Kau Palōfita ʻa e ʻOtuá

Naʻe fakamoʻoniʻi ʻe he ʻEikí ki he fefine Sunemí ko ʻIlaisá ko ha palōfita ia ʻa e ʻOtuá, pea naʻe ngāue ʻa e fefiné ʻaki ʻene talitali lelei ia ki hono falé.

Te tau lava foki mo kitautolu ʻo maʻu ha fakamoʻoni fakataautaha ki he kau palōfita ʻa e ʻOtuá he ʻahó ni mo fakaava hotau lotó mo e ʻatamaí—ʻa hotau falé—ki he pōpoaki ʻa ʻetau Tamai Hēvaní maʻatautolu ʻi he ngaahi ʻaho kimui ní. …

Ko e hā ʻa e palōfita? Ko e palōfitá ko ha tangata ia kuo ui ʻe he ʻOtuá ke lea Maʻana. …

Ko e kau palōfitá ko ha kau tangata kikite mo ha kau tangata maʻu fakahā. ʻOku ʻuhinga ia te nau lava ʻo sio ki he meʻa ʻoku ʻikai lava ke sio ki ai ʻa e niʻihi kehé, pea te nau lava ʻo kikiteʻi ʻa e ngaahi meʻa ʻe hoko ʻi he kahaʻú. … ʻOku maʻu ʻe he kau palōfitá ʻa e ngaahi fekau mo e ngaahi fakahā mei he ʻEikí. …

ʻOku malanga ʻaki foki ʻe he kau palōfitá ʻa e ongoongoleleí pea ko e kau faiako mo e kau talafekau fakalaumālie kinautolu ʻa e ʻOtuá ki he tokotaha kotoa pē ʻi he māmaní. …

ʻOku fakamoʻoni ʻa e kau palōfitá kia Kalaisi—ki Heʻene moʻuí, ʻEne ngāué, mo Hono tuʻunga faka-ʻOtuá. …

Naʻe akoʻi mai ʻe he fefine Sunemí, te tau lava ʻo maʻu ʻa e fakamoʻoni ko iá ʻo fakafou ʻi he Laumālie Māʻoniʻoní. ʻOku ou palōmesi atu ko ʻetau ʻiloʻi pē ko e kau pani kinautolu ʻo e ʻOtuá, ʻe faingofua ange ʻetau moʻuí neongo e ngaahi faingataʻa ʻoku tau fekuki mo iá, koeʻuhí he te tau talangofua ki honau leʻó ʻi he loto-falala, tui, mo e ʻamanaki lelei. ʻOku mahuʻinga ʻa e fanongo mo talangofua ki he leʻo ʻo e palōfitá, ki he pīkitai ki he meʻa lelei kotoa pē kae ʻoua kuo hoko ʻa e Hāʻele ʻAnga Ua Mai ʻa hotau Fakamoʻuí. …

ʻOku ou houngaʻia ʻi he tataki mo e ngaahi ngāue fakatapui ʻa e kau palōfita moʻuí. … Ko e ʻEikí maʻu pē te Ne fili ʻEne kau tamaioʻeikí.