noda raica ka vulica na vuqa na itutu duidui me baleta na ituvatuva nei Tamada ena iVola i Momani: E Dua Tale na iVakadinadina kei Jisu Karisito. Me vaka beka oqo, vakasamataka na ivakaraitaki digitaki eso oqo ni ulutaga:

”Na nona ituvatuva loloma na Dauniveibuli cecere” (2 Nifai 9:6).
“Na nona ituvatuva na noda Kalou“ (2 Nifai 9:13).
“Na yavu ni veivakabulai“ (Jeromi 1:2; Alama 24:14).
“Na ituvatuva ni veivueti“ (Alama 12:25, 26, 30, 32, 33; 42:11, 13).
“Na ituvatuva ni veivakalesuimai“ (Alama 41:2).
“Na ituvatuva ni marau“ (Alama 42:16).
“Na ituvatuva cecere ni loloma“ (Alama 42:31).

Na itutu yadua oqo ena vukei keda meda kila vakavinaka cake na yalayala talei ni ituvatuva nei Tamada ka vakabulabulataka na noda rai me baleta na inaki kei na ibalebale ni noda bula vakayago oqo.

Sa dina sara, na ulutaga dau vakayagataki vakawasoma me baleta na ituvatuva ni Kalou ena iVola i Momani (“na ituvatuva ni veivueti“) e vakanamata ki na veivueti mai na ivalavala ca kei na mate e rawa mai na Veisorovaki i Jisu Karisito (raica na Alama 12:25; 33:22).

Sa Vakarau tu na Kena Sala.

E dodonu me vakasinaiti na yaloda ena vakavinavinaka ni da vakasamataka na ituvatuva cecere ni Kalou. Na kilai ni Nona ituvatuva e vakarautaka na rai talei, vakabulabulataka na noda reki, ka vaqaqacotaki keda meda vorata rawa na noda bolebole kei na veika dredre.

Sa gadreva tu na Tamada Vakalomalagi meda lesu yani Vua ki vale. E sureta ka yalataka na veivakalougatataki, ia ena sega vakadua ni vakasaurarataka, surevaka, se cikevaka na noda vakayagataka na galala ni digidigi savasava a solia vei keda o Koya. Sa dodonu meda cakacaka ka digitaka meda lesu Vua ena noda muria na nona ivakaraitaki na Luvena Lomani.

“Sa vakarautaki tu na sala, ia kevaka eda rai yani eda na bula ka sega ni mudu” (Alama 37:46; vakaikuritaki).

Au vakadinadinataka ena reki ni o Tamada Vakalomalagi e vakavuna na ituvatuva vakalou me baleti ira na Luvena. Ko Jisu Karisito sa noda i Vakabula ka Dauveivueti. Niu dua vei ira na Nona iApositolo ni gauna oqo, au vakadinadinataka ni sai Koya dina “na sala, na vu ni dina, kei na vu ni bula” (Joni 14:6; vakamatatataki).