Hem i No Save se Mi Nidim Hemia

Foto i kam long Melanie Miza

Mi stap fesem sam problem we i blong miwan. Wan dei mi no filim gud, mo mi no bin wantem go long seminari. Be mi tingting, “Hem i las yia blong mi, mo mi mas yusum gud taem ia blong mi.”

Mekem se mi go, mo mifala i tokbaot olsem wanem Jisas Kraes i save nem blong yumi wanwan. Yumi ridim Doktrin mo Ol Kavenan 18:10: “Tingbaot se praes blong wan sol i bigwan long ae blong God.” Mi stat blong gat wan filing blong krae taem mi stap kalarem ves ia. Taem mi stat blong gat wan filing olsem, mi stap krae fulap, mekem se mi nomo wantem ridim bakegen long klas.

Samtaem i pas, tija i askem, “?Wanem samting nao yu gat bigfala interes long hem mo from wanem?” Mi no wantem toktok, be wan fren blong mi i talem skripja ia. Hem i serem testemoni blong hem se God bae i no lego yumi stap yumiwan, se samtaem bae yumi fogetem, be Hem i save yumi mo Hem bae i stap ia blong yumi.

Taem mi harem hemia, mi filim olsem se Papa long Heven i stap toktok long mi tru long fren blong mi. Olsem se Hem i stap talem se, “Yu no tanem yu gowe long mi—Mi Mi stap ia.”

Afta long hemia, mi go blong waepem fes blong mi, mo fren blong mi i kam luk mi. Hem i talem, “Mi no sapos blong serem, be mi filim se mi nid blong serem from bae i helpem wan narawan” Mi no bin save se wan ia hem i yu.” Hemia i soem long mi se Papa long Heven i save gud mi.

Afta long seminari, mi go hom mo prea. Oltaem mi prea, mi stap talem tangkyu mo askem ol samting nomo. Be prea ia—mi ting se i wan prea blong glad we mi neva bin talem bifo. Mi filim spirit long rum blong mi, mo mi filim se Papa long Heven i bin stap wetem mi.