Fakataha ʻo e Pongipongi Tokonakí
Fakafenāpasi Ho Lotó kia Sīsū Kalaisi: Ko e Meʻafoaki Toputapu ʻo e Mūsika ʻa e Palaimelí
Ngaahi Konga Fakamatalá
Palāsila
ʻOtu Filipainí
USA
Kuó u maʻu ʻa e fiefia ʻi he fetuʻutaki mo e kaungā Kāingalotu kehé ʻo fakafou ʻi he lea fakafonua ʻoku ngāue ʻaki ʻe he mūsika toputapú. Pea fakafou ʻi he ngaahi hiva faingofua ʻa e Palaimelí, kuo ngāue ʻa e Laumālie Māʻoniʻoní ʻo ope atu ʻi he ngaahi fakangatangata ʻo e lea fakafonuá pea malava ke u ongoʻi ʻEne fakahinohinó. …
… Ko e mūsika ʻa e Palaimelí ʻa e taha ʻo e founga fakaʻofoʻofa taha ʻa e ʻOtuá ki hono tōkaki mo fakatupulaki e fakamoʻoní ʻi he loto ʻo e kau ākonga iiki taha ʻa e Fakamoʻuí. …
… Kuo hoko maʻu pē mūsiká ko ha konga mahuʻinga ia ki hono akoʻi ʻo e ongoongoleleí ki he fānaú. ʻOku lava ke hoko e ngaahi hiva Palaimelí ko e ʻuluaki lea fakalaumālie ia ʻa e fānaú koeʻuhí ʻoku hanga ʻe honau fasi faingofua, mo fakangalongataʻá ʻo fakahaaʻi mahino e ngaahi moʻoni ʻo e ongoongoleleí. …
ʻOku lava ke toe hoko e ngaahi hiva Palaimelí ko ha meʻangāue mālohi ki hono akoʻi ʻo e tokāteliné. ʻOku ʻi ai ha ngaahi hiva ʻoku nau fakamatalaʻi e ngaahi talanoa ki he moʻui mo e ngāue ʻa e Fakamoʻuí. ʻOku ʻi ai ha ngaahi hiva kehe ʻoku nau akoʻi Hono ngaahi ʻulungāngá, hangē ko ʻEne tuí, ʻEne ʻamanaki leleí, mo ʻEne ʻofa haohaoá. Pea ʻoku fakamoʻoni e ngaahi hiva toputapu tahá ki Heʻene Fakalelei taʻefakangatangatá pea mo e ʻofa ʻoku tafe mālohi mai mei he ngāue ko ia ʻo e fakamoʻuí. …
… ʻOku ʻi ai ha mālohi ʻo ha foʻi hiva naʻe ako he taʻu onó ke nofo ʻiate kitautolu—pea lava ke tokoni mai ʻi ha lauitaʻu ʻamui ange ʻi he ngaahi taimi hono fai ha filí, ʻahiʻahí, mamahí, pe fiefiá. …
… ʻOku malava ke ngāue ʻaki ʻe he Laumālié e mūsiká ke tohitongi ai e ngaahi moʻoni taʻengatá ki honau loto pelepelengesí. Pea ʻe aʻu ki ha taimi ʻe lava ke fili e fānaú ke fakafenāpasi honau lotó mo ʻenau moʻuí kia Sīsū Kalaisi ʻaki hono fakahoko mo tauhi e ngaahi fuakava toputapu mo Iá. …
Siʻi ngaahi kaungāmeʻa ʻofeina, ʻoku ou fakamoʻoni ʻoku akoʻi ʻe he ngaahi hiva ʻa e Palaimelí ha ngaahi moʻoni taʻengata mo e tokāteline ʻoku tākiekina ai kitautolu kia Sīsū Kalaisi mo ʻEne ongoongoleleí.