Fakataha ʻo e Efiafi Tokonakí
Ko e ʻOfa Fakalelei ʻa Sīsū Kalaisí
Ngaahi Konga Fakamatalá
Talitha Cumi [Tālita Kiumi], tā fakatātā ʻa Eva Timothy
Kapau kuó ke fakahoko ha ngaahi angahala mamafa pea ʻokú ke kei ngāue ke fakatomala pe maʻu ʻa e holi ke fakatomala kakato pea ongoʻi e fiefia taʻemafakamatalaʻi ʻo e fakamolemolé, kātaki ʻo fakatokangaʻi ange ʻoku tatali atu ʻa e mana ko ʻení kiate koe. …
Ko e tafoki mei he angahalá, ʻo tafoki ki he ʻOtuá, pea fakamālohia hoʻo tui kia Sīsū Kalaisí, ko ha kamataʻanga fakaʻofoʻofa ia. ʻOku kau ʻi hono fakavaivaiʻi fakatōkilalo ho lotó ki he ʻOtuá, ʻa hono fakahaaʻi hoʻo ngaahi angahala mamafá ki hoʻo pīsopé pe palesiteni fakakoló, ka ʻoku maʻu hoʻo fakamolemole kakató mei he Fakamoʻuí. …
Ko e holi ke foki moʻoni ki he ʻOtuá ʻoku ʻalu fakataha ia mo e fakapapau ke faitotonu kakato ki hoʻo Tamai Hēvaní, kiate koe, ko kinautolu naʻe fakamamahiʻí, pea mo hoʻo taki lakanga fakataulaʻeikí. …
ʻOku tataki koe ʻe hoʻo vilitakí ke ke fie fakaleleiʻi ʻa ia kuó ke maumauʻí. Ka ʻoku ʻi ai ha ngaahi meʻa ʻoku ʻikai ke ʻi ho mālohi ke fakaleleiʻí, ʻokú ke lotu fakamātoato, ʻe tokoniʻi ʻe he ʻEikí ʻo fakafou ʻi Heʻene ʻaloʻofá, ʻa kinautolu kuo mamahi ko e tupu mei hoʻo ngaahi tōʻongá. …
ʻI hoʻo fekumi ki he fakamolemole ʻa e ʻEikí, faʻa kātaki ʻi hoʻo tatali ki Heʻene tali kakató. …
Kiate koe kuó ke mamahi taʻetotonu ʻi he ngaahi angahala mamafa ʻa ha taha kehe, ʻoku ou fakaʻamu ke vahevahe mo koe ʻa e ʻofa mo e manavaʻofa ʻa e Fakamoʻuí, ʻEne fakafiemālié mo e melinó.
… ʻOku ou fakapapauʻi taʻeveiveiua atu, ʻoku ʻafioʻi mo ʻofa ʻa e Fakamoʻuí ʻiate koe. Tafoki kiate Ia. Ko Ia ho nongaʻangá mo e mālohingá; te Ne tuku mai ʻEne kau ʻāngeló ke nau poupouʻi hake koe.