Jisas Kraes I blong Ol Gud Dei Tu
Taem ol samting oli stap go gud, ?olsem wanem nao yumi save lukluk nomo i go long Sevya? Hemia samfala tingting.
Pikjarem hemia long maen sapos wan fren i spenem taem nomo wetem yu taem oli stap go tru long hadtaem mo stap longwe long yu taem oli hapi. ?Helti rilesensip ia? No, i no stret tumas.
?Yumi stap mekem hemia long Sevya blong yumi—lukaotem Hem long ol taem blong ol hadtaem mo fogetem Hem long ol gud taem?
Yumi tokbaot plante abaot olsem wanem Jisas Kraes i helpem yumi tru long ol hadtaem blong yumi, hemia from se evriwan, long wan taem o nara taem, i fesem ol had samting long laef.
Be i gat sam dei—wik o yia iven, sapos yumi laki—we ol samting oli stap go gud tumas. Samtaem yumi fogetem Sevya long ol taem ia. Ol pipol blong Buk blong Momon oli bin mekem hemia. Oli kam antap gud long ol blesing blong God blong wan taem be afta long hemia oli foldaon long hae tingting taem oli fogetem Hem.
Ol gud taem i no minim se long en yumi nomo nidim Jisas Kraes. Ol taem blong sakses oli ol gud taem blong stap glad wetem Sevya, be i no blong fogetem Hem.
?Olsem wanem nao bae yumi stap konek wetem Jisas Kraes mo Papa blong yumi long Heven taem ol tes blong laef oli no rimaenem yumi blong lukluk long Tufala?
Stap Putum Tingting I Stap Daon
Taem ol samting oli stap go gud, hem i gud blong stap selebretem ol blesing blong yu mo wanem we yu kasem. Be yu no fogetem se huia i mekem i posibol long yu blong stap long wea ples we yu stap naoia. King Benjamin i talem olsem insaed long tijing blong hem long Buk blong Momon:
“From luk, ?yumi evriwan, yumi no man blong askem samting? ?Yumi evriwan, yumi no dipen long sem Man, we i God, from evri samting we yumi gat, from tugeta ia, kaekae mo klos, mo from gol, mo from silva, mo from evri rij samting we yumi gat we i blong evri kaen?” (Mosaea 4:19).
Blong stap putum tingting i stap daon from ol sakses blong yu taem yu stap tingbaot wanem we Papa long Heven mo Jisas Kraes i mekem blong yu i wan bigfala wei blong mekem Tufala i pat tu long ol gud taem blong yu.
Stap Talem Tangkyu
Fasin blong talem tangkyu i wan gudfala meresin blong hae tingting mo fasin blong foget. Blong stap talem tangkyu long God bae i helpem yu blong tingbaot Hem mo evri gud samting we Hem mo Pikinini blong Hem i mekem long laef blong yu. Hemia i wok gud long ol gud taem mo semmak long ol taem we i had.
Rere blong Luksave
Wan long ol fevret atak blong Setan i blong “mekem oli kwaet, mo giaman long olgeta blong lidim olgeta oli go long sefples we i blong wol” (2 Nifae 28:21). Long narafala toktok, bae hem i laekem sapos yu filim gud mo sef long ol gud taem blong yu mo yu fogetem ol wanem we i moa impoten. So, !yu no fogetem God! Taem yu rere from ol trik blong enemi mo winim olgeta iven long taem blong ol gud taem blong yu, yu save stap kolosap long Papa long Heven mo Jisas Kraes.
Gudfala Man blong Lukaot long Sipsip, i kam long Michael Malm
Putum Kraes i Kam Faswan
Presiden Russel M. Nelson i tijim: “Taem we, long laef blong yumi, yumi stap lukluk nomo long plan blong God blong fasin blong sevem man… mo Jisas Kraes mo gospel blong Hem, yumi save filim glad nomata wantem i stap hapen—o i no stap hapen—long laef blong yumi. Glad i kam long Hem mo from Hem. Hem i stamba blong evri glad.”
?Hamas taem nao yu stap tingbaot trutok ia abaot glad ia we taem laef i go gud? Hemia i no wan kaonsel blong givim kamfot nomo long taem we ol samting oli had. I tru oltaem, i tekem tu ol gudfala dei blong yu. So, mekem evri samting we yu save mekem blong lukluk nomo long Kraes, kam nogud o gud.