Ko e Fepoupouakí

ʻOku fiemaʻu ke tau fetokoniʻaki. Ko e ivi fakalangí ʻoku maʻu ia mei he uouangatahá, pea ko e ʻuhinga ia ʻoku fakataumuʻa ai ʻa Sētane ke fakamāvahevaheʻi kitautolú.

Ko e meʻapangó, he ʻoku ʻi ai hatau niʻihi ʻoku ala faingataʻa e maʻulotú ʻi ha ngaahi ʻuhinga kehekehe. …

Ko ʻetau aʻusia ʻi he lotú ʻoku fakataumuʻa ia ke ne ʻomi ʻa e ngaahi fetuʻutaki mātuʻaki mahuʻinga mo e ʻEikí pea ʻiate kitautolu, ʻa ia ʻoku fuʻu fiemaʻu ki hotau tuʻunga lelei fakalaumālié mo fakaelotó. …

ʻOku māʻolunga mo māʻoniʻoni ange ʻa e ʻofa mo e tauhi faka-Kalaisí. …

… ʻOku tau hoko kotoa pē ko ha konga ʻo e fāmili ʻo e ʻOtuá, pea ʻokú Ne ʻofa ʻi Heʻene fānau kotoa pē. ʻOkú Ne finangalo ke ʻofa ʻEne fānaú kiate Ia pea ke nau feʻofaʻaki foki .

Ko e moʻui ʻa e Fakamoʻuí ko ha sīpinga ia ʻo e ʻofa, tānaki fakataha, mo e langaki moʻui ʻo aʻu pē ki he niʻihi naʻe fakamavaheʻi ʻe he sosaietí ko e kau liʻekina mo taʻemaʻá. Ko ʻEne sīpingá ko ha sīpinga ia ʻoku fekauʻi kitautolu ke tau muimui ki ai. …

Kuo pau ke ʻi ai ha ngaahi taimi ʻi heʻetau moʻuí te tau hoko ai ko e niʻihi ʻe fiemaʻu tokoni mo fakalotolahí. Tau tukupā he taimí ni ke tau fefakahokoʻaki maʻu pē ia ʻiate kitautolu. …

Kiate kimoutolu takitaha ʻoku mou ongoʻi kuo mou tōmui ʻi he lova ʻo e moʻuí ni, ʻi he fononga fakamatelie ko ʻení, kātaki ʻo hokohoko atu pē. Ko e Fakamoʻuí pē te Ne lava ʻo fakamāuʻi kakato ʻa e tuʻunga ʻoku totonu ke ke ʻi ai he taimi ní, pea ʻokú Ne manavaʻofa mo fakamaau totonu. …

Tokanga taha pē ki he Fakamoʻuí. KoIa ʻa hoʻo vaʻa ukameá. ʻOua naʻá ke tukuange Ia. ʻOku ou fakamoʻoni ʻokú Ne moʻui pea te ke lava ʻo falala kiate Ia. ʻOku ou fakamoʻoni foki ʻokú Ne poupouʻi koe.