Kōjeraam̧m̧an ko an Mālim im Kajoor eo an Priesthood

Jisōs Kraist ej jeban Kabun̄ in. Kabun̄ in ej kein jerbal eo E ekar kōm̧anm̧ane n̄an kōtōprak jerbal eo aorōk kōn lo̧mo̧o̧ren armej. Kōn Kabun̄ in, E emaron̄:

• Kwaļo̧k gospel eo An ipeļaakin laļ in.

• Leļo̧k peptaij im aolep bujen ko jet—aaet ilo juon iaļ n̄an aelōn̄ in selestial eo An.

• Kobaik baam̧le ko n̄an indeeo.

• Letok mennin leļo̧k ko an lo̧mo̧o̧r, aaet n̄an ro otemjej rekar mej ak jab būki.

• Jerbal in jipan̄ n̄an aikuj in kanniōk ko an ajri ro nejin Anij kiiō.

Jisōs ej Katakin Meri, jān Dan Burr

N̄an kōtōprak jibadbad kein reļļap, im n̄an m̧aanjabpopo n̄an ro̧o̧ltok eo an Rilo̧mo̧o̧r eo, Kabun̄ eo ej aikuji tōl eo ejjeļo̧k jem̧ļo̧kin an Anij, mālim, im kajoor eo. Kabun̄ in ej “kabun̄ eo m̧ool im mour” (Katak im Bujen Ko 1:30) kōnke Kraist ej korļo̧k e kōn ritōl ro An im kajoor kōn priesthood eo An.

Eļan̄n̄e ejjab priesthood eo ekwojarjar, Kabun̄ eo enaaj erom juon doulul ejjeļo̧k men ko an kabun̄ ie āinwōt ko jet, rej kōm̧m̧an em̧m̧an ilo laļ in ak ejjeļo̧k kajoor n̄an kōtōprak jibadbad eo an n̄an kōpooje ajri ro nejin Anij n̄an lan̄lōn̄eo an mour indeeo im̧aan Mejān. Kōn priesthood in, im ki ko n̄an tōl jerbal eo an priesthood in, ewōr jim̧or mālim im laajrak eo ilo Kabun̄ in.

“Ilo Kabun̄ in, aolep mālim an priesthood eo rej kōjerbali ium̧win tōl eo an ro me rej kabwijer ki ko an priesthood eo.

“Em̧m̧aan ro rōrreo uwaan Kabun̄ in rej bōk mālim eo an priesthood eo kōn leļo̧k im ekkapit an priesthood eo n̄an opij ko an priesthood. Aolep membōr ro an Kabun̄ in remaron̄ kōjerbal mālim in ijjitōn̄ eo ilo aer kōjenolo̧k ak kappeik er n̄an jipan̄ ilo kōtōprak jerbal eo an Anij.”

Ke Bok in Mormon eo ekar ukook ilo 1829 eo, Irooj ekar jino likūt m̧ōņakjān eo an priesthood eo An ilo jikin. N̄an uwaake jar eo an Josep Smith im Oliver Cowdery kōn peptaij, Jon Ripeptaij eo ekar jerkakpeje ekar waļo̧kļo̧k im leļo̧k ioer Priesthood eo an Aron, eo ej “kabwijer kii ko an jerbal ko an enjeļ ro, im gospel in ukweļo̧k eo, im peptaij jān tulo̧k n̄an jeorļo̧k jerawiwi ko” (Katak im Bujen Ko 13:1). Kōn mālim in, Josep im Oliver rekar peptaiji doon im ro jet ke Kabun̄ in ekar lukkuun ejaak.

Ejjab etto ālkin, Rijilōk Pita eo etto, Jemes, im Jon rekar waļo̧kļo̧k im leļo̧k eo eutiejļo̧k ak Priesthood eo an Melkisedek, ekoba “kii ko an aelōn̄ in kiin̄ eo Aō, im juon tōre in bōk eddo an gospel eo n̄an … tarlep in iien ko!” (lale Katak im Bujen Ko 27:12–13; 128:20).

Bar jet mālim an priesthood eo rekar itok ke jilu rikanaan in etto ro, Moses, Elias, im Ilaija, rekar waļo̧ktok n̄an Josep im Oliver ilo Kirtland Tempeļ im leļo̧k ioer ki ko an aiintok Israel im kōn jerbal eo an tampeļ ko an Irooj (lale Katak im Bujen ko 110:11–16).

Ilo juon naan, jibadbad eo an mālim im kajoor eo an priesthood me Jisōs Kraist ekar kōjepļaaktok ej n̄an kōjeraam̧m̧an. Ej kōmaron̄ an aolep membōr ro an Kabun̄ in kōjerbale kajoor eo an Anij ilo jerbal im kōjeraam̧m̧an ro jet ilo Kabun̄ in, ilo m̧ōko, im ipeļaakin laļ in. Membōr ro rej kobaļo̧k ippān Rilo̧mo̧o̧r eo ilo kōtōprak jerbal in lo̧mo̧o̧r eo An im mour ijo eutiejtata, kōjerbale mennin letok ko rekwojarjar im kajoor eļļeļo̧k jān jon̄an maron̄ eo aer make n̄an jipan̄ aelōn̄ in kiin̄ eo an Anij eddōkļo̧k n̄an kobrak laļ in (lale Katak im Bujen Ko 65:2, 5–6).

Irooj ekar kōmeļeļeiki menin “priesthood in eļapļo̧k [Melkisedek] ej kōm̧akūtkūti gospel eo im kabwijer ki in men ko rettiņo an aelōn̄ eo, em̧ool ki in jeļā kōn Anij.

“Kōn menin, o kain̄i ko ie, kajoor in āinwōt anij ej waļo̧k” (Katak im Bujen Ko 84:20 84:19–20).

Kain̄i ko rej ceremony ko rej kōm̧m̧an jān priesthood eo me jej kōm̧m̧ani bujen ko ippān Anij, ijjino kōn peptaij im wōnm̧aanļo̧k ilo bujen ko jej būki ilo m̧weo im̧ōn Irooj. Ilo kōjparok bujen kein jej maron̄ oktak jān “biktokin” em̧m̧aan im kōrā ro n̄an rikwojarjar ro (lale Mosaia 3:19) jān katok in jouj eo an Kraist im erom jim̧or jim̧we im kwojarjar—ejjeļo̧k bōd im lipijinjin—im̧aan Anij (lale Katak im Bujen Ko 20:29–31; 3 Nipai 27:16–20).

Kraist ilo Amedka, jān Ben Sowards

“Jepļaaktok eo an Tarlep in Gospel eo an Jisōs Kraist: Rubukwi Iiō Naan in Kean̄ n̄an Laļ in,” jān Būreejtōnji eo Kein Kajuon im Doulul eo an Jon̄oulruo Rijilōk ro, rej kwaļo̧k juon un eo ejejjet:

“Jej kwaļo̧k bwe Kabun̄ eo an Jisōs Kraist im Armej ro Rekwojarjar ilo Raan Ko Āliktata, kar ejaake ilo Eprōļ 6, 1830, ej Kabun̄ eo an Jisōs Kraist ilo kar Kallim̧ur M̧oktata me em̧ōj an bar jepļaaktok. Kabun̄ in ej emjak ilo mour eo ewānōk an lukkuun ejm̧aan in jabōn em̧, Jisōs Kraist, im ilo Pinmuur eo An eļap im Jerkakpeje eo em̧ool. Jisōs Kraist ekar bar juon alen kūr Rijilōk ro im kar leļo̧k n̄an er mālim an priesthood. E ej karuwaineneik kōj aolep n̄an itok n̄an E im Kabun̄ eo An, n̄an bōk Jetōb Kwojarjar, kain̄i ko an lo̧mo̧o̧r, im bōk lan̄lōn̄ eo ejjeļo̧k jem̧ļo̧kin.”