Ta eo Eļan̄n̄e Enaaj Pen Aō Kōm̧m̧an M̧ōtta?

Iiō in ke ikar ukōt jikuuļ eo aō n̄an juon jikuuļ kāāl, ikar lukkuun jan̄ kōnke ikar jab kōņaan em̧m̧akūt jān ajri ro m̧ōtta m̧okta. Ikar jiron̄ eō make bwe ij jāmin naaj kōņaan jikuuļ eo aō ekāāl im ikar en̄jake inaaj kaarmejete ajri ro m̧ōtta m̧okta eļan̄n̄e inaaj kōm̧m̧an m̧ōtta ajri kāāl.

Aolepān week eo, ilakkar kōjememeik meja. Ikar jab kōņaan kōnono n̄an jabdewōt. Ekar wōr jet leddik ro rekar kajjieon̄ in kōnono n̄an n̄a, bōtaab ikar jab ļōmņak in kōm̧m̧an jem̧jerā ippāer.

Juon raan, ikar kile bwe ikar jab kōņaan make iaaō. Ikar loe bwe ikar aikuj in ļapļo̧k aō kōppeļļo̧k būruwō. Ilo iien eo ij alooj jet pija ko kōn Jisōs Kraist, ikar im̧we n̄an ļōmņak kōn wāween An kar kōm̧m̧an m̧ōttan. Aaet ekar jab kam̧ōņōņō aolep, ak enan̄in aolep armej, Ekar ukōt mour ko aer.

Kōnke waanjon̄ok eo an Kraist, ikar pepe n̄an kajjieon̄ kōm̧m̧an m̧ōttā ko rekāāl, jekdo̧o̧ņ mijak eo ippa. Ikar mijak kōnke ikar ejjokkook im inepata bwe armej renaaj kōm̧m̧an kōjak kōn n̄a. Bōtaab ekar wōr ļōmņak in ippa, “Ewōr juon Jemam̧ Ilan̄ eo enaaj jipan̄ eok. Men̄e eļan̄n̄e aolep rej jab bōk eok, Enaaj pād ijeņ.”

Kiiō ilo aō reilikļo̧k, imaron̄ loe bwe juon M̧ōtta eo ej jāmin etal jān n̄a ilo iien jab eo ekar Rilo̧mo̧o̧r eo. Kōnke en̄jake ko reppen ikar jelm̧ai, ekar ļap aō epaake E. Ekar lukkuun iakwe kōj bwe E ekar letok mour eo An make kōn kōj. Im E ekar letok n̄an kōj jeje ko rekwojarjar bwe jen maron̄ jeļā wāween ad erom āinwōt E. Aolep iien komaron̄ kile Jisōs Kraist bwe en Mōttam̧.