Siviʻi mo Fakaivia ʻia Kalaisi

ʻI he kuohilí, naʻá ku feinga ke ako e fīsikí mo e fiká ʻi heʻeku kei ako ʻunivēsití. Naʻá ku ongoʻi lōmekina. … Naʻe kamata ke u fakakaukau ke u foʻi, ke u ako ki ha meʻa ʻoku faingofua angé.

Naʻá ku ongoʻi vaivai. ʻI heʻeku lotú, naʻá ku ongoʻi e fakapapau fakalongolongo ʻa e ʻEikí. Naʻá ku ongoʻi ʻEne folofola mai ki heʻeku fakakaukaú, “ʻOku ou siviʻi koe, ka ʻoku ou ʻiate koe foki.” …

Naʻá ku ako ko ʻeku faingataʻaʻia ko ia ʻi he fīsikí ko ha meʻaʻofa moʻoni ia mei he ʻEikí. Naʻá Ne akoʻi mai kiate au te Ne tokoni mai ke u lava ʻo fai e ngaahi meʻa ne ngali taʻemalavá ʻo kapau te u maʻu e tui te Ne ʻi ai ke tokoniʻi au. ʻI he meʻaʻofa ko ʻení, naʻe ngāue ai e ʻEikí ke siviʻi mo fakamālohia au.

… Ke siviʻi ha konga ukamea, ʻoku siviʻi hono ivi matuʻuakí. … ʻOku ʻikai ke ngāvaivai e ukameá ʻi hono siviʻí. Ko hono moʻoní, ʻoku hoko ia ko ha meʻa ʻe lava ʻo falala ki ai, ko ha meʻa ʻoku mālohi feʻunga ke ne fuesia ha kavenga mamafa ange. …

ʻI heʻetau hokohoko atu ke maʻu e tui kia Sīsū Kalaisí—ʻo aʻu ki he taimi ʻoku ngali taʻemalava ai e ngaahi meʻá—ʻoku tau hoko leva ʻo mālohi fakalaumālie ange. …

Tuʻunga ʻi he Fakalelei nāunauʻia ʻa Sīsū Kalaisí, ʻokú Ne lava ai ʻo fakaivia kitautolu ʻi hotau ngaahi taimi faingataʻá. …

… Mahalo ʻe hoko fakalongolongo mai ia, ʻo fakafou ʻi he ngaahi ʻahiʻahi ʻo e moʻui fakafāmilí. Mahalo ʻe hoko mai ia ʻi he mahamahakí pe siva e ʻamanakí pe mamahi ʻi ha molé pe taʻelatá.

ʻOku ou fakamoʻoni ko e ngaahi momeniti pehení ʻoku ʻikai ko ha fakamoʻoni ia kuo liʻaki koe ʻe he ʻEikí. Ka, ko ha fakamoʻoni ia ʻokú Ne ʻofa feʻunga ʻiate koe ke fakaleleiʻi mo fakaivia koe. ʻOkú Ne ngaohi koe ke ke mālohi feʻunga ke ke fuesia e mafatukituki ʻo e moʻui taʻengatá.