Ol Saen blong Seken Kaming: I Nogat Wok blong Fraet
Sam series samting we oli bin talemaot bifo Sevya i kambak bakegen. Be yufala i gat gud risen blong no fraet.
Hem I Kam Bakegen blong Rul mo Kam King, i kam long Mary RL Sauer
Sevya blong yumi Jisas Kraes bae i kambak bakegen Hem i tijim trutok ia i klia gud (luk long Matiu 24). Plante pipol bae oli wantem save se wetaem hemia bae i hapen, be Jisas i talem, “dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save” (Matiu 24:36).
Be, Lod i soem sam saen we bae i lid i go long Seken Kaming blong Hem. Plante long olgeta oli blong glad mo sapraes, olsem Restoresen blong gospel, kambak blong Buk blong Momon, mo kam tugeta blong Isrel.
Be i gat ol … nara saen. Eksampol:
-
Ol saen long ol heven (bae gat san, mun, mo ol sta) mo long wol (bae i gat faea, strong win, hariken, mo bigfala smok).
Evriwan ia i save mekem wan i fraet. Trutok i we, Sevya i talem se long ol las dei, plante pipol bae oli ded from fraet.
Naoia, bae yu stap luk ol problem raon long wol, mo tu ol jalenj we yu stap fesem yuwan, mo filim se i tumas mo stap wari. Maet yu tingting long ol samting we yu stap wet blong luk oli hapen we bae i mekem man i fraet moa mo kam moa had, we oli stap soem se Seken Kaming i kolosap.
Be hemia i no olsem wanem Jisas Kraes bae i wantem blong yu—wan long ol disaepol blong Hem—i stap hop blong luk long kambak blong Hem.
Mesej blong Lod i go long Ol Disaepol blong Hem
Nomata wetem evri noes mo samting blong pulum tingting long ol las dei, Sevya i talem long ol disaepol blong Hem, “yufala i mas lukaot gud blong yufala i no fraet.” ?From wanem? From “taem evri samting ia i kam blong hapen, bae yufala i save se ol promes we mi bin mekem long yufala bambae oli hapen” (Doktrin mo Ol Kavenan 45:35).
Jisas Kraes i bin talem long yumi blong “no fraet” (Doktrin mo Ol Kavenan 50:41) mo “stap glad” (Doktrin mo Ol Kavenan 61:36). Be, blong no stap lukluk nomo long ol bigfala trabol we bae i kam, hem i moa gud blong yumi jenisim lukluk blong yumi.
Hemia tri impoten wei we yu “no save fraet,” lukluk fored from Seken Kaming, mo talem wetem Jon man blong Revelesen, “Jisas Masta, plis yu kam” (Revelesen 22:20).
1. Lukluk long Profet.
Sevya i givim woning se bae i gat plante giaman Kraes mo giaman profet bifo long kambak blong Hem we bae oli giaman long plante pipol. Raon long long yumi, i gat bigfala noes, fasin blong gat tu tingting, mo ol nogud voes we i stap traem blong lidim yumi blong go lus. Long ol las dei, Setan bae i “toktok nogud long ol hat blong ol pikinini blong ol man, mo mekem olgeta blong kam kros agensem samting we i gud” (2 Nifae 28:20). Iven olgeta we Lod i jusum bae oli save go lus aot long long trutok.
Be Lod i givim long yumi wan bigfala help. Hem i bin singaotem ol profet blong blesem mo lidim yumi. Fas Presidensi mo Kworom blong Olgeta Twelef Aposol bae oli no save lidim yumi go lus. Sevya i talem, “Mo nomata oli kamaot tru long voes blong miwan o tru long voes blong ol wokman blong mi, i semmak” (Doktrin mo Ol Kavenan 1:38). Yu save askem Papa long Heven blong Tabu Spirit i soem trutok blong wanem oli tijim, olsem tijing blong Presiden Russell M. Nelson we i jes pas: “I gat yet blong kam we i moa gud… from Sevya i stap kambak bakegen!” Mo: “Hem i stap rere blong kambak bakegen. Bae yumi tu yumi rere blong gat Hem.”
Mo taem yu folem ol tijing blong olgeta “wetem fasin blong save wet longtaem mo wetem fet” (Doktrin mo Ol Kavenan 21:5), yu save luk olsem wanem oli blesem laef blong yu.
Elda Allen D. Haynie blong olgeta Seventi i bin talem: “Taem mi wan pikinini, ol profesi abaot las dei, oli stap mekem mi mi fraet mo i mekem se mi prea se Seken Kaming bae i no kam long taem we mi stap laef. … Be naoia mi stap prea from oposit. …
“… Yumi no nid blong fraet. Ol doktrin mo ol prinsipol we yumi mas folem blong stap sef long saed blong spirit mo stanap strong long saed blong bodi, oli stap long ol toktok blong wan profet we i stap laef.”
Taem yu stap folem gaed blong ol profet mo ol aposol, ol fraet blong yu bae i givim yu fet, hop, mo glad.
2. Stanap long Ol Tabu Ples
Sevya i bin talem se long medel blong ol trabol we bae i kam long ol las dei, “ol disaepol blong mi bambae oli stanap long ol tabu ples, mo bambae oli no muv” (Doktrin mo Ol Kavenan 45:32). Olgeta tabu ples ia, i gat ol hom, ol mitinghaos, mo ol tempol.
Wetem ol tempol, Presiden Nelson i bin tijim se “sef ples blong yumi, i blong gohed blong stap klin inaf blong Hem i tekem yumi i go insaed long tabu haos blong Hem.” Mo “blong spendem moa taem long tempol, bae i helpem yumi rere from Seken Kaming blong Sevya.”
Naet, i kam long Yongsung Kim
3.Mekem Rere Wol Ia
Wan wok we Jos Ia blong Jisas Kraes i stap mekem i blong help blong mekem rere wol ia from kambak blong Hem. Mo yu save help taem yu stap tekpat long wok ia blong Hem.
Yu save serem gospel wetem ol narawan mo help blong tekem laet blong God mo trutok i go long olgeta “ we oli no save faenem trutok from nomo oli no save weaples blong faenem trutok” (Doktrin mo Ol Kavenan 123:12).
Yu save mekem baptaes insaed long tempol blong olgeta we oli stap narasaed long vel we oli bin laef mo “ded be oli no kasem save long gospel ia, we bae oli akseptem sapos mi bin letem olgeta oli stastap” (Doktrin mo Ol Kavenan 137:7).
Wetem fulap nogud fasin long wol, yu save stap wan laet long ol narawan mo help blong tekem hiling i go long wol. Yu save help blong mekem rere wan pipol we taem Sevya i kam mo olgeta bae oli rere blong risivim Hem.
Hemia i wan bigfala responsabiliti mo samting we i gud tumas blong lukluk fored from.