ʻOku Fakavaveʻi ʻe he ʻEikí ʻa ʻEne Ngāué

ʻOku ʻi ai ha fakamoʻoni mahino ʻoku tupulaki ʻa e tui kia Sīsū Kalaisí ʻi hotau kuongá. ʻI he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, kuo ʻi ai ha tupulaki fakaofo ʻi he fakauluí. …

… ʻI hono fakavaveʻi ʻe he ʻEikí ʻEne ngāué, ʻoku totonu ke tau ʻofa, lehilehiʻi, mo tokoniʻi ʻa kinautolu ʻoku nau tali ʻEne ongoongoleleí. …

Kiate kimoutolu ʻoku foʻou pe toe maʻu ha tuí [ki he Siasí], ʻoku ʻi ai ha ngaahi faingataʻa te mou ala fehangahangai mo ia. Faʻa kātaki. …

ʻOku mahuʻinga hono maʻu ʻo e ngaahi ouaú mo e ngaahi fuakavá pea mo hono moʻui ʻaki ʻa e ngaahi fekaú. Tokanga taha ki he ngaahi fuakava ʻoku fiemaʻu ki he hakeakiʻí. …

Ko hono ako ʻo e tokāteline haohaoa ʻa Sīsū Kalaisí ko ha meʻa ia ʻoku fai ʻi hono kotoa ʻo e moʻuí, ʻi he fakatou mahino ʻa e tokāteliné mo e moʻui faka-Kalaisí. ʻOku ʻomi ʻe he ngaahi fuakava mahuʻingá ha faʻunga ʻoku tau fakamatalaʻi ko e hala ʻo e fuakavá. …

Kapau te ke fokotuʻu ha taumuʻa ke ke maʻu ʻi he moʻui taau ʻa e fuakava takitaha ʻoku fiemaʻu ki he hakeakiʻí, te ke ʻi he hala ʻoku fakatau ki he puleʻanga fakasilesitialé. Kuo pau ke tukutaha ʻetau tokangá ki he temipalé pea mo e ngaahi ouau ʻo e temipalé. …

ʻOku tau ongoʻi taʻefeʻunga kotoa pē ʻi heʻetau feinga ke hoko ʻo hangē ko Sīsū Kalaisí. ʻOku fakaʻatā kitautolu ʻe Heʻene Fakaleleí ke tau fakatomala fakaʻaho ʻi heʻetau tōnounoú. …

Kuo teʻeki ai ha taimi ʻe faingofua ai ʻa e muimui ki he Fakamoʻuí mo ʻEne tokāteliné mo e ngaahi akonakí ʻi ha māmani ʻoku moveuveu maʻu pē. … Ko e meʻa mālié ʻoku ʻi ai hotau kau palōfita moʻui ke ʻomi ʻa e fakahinohino ʻoku tau fiemaʻu pau ʻi hotau kuongá. …

… ʻOku ou ʻoatu ʻeku fakamoʻoni fakapapau ʻoku moʻui ʻa Sīsū Kalaisi, pea koeʻuhi ko ʻEne Fakaleleí, te tau lava ai ʻo fakataha mo Ia.