Famli Ofisol Toktok I Go logn Wol mo Yu
Bae hem 30 yia blong famli ofisol toktok i go long wol long manis ia. Luk olsem wanem hemia i save blesem famli blong yu tedei.
Ol pikja i kam long Irtaxe López de Munáin
30 yia stret i pas, long Septemba 1995, Fas Presidensi mo Kworom blong Olgeta Twelef Aposol i putumaot “Famli: Wan Ofisol Toktok I Go long Wol” i stap talemaot se “famli hem i stamba blong plan blong Krieta, blong ol pikinini blong Hem oli save gobak stap long ples blong olgeta kasem taem we i no save finis.”
Presiden Dallin H. Oaks, Fas Kaonsela insaed long Fas Presidensi, i bin wan Aposol long taem ia. Hem i talem se, “mi testifae se famli ofisol toktok i wan mesej blong trutok we i no save finis. … Tijim mo laef folem hemia, mo bae yu kasem blesing.”
Famli ofisol toktok i bin blesem ol famli raon long wol blong 30 yia—mo bae i gohed blong mekem.
Ol Wei blong Strong, Hapi Famli
Insaed long famli ofisol toktok, ol profet mo ol aposol oli testifae se “Hapines insaed long famli laef i gat gudfala janis blong kamtru sapos famli i stanap long ol tijing blong Lod Jisas Kraes.”
Olgeta samting ia i gat “fet, prea, fasin blong sakem sin, fasin blong stap fogiv, respek, lav, fasin blong kea, wok, mo ol samting o pleplei we oli gud.”
Blong yusum ol tijing ia i save blesem famli blong yu long ol gudfala wei. Eksampol, yu save:
-
Sapotem famli prea. Prea i helpem gud ol famli blong kam moa strong. Sapos prea i no wan samting we yufala i stap mekem long famli blong yu, leftemap tingting blong olgeta blong oli traem. Blong stap prea tugeta i save givim pis, lav, mo glad.
-
Soem lav tru long ol toktok mo ol aksen. Talem long famli blong yu plante taem se yu lavem olgeta—nomata sapos yu ting se oli save finis. Yusum ol toktok we oli kaen mo i leftemap tingting. Hemia bae i invaetem Spirit long hom blong yu.
Blong givim seves long famli blong yu i wan wei blong soem lav. Tingting blong mekem ol sikret tingting blong ol brata mo sista blong yu o help wetem ol haoswok we oli no askem yu blong mekem.
-
Spendem taem tugeta mo gat wan gud taem. Famli ofisol toktok i talem se “ol samting o pleplei we oli gud” olsem wan wei blong helpem ol famli oli kam strong mo hapi. Yu save go ronron long baeskel long wan pak, mekem rere mo serem wan kakai, tekem smol taem blong wokbaot long bus, o plei ol spot o ol bod gem tugeta. Lis i save go moa, be blong spendem taem tugeta bae i rimaenem yu se famli i wanem we i moa impoten.
-
Givim seves tugeta. Famli blong yu i save gro i kam kolosap taem yu stap givim seves tugeta. Hemia i simpol nomo olsem blong stap mekem rere wan fevret kakai blong wan we i stap long nid o savelem sno aot long rod blong trak blong wan neba.
Sevya i save help blong kliarem ol fasin blong andastanem samting rong mo ol jalenj insaed long ol famli tru long fasin blong sakem sin, fasin blong fogivnes, mo fet. Taem yumi folem mo dipen long Jisas Kraes, lav mo respek we yumi filim insaed long famli blong yumi bae i gro.
I gat plante nara wei blong mekem ol famli oli kam strong mo hapi mo blong tekem olgeta i kam kolosap tugeta.
?Wanem nao ol samting we yu save mekem?
Ol Trutok blong Naoia mo blong Oltaem
I nogat wan famli i stret evriwan Sam oli fesem ol bigfala jalenj. Yu save lukluk long situesen blong famli blong yu mo sapraes long hamas famli ofisol toktok i save blesem famli blong yu. Be hem i fulap long ol trutok we i no save finis mo bae i blesem famli blong yu—nomata wanem.