Jisōs Kraist Ej n̄an Raan ko Rem̧m̧an Barāinwōt
N̄e men otemjej rej em̧m̧an, ewi wāween ad pedped wōt ioon Rilo̧mo̧o̧r eo? Erkein jet ļōmņak ko.
Pijaiki m̧ōk eļan̄n̄e juon m̧ōttam̧ ej joļo̧k wōt an iien ippam̧ n̄e rej jelm̧ae men ko reppen im jab elwaj ilo iien rekar m̧ōņōņō. Jem̧jerā eo em̧m̧an ke? Ejjab lukkuun.
Jenan̄in ke kar kōm̧m̧ane menin n̄an ad Rilo̧mo̧o̧r—kappukot E ilo iien ko reppen im meļo̧kļo̧k E ilo iien ko rem̧m̧an?
Jej kōnono eļap kōn wāween an Jisōs Kraist jipan̄ kōj jān iien ko ad reppen, bōlen kōnke aolep, ilo juon iien ak bar juon, rej jelm̧ae men ko reppen.
Ak ewōr jet raan ko—wiik ko ak bōlen iiō ko, eļan̄n̄e jej jeraam̧m̧an—me men ko rej emm̧an wōt. Jet iien jej meļo̧kļo̧k Rilo̧mo̧o̧r eo ilo iien kein. Armej ro ilo Bok in Mormon rekar. Rekar jeraam̧m̧an jān kōjeraam̧m̧an ko an Anij ium̧win juon tōre ak āliktata wōtlo̧k ilo utiej bōro ke rekar meļo̧kļo̧k E.
Iien ko rem̧m̧an rejjab meļeļein bwe jej kaju jab bar aikuji Jisōs Kraist Iien jeraam̧m̧an ko rej iien ko rewāppen n̄an lan̄lōn̄ ippān Rilo̧mo̧o̧r eo, jab meļo̧kļo̧k E.
Kōn menin ewi wāween ad ekkejelļo̧k wōt ippān Jisōs Kraist im Jemād ilo Lan̄ n̄e mālijjon̄ ko rejjab kakeememej kōj n̄an oktak Jān Er?
Pād Wōt ilo Ettā
N̄e men otemjej rej em̧m̧an, ej iien em̧m̧an n̄an m̧ōņōņō kōn kōjeraam̧m̧an ko im tōprak ko. Bōtaab jab meļo̧kļo̧kwōn eo ekar kapidodoik n̄an eok bwe kwon pād ijo kwoj pād ie. Kiin̄ Benjamin ej likūt wāween in ilo kwaļo̧k eo an ilo Bok in Mormon eo:
“Bwe lo, jej jab aolep riowar ke? Jej jab aolep atartar ioon wōt ejja Armej in ke, em̧ool Anij, kōn aolep m̧weiuk ko ad, kōn jim̧or m̧ōn̄ā im balle, im kōn gold, im kōn silver, im kōn aolep m̧weie ko ad otemjeļo̧k?” (Mosaia 4:19).
Ettā bōro kōn jeraam̧m̧an ko am̧ kōn keememej ta eo Jemādwōj Ilan̄ im Jisōs Kraist rekar kōm̧m̧ane n̄an eok ej juon wāween eļap n̄an kobaik Er ilo iien ko am̧ rem̧m̧an.
Pād Wōt Ilo Kam̧m̧oolol
Kam̧m̧oolol ej juon iaan uno eo em̧m̧antata n̄an utiej bōro im meļo̧kļo̧k. Kam̧m̧oolol Anij enaaj jipan̄ eok keememej E im aolep men ko rem̧m̧an E im Nejin rej kōm̧m̧ani ilo mour eo am̧. En̄in ej baj jejjet kitien ilo iien ko rem̧m̧an barāinwōt ilo iien ko reppen.
Pād Wōt Im Ekkōļ
Juon iaan jodik ko rem̧m̧an ippān Setan ej n̄an “kajokane, im kaalļo̧k [eok] n̄an kōjatdikdik ioon men ko an kanniōk,” (2 Nipai 28:21). Ilo naan ko jet, enaaj iakwe eļan̄n̄e kwoj en̄jake an ju būruwōm̧ im jokane ilo iien ko rem̧m̧an bwe kwoj meļo̧kļo̧k ta ko relukkuun aorōktata. Kōn menin, jab meļo̧kļo̧k Anij! N̄e kwoj pād wōt ilo ekkōļ kōn aujiid ko an rikapo eo im jum̧ai men̄e ilo iien ko am̧ rem̧m̧an, komaron̄ epaakeļo̧k wōt Jemedwōj Ilan̄ im Jisōs Kraist.
Seperd Eo Em̧m̧an, jān Michael Malm
Pād Wōt ilo Jisōs Kraist
Būreejtōn Russelll M. Nelson ekar katakin: “N̄e mour ko ad rej pedped wōt ilo karōk in lo̧mo̧o̧r eo an Anij … im Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad. Lan̄lōn̄ ej itok jān im kōn E. E ej unjen aolep m̧ōņōņō.”
Ewi emakijkij am̧ ļōmņak kōn m̧ool in kōn lan̄lōn̄ eo n̄e mour ej em̧m̧an? Menin ejjab baj naan in kapilōk in kaenōm̧m̧an eo n̄e men otemjej rej eppen. Ej m̧ool aolep iien, ekoba raan ko am̧ rem̧m̧antata. Kōn menin kōm̧m̧ane jon̄an eo komaron̄e pedped wōt ioon Kraist, itok ilo nana ak em̧m̧an.