Stap Serem Glad long Kenya

Eric D. Snider

Ol Magasin blong Jos

Taem Robert i faenem gospel, hem i wantem blong serem wetem evriwan we hem i save. No, i tru—evriwan.

Stat we hem i baptaes long Ogis 2024, Robert L., 18, blong Kenya, i bin tekem moa long 50 fren i kam long jos—mo !25 long olgeta oli kasem baptaes!

Hemia i total namba blong taem we mifala i toktok long hem sam manis i pas finis. Maet namba ia i go antap finis naoia.

Robert, wan memba blong Bukuru Branj long Kisumu Kenya Distrik, oli introdiusum hem long Jos Ia blong Jisas Kraes blong ol Lata-dei Sent long eli 2024, taem we hem i mitim wan man Amerika we i stap mekem wok blong yumaniterian long Kenya.

“Mi no bin ting se laef blong mi bae i kam moa gud” Robert i talem. “Papa mo mama blong mi i nogat mane; tufala i no save sendem mi i go long skul.” (Long Kenya, iven pablik skul i nidim mane.)

“Be mi save se Papa long Heven bae i helpem mi. Mi stat blong prea mo ridim Niu Testeman. Afta, mi mitim sponsa blong mi.”

“Sponsa” blong hem i wan memba blong Jos Ia blong Jisas Kraes blong ol Lata-dei Sent we i blesem laef blong Robert long tu wei: hem i helpem hem blong kasem skul blong hem mo, moa impoten, hem i serem gospel wetem Robert (olsem we wan nara yang man we i jes joenem Jos). Robert i kasem baptaes afta long sikis manis.

ol yang man — Robert L. blong Kenya i bin invaetem twelef pipol i go long jos—ol neba, skul met, ol pikinini we hem i stap plei spot wetem olgeta—evriwan.

Helpem Bak Wan Nara Man

Long nomol fasin, Robert i wantem serem ol niu blesing blong hem wetem ol narawan. Hem i no save sponsa long edukesen blong eniwan. Be i tru, !hem i save tijim gospel long olgeta!

Hem i stat blong invaetem ol pipol i go long jos—ol neba, skul met, ol pikinini we hem i stap plei spot wetem olgeta—evriwan we hem i save. “Mi kam wan Sandei wetem, faef olsem, afta nara Sandei mi kam wetem 10,” hem i talem. “Afta mi sendem ol misinari i go long olgeta blong oli save andastanem mo save se Jos ia i tru mo oli save eksperiensem wanem we mi eksperiensem.”

I no longtaem sam long ol fren blong Robert i jusum blong kasem baptaes mo askem hem blong mekem odinens ia.

Jos i stap gro kwik long Afrika, hemia i hapen from we i gat ol disaepol olsem Robert. Hem i baptaesem 10 pipol long wan wik, 11 long nekis wik, mo 4 “nomo” folem long nara wik.

Moa long olgeta twelef fren we oli jes baptaes oli stap wetem hem long wan BYS konfrens long Kenya las Disemba, mo i gat tu wan fren we i kasem baptaesem tru long wan fren blong hem .

?Yu luk olsem wanem faea blong spirit i stap gro? !Hem i stanap insaed long proses blong hemwan!

Stap Filim Spirit

Fredrick A., 17, i talem se taem fren blong hem Robert i invaetem hem i go long jos, hem i filim Spirit i strong tumas mekem se hem i no save talem no.

“Taem mi kasem long jos, Spirit blong God i stap wetem mi,” Frederick i talem. “Taem oli givim Buk blong Momon long mi, mi stat blong ridim. Sapos mi no andastanem, oltaem mi askem branj presiden blong mi mo mi prea.”

Gift M., 18, i wan nara fren we Robert i baptaesem. “Mi glad blong pat long tru Jos—tru Jos ia nomo long yunives,” Gift i talem wetem wan smael.

Yet i Gat Moa Wok i Stap

Robert i plan blong go givim seves olsem wan fultaem misin stret afta we bae hem i finis long skul (semmak long Gift mo Frederick). ?From wanem hem i wantem mekem hemia we hem i save gud olsem wanem blong serem gospel?

“Mi mas go long wan misin blong eksperiensem sam moa mo lan moa,” Robert i talem. “Hemia bae i mekem fet blong mi i kam strong mo jenisim fasin blong mi.” Hem wanem we God i wantem mi blong mekem.”