Fakataha ʻo e Hoʻatā Tokonakí
Ko e Fanongonongo Fekauʻaki mo e Fāmilí—Pōpoaki mei he ʻOtuá
Ngaahi Konga Fakamatalá
ʻIunaiteti Siteiti ʻo ʻAmeliká
ʻOku ou saiʻia ʻi he fanongonongo fekauʻaki mo e fāmilí. … ʻOku ʻi ai ha tupuʻanga fakalangi ʻo e fanongonongó, ko ia ai kuo pau ke tau tauhi ia ʻi he ʻaʻapa ʻoku taau mo e ngaahi folofola mei he ʻOtuá. …
ʻI he taimi naʻe lau aí, naʻe ʻikai fenāpasi ʻa e fanongonongó mo e fakakaukau ʻa ha tokolahi ʻi he māmaní. ʻIkai ʻi he taimi ko iá. ʻIkai ʻi he taimí ni. ʻOku ʻi ai ha niʻihi ʻoku nau mamahi ʻi he fanongonongo fekauʻaki mo e fāmilí, nofo-malí, mo e tuʻunga tangata pe fefiné. ʻOku fokotuʻu mai ʻe ha niʻihi ke toʻo, toe vakaiʻi, pe naʻa mo tukunoaʻi ʻa e fanongonongó.
Ko e fanongonongo ko ʻeni fekauʻaki mo e fāmilí, hangē ko e fakamatala ʻa Palesiteni Hingikelií, ko e tokāteliné ia kāinga. ʻOku ʻikai tō ki tuʻa ʻa e ngaahi tefitoʻi moʻoní ka ʻoku nau fenāpasi haohaoa mo e founga ʻa e ʻEikí mo ʻEne hala ʻo e fuakavá. Naʻe fakahā ʻa e ngaahi akonaki ʻo e fanongonongó ʻe hotau ʻEiki ko Sīsū Kalaisí ki Heʻene kau ʻAposetolo ʻi he kuonga muʻá mo e lolotongá ni. …
Kiate kinautolu ʻoku loto-hohaʻá, ʻiloʻi ko e fānau koe ʻa ha mātuʻa fakalangi, ʻokú ke hoko ko ha konga ʻo e fāmili ʻo hoʻo Tamai Hēvaní. ʻOku ʻikai ha taha te ne ʻiloʻi lelei ange koe pe tokanga lahi ange kiate koe ʻo hangē ko Iá. Tafoki kiate Ia, fakahā ho lotó kiate Ia; falala kiate Ia mo ʻEne ngaahi talaʻofá. …
ʻOku tau maʻu ʻi he fanongonongo ki he fāmilí:
“ʻOku haʻisia ai ʻa e ngaahi tamaí mo e ngaahi faʻeé ke nau fetokoniʻaki ko ha kaungā-ngāue tuʻunga tatau.”
Ko etataú ko ha foʻi lea mahuʻinga. …
ʻI heʻetau moʻui ʻo hanga taha hotau matá ki hono fakalangilangiʻi ʻo e ʻOtuá, ʻoku tau fefakaʻapaʻapaʻaki mo fepoupouʻaki ai. …
Kuo ʻomi ʻe heʻetau Tamai Hēvaní ʻa e fanongonongo fekauʻaki mo e fāmilí ke tokoni ʻi hono tataki kitautolu ki ʻapi kiate Iá, ke tokoni ke tau ako pea fakafonu kitautolu ʻaki ʻa e ʻofá, mālohí, taumuʻá, mo e mahino taʻengatá.