Kakkōļļe ko an Itok eo Kein Karuo: Ejjeļo̧k Unin n̄an Mijak
Jet men ko reļļap em̧ōj aer waļo̧ktok m̧okta jān an Rilo̧mo̧o̧r bar itok. .Jet men ko reļļap kar kanaan kaki m̧okta jān an Rilo̧mo̧o̧r eo bar itok.
E ej Itok Bar Juon Alen n̄an Kien im Irooj, jān Mary RL Sauer
Ad Rilo̧mo̧o̧r, Jisōs Kraist, enaaj bar itok. E ekar katakin m̧ool in elukkuun alikkar (lale Matu 24). Elōn̄ armej renaaj kōņaan jeļā n̄āāt eo menin enaaj bōk jikin, ak Jisōs ekar ba, “A raan eo im awa eo ejjeḷọk juon e jeḷā kake, im jab enjeḷ ro i lañ, jab Nejin, a Jema wōt” (Matu 24:36).
Kōn menin, Irooj ekar kwaļo̧k jejjo kakkōļļe ko me renaaj itok m̧okta jān Itok eo An Kein Karuo. Elōn̄ iaan men kein rej rekam̧ōņōņō im em̧m̧an, āinwōt Jepļaaktok eo an gospel eo, waļo̧ktok eo an Bok in Mormon , im aintok eo an Israel.
Ak ebar ewōr … kakkōļļe ko jet. N̄an waanjon̄ok:
-
Kakkōļļe ko ilo lan̄ ko (ekoba aļ eo, allōn̄ eo, im iju ko) im ioon laļ, kakkure ko, ļan̄ ko, im tap in baat ko).
Men kein aolep remaron̄ kamijak. Ilo m̧ool, Rilo̧mo̧o̧r eo ekar ba bwe ilo raan ko āliktata, elōn̄ būruwōn armej renaaj likjab jān er kōn mijak.
Kiiō, bōlen komaron̄ lalejorrāān ko ipeļaakin laļ in, barāinwōt mālijjon̄ ko am̧ make kwoj jelm̧ai, im en̄jake tarjān jon̄ak eddodo im inepata. Bōlen kwoj bwilōn̄ ta eo kwaar reim̧aanļo̧k n̄ane eļan̄n̄e men otemjej rej etal wōt im kaam̧jakļo̧k im ļapļo̧k an eppen im tōlļo̧k n̄an Itok eo Kein Karuo.
Ak menin ejjab wāween eo Jisōs Kraist enaaj kar kōņaan bwe kwōn—juon iaan rikaļoor ro An—kōtmān ro̧o̧ltok eo An.
Ennaan eo an Irooj n̄an Rikaļoor ro An
Aaet kōn aolep keen̄taanan ko im nana an raan ko āliktata, Rilo̧mo̧o̧r eo ekar ba n̄an rijilōk ro An, “Kom̧in jab leln̄o̧n̄.” Etke? Kōnke “n̄e aolep men kein renaaj waļo̧k, kom̧ maron̄ jeļā ke kallim̧ur ko me kar kōm̧m̧ani n̄an kom̧ renaaj kūrm̧ool” (Katak im Bujen Ko 45:35).
Jisōs Kraist ekar jiron̄ kōj n̄an “jab mijak” (Katak im Bujen Ko 50:41) im “kom̧win m̧ōņōņō,” (Katak im Bujen Ko 61:36). Kōn menin, ijjelo̧kin pedped ioon poktak ko rej itok, emaron̄ em̧m̧antata n̄an kōm̧akūt ad mije wōt.
Erkein rej jilu wāween ko raorōk komaron̄ kōm̧m̧ani “jab mijak,” reim̧aanļo̧k n̄an aiboojoj eo an Itok eo Kein Karuo, im ba, ippān Jon Rikwaļo̧k revelesōn eo, “Itok, Irooj Jisōs” (Revelesōn 22:20).
1. Reilo̧k n̄an Rikanaan eo
Rilo̧mo̧o̧r eo ekar kakkōļ bwe enaaj wōr riab in Kraist ko im riab in rikanaan ro me renaaj moņe elōn̄ armej m̧okta jān itok eo An. Aolep ro ipeļaakid, enaaj wōr ainikien eļap, poktak, im ainikien ko renana rej kajjieon̄ tōl kōj n̄an jōbwābwe. Ilo raan ko āliktata, Setan “kajoor ibūruōn ro nejin armej, im kōketak er n̄an illu ņae men eo em̧m̧an” (2 Nipai 28:20). Aaet rikāālet ro naaj bōkļo̧k er jān m̧ool eo.
Ak Irooj ekar letok n̄an kōj juon jipan̄ eļap. E ekar ņaetan rikanaan ro n̄an kōjeraam̧m̧an im tōl kōj. Būreejtōnji eo Kein Kajuon im Doulul eo an Jon̄oulruo Rijilōk ro rej jāmin im ban tōlļo̧k kōj ilo jōbwābwe. Rilo̧mo̧o̧r eo ekar ba, “Mekarta jān ainikiō make ak jān ainikien ro rikarejera, ej āinwōt juon” (Katak im Bujen Ko 1:38). Komaron̄ kajjitōk ippān Jemedwōj Ilan̄ kōn Jetōb Kwojarjar eo n̄an kapen m̧ool ko rej katakin āinwōt katak kiiō eo an Būreejtōn Russell M. Nelson: “Men eo em̧m̧antata ej itok wōt, … kōnke Rilo̧mo̧o̧r eo ej bar itok!” Im: “Ej m̧aanjabpopo n̄an an bar itok. Jemaron̄ barāinwōt m̧aanjabpopo n̄an bōk E.”
Im ilo am̧ ļoor katak ko aer “ilo aolep kijenmej im tōmak” (Katak im Bujen Ko 21:5), komaron̄ loe ewi wāween aer kōjeraam̧m̧an mour eo am̧.
Elder Allen D. Haynie jān Jiljimjuonn̄oul eo ekar ba: “Ke ikar juon ajri, [kanaan] ko an raan ko āliktata rej kamijak eō im kōm̧m̧an aō jar bwe Itok eo Kein Karuo ej jāmin itok ilo iien aō mour. … Ak kiiō ij jar kōn oktak eo. …
“… Jejjab aikuj in mijak. Katak eo im pedped in katak ko me jej aikuj ļoori n̄an mour ilo jetōb im niknik ilo kanniōk rej loi ilo naan ko an rikanaan eo emour.”
Ilo am̧ ļoore tōl an rikanaan ro im rijilōk ro, am̧ mijak enaaj lewaj wāween n̄an tōmak, kōjatdikdik, im lan̄lōn̄.
2. Jutak ilo Jikin ko Rekwojarjar
Rilo̧mo̧o̧r eo ekar ba bwe ilubwilijin poktak ko an raan ko āliktata, “rikaļoora renaaj jutak ilo jikin ko rekwōjarjar, im rej jamin em̧m̧akūt;” (Katak im Bujen Ko 45:32). Jikin kein rekwojarjar ekitbuuj m̧ōko im̧ōd, m̧ōnjar ko, im tampeļ ko.
Kōn tampeļ ko, Būreejtōn Nelson ekar katakin bwe “injurōņ eo ad em̧m̧antata ej n̄an wōnm̧aanļo̧k wōt ilo erreo n̄an deļon̄e m̧weo Im̧ōn ekwojarjar.” Im “kōļapļo̧k iien ilo tampeļ eo enaaj jipan̄ kōj m̧aanjabpopo n̄an Itok eo Kein Karuo.”
Eventide, jān Yongsung Kim
3. Kōpooje Laļ in
Juon jerbal an Kabun̄ eo an Jisōs Kraist ej kōm̧m̧ane ilo raan ko āliktata ej n̄an jipan̄ kōpooje laļ in n̄an itok eo An. Im komaron̄ jipan̄ jān bōk koņaam̧ ilo jerbal eo An.
Komaron̄ kwaļo̧k gospel eo n̄an ro jet im jipan̄ bōktok meram an Anij im m̧ool n̄an ro otemjej “ro dāpiji er jān m̧ool eo kōnke rej jab jeļā ia eo ren pukote ie” (Katak im Bujen Ko 123:12).
Komaron̄ barāinwōt kōm̧m̧ani kōpeptaij ko ilo tampeļ eo n̄an ro otemjej ilo jait eo juon an rōn̄ōl eo ro rekar mour im “Aolep ro rekar mej kōn ejjeļo̧k jeļāļo̧kjeņ kōn gospel in, ro renaaj kar bōk e” (Katak im Bujen Ko 137:7).
Kōn eļap nana ilo laļ in, komaron̄ erom juon meram n̄an ro jet im jipan̄ bōkļo̧k kōmour n̄an laļ in. Komaron̄ jipan̄ kōpooje juon armej eo Rilo̧mo̧o̧r eo emaron̄ itok im enaaj pojak n̄an bōke E.
En̄in ej juon eddo eļap im juon men eo elukkuun em̧m̧an n̄an reim̧aanļo̧k n̄ane.