Ko Hono Toʻo Kiate Kita ʻa e Huafa ʻo Sīsū Kalaisí

ʻOku tau lava ʻo fakatokangaʻi ha meʻa faitatau ʻe nima ki he founga ʻa ia ʻoku tau toʻo ai kiate kitautolu ʻa e huafa ʻo Sīsū Kalaisí. …

Ko e ʻuluaki faitataú ko e ʻiloʻangá. … ʻI he taimi ʻoku tau toʻo ai kiate kitautolu ʻa e huafa ʻo Sīsū Kalaisí, ʻoku tau fakafehokotaki hotau hingoá ki Hono huafá. ʻOku ʻiloʻi fakataha kitautolu mo Ia. …

Ko ha faitatau ʻe taha ʻoku felāveʻi vāofi mo e ʻiloʻangá—ko e manatú. … Kia kitautolú, ʻoku tokoni ʻa e maʻu ʻo e sākalamēnití ʻi he uike kotoa pē ke tau manatu kia Sīsū Kalaisi ʻi he kotoa ʻo e uiké. …

… Naʻa mo e taimi ʻoku tau femoʻuekina ai ʻi ha ngaahi meʻa kehé, ʻoku tau kei manatu pē kiate Ia, ʻo hangē ko ʻetau manatuʻi hotau hingoá, tatau ai pē pe ko e hā ʻa e meʻa kehe ʻoku tau tokanga taha ki aí.

Ko e faitatau hono tolú, ʻoku tupu ia mei he manatuʻi ʻa e meʻa kuo fai ʻe he Fakamoʻuí maʻatautolú—ko e faʻifaʻitaki. … Kia kitautolú, ko e lahi ange hono ʻiloʻi kitautolu mo Sīsū Kalaisí pea tau manatu kiate Iá, ko e lahi ange ia ʻetau fie hoko ʻo tatau mo Iá. …

ʻOku taki kitautolu ʻe he faʻifaʻitaki kia Sīsū Kalaisí ki ha faitatau hono fā—ke fenāpasi mo ʻEne ngaahi taumuʻá. ʻOku tau kau fakataha mo Ia ʻi Heʻene ngāué. …

… ʻOku taki kitautolu ʻe hono fakahoko ʻo e ngaahi meʻa ʻe fā ko ʻení ki ha faitatau hono nima—ko e fakamālohiá. ʻOku tau maʻu ʻa e mālohi mo e ngaahi tāpuaki ʻa e ʻOtuá ʻi heʻetau moʻuí. …

ʻI heʻetau fakahoko ʻa e ngaahi fuakava lahi ange mo e ʻOtuá, ʻoku tau toʻo kakato ange ai kiate kitautolu ʻa e huafa ʻo Sīsū Kalaisí. Ko hono olá, ʻoku tāpuakiʻi kitautolu ʻe he ʻOtuá ʻaki Hono mālohí ʻo lahi ange. …

… Haʻu ki heʻetau Tamai Hēvaní. Toʻo kiate kimoutolu ʻa e huafa ʻo Sīsū Kalaisí. … Te ke hoko ko ha tokotaha maʻu-tofiʻa kuo hakeakiʻi ʻi he puleʻanga ʻo ʻetau Tamai ʻi Hēvaní, ko ha kaungā ʻea-hoko mo Hono ʻUluaki ʻAló, ko hotau Fakamoʻui mo e Huhuʻi ʻofeiná.