Sio ki he ʻOtuá pea Moʻui

Ko e moʻoni ko e faleʻi ke “sio ki he ʻOtuá pea moʻuí” ʻoku ʻi ai hono ʻuhinga maʻatautolu ʻo ʻikai ngata pē ʻi he ʻitānití ka ʻokú ne tākiekina ʻa e ʻulungaanga mo e tuʻunga ʻo ʻetau moʻui fakamatelié. …

ʻOku ʻikai ha talaʻofa ʻe toutou lea ʻaki ʻi he Tohi ʻa Molomoná ʻo laka ange heni: “ʻE fakatatau ki hoʻomou tauhi ʻeku ngaahi fekaú, te mou tuʻumālie ʻi he fonuá; ka kapau ʻe ʻikai te mou tauhi ʻeku ngaahi fekaú, ʻe motuhi atu ʻa kimoutolu mei hoku ʻaó.” … Naʻe ʻuhinga ʻa e “tuʻumālié” ki he fiefia ʻi he tataki mo e ngaahi tāpuaki ʻo e langí ʻi heʻenau moʻuí. … Naʻe kau ʻi he “tuʻumālié” ʻa e malava ke ikunaʻi ʻa e faingataʻá mo e ʻahiʻahí. …

… ʻOku maʻu e ngaahi fekau mo e faleʻi ʻa e ʻOtuá ʻi he folofolá pea mo e lea ʻo ʻEne kau tamaioʻeikí. ʻOku hoko e ngaahi tefitoʻi moʻoni mo e tuʻunga moʻui ʻoku fakamatalaʻi ʻi he “Ko e Fāmilí: Ko ha Fanongonongo ki Māmaní” ko ha sīpinga mahuʻinga. Ko ha sīpinga ʻe taha ko e fakahinohino ʻoku maʻu ʻi he kiʻi tohi Ki Hono Fakamālohia ʻo e Toʻu Tupú. …

ʻOku fekumi e kakaí ʻi ha ngaahi maʻuʻanga tokoni kehekehe ke maʻu mei ai ha taumuʻa, fiefia mo e tokoni. Ko e tokolahi tahá ʻoku nau “tokanga ki he ngaahi meʻa [ʻoku] ʻikai mahuʻingá.” … ʻI heʻetau vakai ki he ʻOtuá, te tau lava ʻo maʻu ʻa e nongá ʻi he faingataʻá, pea ʻe lava ke kei tupulaki pē ʻetau tuí ʻo aʻu pē ki he taimi ʻo e veiveiuá mo e faingataʻa fakalaumālié. Te tau lava ʻo maʻu e mālohí lolotonga e foua e fakafepakí mo e māvahevahé. Te tau lava ʻo maʻu ha mahino ki he tuʻunga ʻoku totonu ke ʻi ai e moʻuí mo e tuʻunga moʻoni ʻoku lolotonga ʻi aí. …

ʻOku ʻuhinga ʻa e sio ki he ʻOtuá ʻoku ʻikai ko ha taha pē ia ʻo e ngaahi meʻa ʻoku tau fakamuʻomuʻá; ka ko e Tokotaha Ia ʻoku tau fakamuʻomuʻa tahá.