Mennin Aorōk ko Ņooji

Ilo Katak im Bujen Ko 95, Irooj ekar inepata jidik ippān Armej ro Rekwojarjar. Ekar m̧okta kakien er n̄an kalōk juon tampeļ (lale Katak im Bujen Ko 88:119)—ak ļalem allōn̄ tokālik, rekar jab kōm̧m̧ane jabdewōt men kake.

Menin ejjab āinwōt rainin. Kalōk tampeļ ko ej juon jibadbad eļap n̄an kōj! Ak Irooj ekar jan̄in kwaļo̧k eļap kōn tampeļ ilo 1833 eo. Armej ro rekwojarjar rekar jan̄in lukkuun kam̧m̧oolol ewi jon̄an aorōkier.

Kōn menin ta eo Irooj ej kōm̧m̧ane? Ekar leļo̧k aolepān meļeļe kōn etke Ekar kōņaan bwe ren kalōk juon tampeļ (lale Katak im Bujen Ko 95:8–17). Ekar bar kōmeļeļeiki ta eo Ekar ba m̧okta, leļo̧k kōlmenļo̧kjeņ ko rekāāl im kwaļo̧k aorōk in kalōk juon tampeļ.

Ilo 1834 eo, Armej ro Rekwojarjar rekar kōlmenļo̧kjeņ etke Irooj ekar kōtļo̧k an rikōjdat ro aer kalbuuji er im likwarkwar er jān jikin eo aer make. Kōn Rikanaan Josep Smith, Irooj ekar ekar letok ruo uwaak ko.

Juon, Irooj ekar ba E jet iien ej kōtļo̧k an eo ejerawiwi kōm̧m̧ane men ko renana “bwe ren maron̄ koobrak n̄an aolepān jon̄an nana ko aer,” (Katak im Bujen Ko 103:3). Alma ej likūt wāween in: “E ej kōtļo̧k bwe ren kōm̧m̧ane [men ko renana] … bwe ekajet ko Enaaj kōjerbali ioer ilo an illu bwe ren maron̄ jejjet” (Alma 14:11).

Un eo juon Irooj ekar leļo̧k n̄an Armej ro Rekwojarjar kōn inepata ko aer ekar bōlen pen ļo̧k jidik n̄an ron̄jake: “Im bwe ro rej kūr etaer n̄an etņake Eta ren maron̄ bōk kauwe ium̧win jidik tōrean … kōnke rekar jab lukkuun eo̧ron̄i aolep kain̄i im kien ko me Iaar liļo̧k n̄an er.” (Katak im Bujen Ko 103:4).

Menin ejjab meļeļein bwe Anij ekar kōwāppen rikōjdat ro aer renana im m̧akūtkūt ko aer ejjab ekkar. Ekar jab “im̧we” rikōm̧m̧an jorrāān ro n̄an jodiki Armej ro Rekwojarjar; Ekar kōtļo̧k aer kōjerbal anemkwoj eo aer im jab bōbrae n̄an kabōjrak er.

Ak Irooj ekar kallim̧ur wōt bwe eļan̄n̄e Armej ro Rekwojarjar renaaj pokake, “rejamin naaj bōjrak n̄an anjo̧” (Katak im Bujen Ko 103:7).

Komaron̄ bwilōn̄ etke priesthood eo eutiejļo̧k kar ņaetan ālkin Melkisedek. Irooj ekar kōmeļeļeiki kōn Rikanaan Josep Smith:

“M̧okta jān raan ko an [Melkisedek] kar ņa etan Priesthood eo Ekwojarjar, ālkin kar an Nejin Anij. Bōtaab kōn kautiej ak jeļā ņae etan Armej eo Eutiej tata, n̄an jab kōmakijkij eliji Etan, Kabun̄ eo, ilo raan ko etto, kar ņa etan priesthood eo ālkin Melkisidek, ak Priesthood eo an Melkisidek” (Katak im Bujen Ko 107:3–4).

Ļōmņak kōn ewi emakijkij ad ba “Melkisedek Priesthood” ilo kweilo̧k ko an Kabun̄ in im kōnono ko ad. Kiiō pijaikļo̧k, ijjeļo̧kin “Melkisedek,” jekar ba “Nejin Anij” aolep iien. Enaaj jino āinwōt ejjeļo̧k kautiej. Irooj ekar kōņaan bōbrae men jab in.