Jisōs Kraist Ej eo Em̧m̧antata Ej Itok Wōt
Lan̄lōn̄ eo Jisōs Kraist ej letok aolep iien epojak n̄an eok.
Ļōmņak kōn juon iien ke kwaar ļōmņak laļ in ekar itōn jem̧ļo̧k. Jaab, m̧ool! Kwonan̄in ke jelm̧ae juon men elukkuun pen jon̄an kwar ļōmņak kwojjab maron̄ eļļā jāne?
OK, bōlen kwaar jab ļōmņak laļ in ekar jem̧ļo̧k. Bōtaab ej āinwōt laļ eo am̧ ekar? Menin emaron̄ kar jabdewōt men jān likjab ilo juon teej eaorōk, n̄an eo m̧ōttam̧ em̧m̧antata ej em̧m̧akūt, ak juon eo kwoj iakwe ekar jako ilo ejjeļo̧k kōtmāne.
Jekdo̧o̧n ta ewi wāween am̧ jelm̧ae men kein reppen, kalimjōk eok make kiiō: kwaar eļļā jāni. Aaet em̧m̧anļo̧k, rikanaan ro im rijilōk ro rej kakeememej kōj bwe jemaron̄ kōm̧m̧an eļapļo̧k jān baj mour jān men ko reppen kiiō im tokālik. Jemaron̄ lo lan̄lōn̄ ilo ioļapļapier.
“Eo Em̧m̧m̧an Tata Ej Itok Wōt”
Rilo̧mo̧o̧r eo ekar en̄taan eļapļo̧k jān ad maron̄ pijaiki ilo Getsemane im ioon debwāāl eo. Ineeki metak ko, nan̄inmej ko, im jerawiwi ko an aolepān lal (lale Alma 7:11–13) enaaj kar pen, n̄an baj ba! Ak Ekar anjo̧ jāni aolep.
Elder Patrick Kearon jān Doulul eo an Jon̄oulruo Rijjilōk ro ekar katakin, “Aaet, jej kōļmānļokjen kōn en̄taan im jerbal nana ko rekar waļok n̄an ad Rilo̧mo̧o̧r kōn wōt jerawiwi ko ad, im ekōm̧m̧an bwe jen kōļmenļo̧kjeņ kake. Ak jet iien epen ad em̧m̧akut jān ijen—ilo jikin kallib eo, ilo debwāāl eo, iloan lōb eo. Jej likjab in em̧m̧akūt lōn̄ļo̧k n̄an lan̄lōn̄ eo an lōb eo epeļļo̧k, anjo̧ jān mej, im anjo̧ eo an Kraist!”
Kōnke Jisōs Kraist, jejjab aikuj in bōjrōk wōt ilo en̄taan eo ad make. Jemaron̄ em̧m̧akūt m̧aanļo̧k im aaet reim̧aanļo̧k n̄an ilju im jekļaj kōn lan̄lōn̄ im tōmak.
Kōn menin, ilo tōre in mour emaron̄ lukkuun pen jān ad ļōmņake ke jemaron̄ kōm̧m̧ane, keememej ta eo Būreejtōn Russell M. Nelson ej kab katakin: “Men eo Em̧m̧antata Ej Itok Wōt!” Ej juon kallim̧ur aiboojoj, kōketak! Būreejtōn Nelson eļapļo̧k an jeļā kōn metak im rub bōro eo me laļ in ej loe aolep raan. Ak emaron̄ ba wōt bwe “men eo em̧m̧antata ej itok wōt!”
Ewi wāween an jibadbad eo am̧ oktak eļan̄n̄e kwoj lukkuun jeļā ke men eo em̧m̧antata ej itok wōt? Ewi wāween an ukōt wāween am̧ jelm̧ae apan̄ ko an mour?
Likūt wōt Kraist ilo Aolep Jekjek an Mour
Juon m̧akūtkūt an ilju im jekļaj Būreejtōn Nelson ekar karuwaineneik eok n̄an lan̄lōn̄ ilo reim̧aanļo̧k n̄ane ej Itok eo Kein Karuo an Jisōs Kraist.
Mokta jān am̧ kwaļo̧k bwe “Būruon armej re addimejḷọk kōn lōḷñọñ” (Luk 21:26) im kakkure ej lutōk laļtak ioon ro renana ejjab āinwōt ainikien “men eo em̧m̧antata ej itok wōt,” jen kalikkar juon men: ej Itok eo Kein Karuo an Jisōs Kraist. Jej luuji meļeļe eo eļan̄n̄e jej joļo̧k E jān mour ko ad. E ej “eo em̧m̧antata” me ej itok wōt—E ej un eo n̄an ad lan̄lōn̄! Āinwōt an Būreejtōn Nelson bar, “Eo Em̧m̧antata ej itok wōt … kōnke Rilo̧mo̧o̧r eo ej bar itok!”
Reilo̧k n̄an Rinipai ro, n̄an waanjon̄ok. Mekarta rekar pād ilo juon laļ elukkuun in oktak, ke Rilo̧mo̧o̧r eo ekar mej, rekar kijenmej jet wāween ko an Itok eo Kein Karuo: mej, kakkure, kakkure ko an laļ. Aolep bukwōn ko rekar wōtlo̧k n̄an lo̧jet (lale 3 Nipai 8).
Ak ālkin limotak in, ro rekar tōmak ilo Rilo̧mo̧o̧r eo rekar jeļā bwe limotak ko rekar juon kakkōļļe an mej eo an Rilo̧mo̧o̧r eo. Ilo iien eo rekar kōnono kōn Jisōs Kraist im kōkkaļļe ko rekar loi, waļo̧ktok eo an Rilo̧mo̧o̧r n̄an er (lale 3 Nipai 11:1–11).
Pijaikļo̧k ewi jon̄an lan̄lōn̄ eo Rinipai ro rekar en̄jake! Ālkin kakkure in eļap, Rilo̧mo̧o̧r eo ekar jerbal in karejar n̄an er im kōmour er. Ālkin aolep mijak im ko̧r, Rinipai ro rekar lan̄lōn̄ im nebar Anij bwe rekar ioon aer Rilo̧mo̧o̧r (lale 3 Nipai 11:14–17).
Rilo̧mo̧o̧r eo emaron̄ jab lotok eok ilo nememein armej ilo mour in āinwōt Ekar kōm̧m̧ane n̄an Rinipai ro. Ak komaron̄ itok im jeļā E jān riiti jeje ko rekwojarjar, bōk m̧ōttan kwojkwoj eo, kōjparok bujen kom im bar elōn̄. E emaron̄ jipan̄ eok en̄jake lan̄lōn̄ kiiō im ilo ilju im jekļaj, jekdo̧o̧n ta jekjek ko am̧.
Ilo Tōre in Jej Kōttar …
Itok eo Kein Karuo an Rilo̧mo̧o̧r eo emaron̄ waļo̧k ilo iien mour eo am̧, ak emaron̄ jab. Juon wōt iaer, ewōr lan̄lōn̄ ilo Jisōs Kraist kiiō.
Būreejtōn Nelson ekar katakin ļoore im̧we eo em̧ool me ej jipan̄ ilo ad kōttar ro̧o̧ltok an Rilo̧mo̧o̧r eo: “Ro jeiū im jatū, elōn̄ men ko rem̧m̧an rej waļo̧k im̧aan. Ilo raan kane rej itok, jenaaj lo kajoor eo eļap an Rilo̧mo̧o̧r me laļ in ejjan̄in kar loe. Ilo kōtaan in kiiō m̧ae iien ro̧o̧ltok eo An ‘kōn kajoor im aiboojoj eļap,’ Enaaj lewaj ioom̧ kōjeraam̧m̧an ko ban bwini kōjeraam̧m̧an ko, im kabwilōn̄lōn̄ ko ioon ro retiljek.”
Ilo naan ko jet, jemaron̄ loe aenōm̧m̧an im lan̄lōn̄ ilo Kraist kiiō, m̧ae An ro̧o̧ltok, im indeeo. Jisōs Kraist ej meram eo ilo jem̧ļo̧k aolep tanōļ ko. Ej ej lan̄lōn̄ eo ilo aolep men ko reppen an juon make. Ej ej kōmour eo jān mijak E ej am̧ Rilo̧mo̧o̧r. Ilo am̧ pedped wōt ioon E, aenōm̧m̧an im lan̄lōn̄ rej pojak n̄an eok ijin, kiiō, im aolep iien.