Fakafonu ʻAki ʻa e Anga-fakamaʻumaʻu

Naʻe folofola e ʻEikí ʻo pehē: …

“Pea ʻe ʻikai lava ha taha ke tokoni ʻi he ngāué ni ʻo kapau ʻe ʻikai te ne loto-fakatōkilalo pea fonu ʻi he ʻofá, ʻo maʻu ʻa e tuí, ʻamanaki leleí, mo e manavaʻofá, pea anga fakamaʻumaʻu ʻi he meʻa kotoa pē ʻa ia ʻe fakafalala kiate ia ke ne tauhí.”

‘Oku fakamanatu mai ʻe he fakahinohino ʻa e Fakamoʻuí, ʻoku lekooti ʻi he fakahā toputapu ko ʻení, ko e anga-fakamaʻumaʻú ko ha fakaivia mahuʻinga ia ki ha fakavaʻe mālohi ʻia Sīsū Kalaisí. …

ʻI he ngaahi ʻulungaanga ʻokú ne fakafōtunga ʻa e kau ākonga moʻoni ʻo Kalaisí, ʻoku makehe pē ʻa e anga-fakamaʻumaʻú ko ha sīpinga ʻo e Fakamoʻuí Tonu, ko ha fua mahuʻinga ʻo e Laumālié, ʻoku lava ke maʻu ʻe he tokotaha kotoa pē ʻoku loto-fiemālie ke tākiekina fakalangi iá. …

Ko e kau ākonga ʻo Kalaisi ʻoku nau fāifeinga ke tanumaki ʻa e ʻulungaanga faka-Kalaisi ko ʻení ʻoku fakautuutu ʻenau loto-fakatōkilaló mo e fonu ʻi he ʻofá. …

… ʻOku fakaafeʻi kitautolu ʻe he ongoongolelei ʻo Sīsū Kalaisí ke tau fakamālohia ʻa e ʻulungaanga ko ʻení tautautefito ʻi he taimi faingataʻá, he ko e taimi pehení ʻoku toki fakahaaʻi ai e ʻulungaanga totonu ʻo e fakafoʻituituí. …

Naʻe fakaʻilongaʻi e ngāue ʻa e Fakamoʻuí ʻi he māmaní ʻaki e anga-fakamaʻumaʻu ʻi he kihiʻi konga kotoa pē ʻo Hono ʻulungāngá. …

Naʻe mamahi ʻa Sīsū Kalaisi, ko e tokotaha mālohi tahá, maʻatautolu kae ʻoua kuo tafe Hono taʻataʻá mei he ava kotoa ʻo Hono kilí, ka naʻe ʻikai ʻaupito ke Ne tuku ke tākiekina ʻe he ʻitá Hono finangaló, pe te Ne teitei folofola ʻaki ha lea fefeka, fakaʻita pe taʻe-feʻunga, ʻo aʻu pē ki he uhouhonga ʻo ʻEne faingataʻaʻiá. …

… ʻI heʻetau fāifeinga ʻi he tui mo e faivelenga ke lalanga ʻa e anga-fakamaʻumaʻú ki heʻetau ngaahi angafaí mo e leá, ʻoku ou fakamoʻoni te tau fakamālohia mo fakamaʻunga ʻetau moʻuí ke toe malu ange ʻi he fakavaʻe pau ʻo hotau Huhuʻí.