Jisas Kraes i Beswan We Bae I Kam
Glad ia we Jisas Kraes i givim, i stap oltaem blong yu.
Tingbaot wan taem we yu ting se wol bae i en. !Mi talem tru! ?I gat wan taem we yu go tru wan samting we i had tumas mo yu ting se bae yu no save winim?
, Maet yu no gat tingting ia se wol bae i en. ?Be yu bin filim se wol blong yu i olsem? Hemia i save hapen long eni samting olsem no pasem wan impoten tes, bes fren blong yu i muvaot, o yu sapraes se wan we yu lavem i ded.
Nomata olsem wanem yu go tru long ol hadtaem ia, lukluk long yuwan naoia: !yu bin winim! Wanem we i moa gud, ol profet mo ol aposol oli rimaenem yumi se yumi save mekem moa blong stap winim ol hadtaem blong naoia mo blong fiuja. Yumi save faenem glad long medel blong olgeta hadtaem ia.
“Beswan Bae I Stap Kam”
Sevya i safa moa bitim we yumi save pikjarem, hemia long Getsemane mo long kros. Blong go tru ol soa blong bodi, siknes, mo sin blong ful wol (luk long Alma 7:11–13) bae i had mo yumi no save talemaot evriwan! Be Hem i winim evriwan.
Elda Patrick Kearon blong Kworom blong Olgeta Twelef Aposol i tijim, “Yes, yumi tingting hevi long ol safaring mo ol fasin nogud we Ridima blong yumi i bin go tru from ol sin blong yumi, mo hemia i mekem se yumi mas tingting hevi long hemia. Be samtaem yumi fasfas long ples ia—long garen (Getsemane), long kros, insaed long tumb. Yumi mestem blong muv i go antap from glad ia we oli rolem aot ston long tumb, from Hem i winim ded mo from viktri blong Kraes!”
From Jisas Kraes, yumi no nid blong stap fasfas long safaring blong yumiwan. Yumi save muv i go fored mo iven lukluk fored long fiuja wetem glad mo fet.
Be, taem laef i moa had bitim we yumi save tingting long hem, tingbaot wanem we Presiden Russell M. Nelson i jes tijim i no long taem i pas: “I gat yet blong kam we i moa gud!” !Hemia i wan gudfala promes blong hop! Presiden Nelson i save fulap abaot soa long bodi mo harem nogud we wol i stap mekem evri dei. Be hem i save talem se “I gat yet blong kam we i moa gud!”
?Olsem wanem nao lukluk blong yu bae i jenis sapos yu save tru se beswan i stap kam yet? ?Olsem wanem nao bae i jenisim wei we yu stap fesem ol jalenj blong laef?
Kipim Kraes long Pikja
Wan fiuja ivent, Presiden Nelson i bin invaetem yumi blong stap glad mo rere from Seken Kaming blong Jisas Kraes.
Bifo yu tokbaot se “hat blong ol man bae i kam strong” (Luk 21:26) mo fasin blong pulum tingting i stap kam long ol man nogud i olsem se “I gat yet blong kam we i moa gud,” letem yumi kliarem wan samting: hem i Seken Kaming blong Jisas Kraes. Yumi mestem trutok sapos yumi tekemaot Hem long Pikja. Hem i “moa gud” we i stap kam yet—!Hem i stamba blong glad blong yumi! Olsem Presiden Nelson i talem, “I gat yet blong kam we i moa gud … from se !Sevya bae i kambak bakegen!”
Eksampol, lukluk long Ol Man blong Nifae. Nomata se oli stap long wan defren saed blong wol, taem Sevya i ded, oli go tru sam wei blong Seken Kaming-disasta: ded, ol samting oli smas gud, ol disasta we man i no mekem. Ol siti i draon fulwan long solwota (luk long 3 Nifae 8).
Be afta long bigfala noes ia, olgeta we oli biliv long Sevya oli save se ol disasta ia oli saen blong ded blong Sevya. Long taem we oli stap tokbaot Jisas Kraes mo ol saen we oli bin luk, Sevya i kamkamaot long olgeta (luk long 3 Nifae 11:1–11).
Pikjarem long maen hamas glad ol Man blong Nifae oli bin filim! Afta long bigfala trabol taem ia, Sevya i givhan long olgeta mo hilim olgeta. Afta long evri fraet mo bigfala wari, Ol Man blong Nifae oli stap glad mo presem God from se oli save mitim Sevya blong olgeta (luk long 3 Nifae 11:14–17).
Maet Sevya i no visitim yu fes tu fes long laef ia olsem we Hem i mekem long Ol Man blong Nifae. Be yu save go long Hem taem yu ridim ol skripja, tekem sakramen, kipim ol kavenan, mo moa. Hem bae i helpem yu blong filim glad naoia mo long fiuja, nomata ol situesen blong yu.
Taem Yumi Stap Wet …
Maet Seken Kaming blong Sevya i hapen truaot long laef blong yu, o maet bae i no hapen. Nomata long hemia, i gat glad long Jisas Kraes naoia.
Presiden Nelson i tijim trutok blong insperesen ia we i help taem yumi stap wet long kambak blong Sevya: Ol dia brata mo sista blong mi, i gat fulap gudfala samting bae i kam yet. Long ol dei we i stap kam, bae yumi luk bigfala paoa blong Sevya we bae Hem i soemaot we wol i neva luk. Bitwin naoia mo long taem we bae Hem i kambak ‘wetem paoa mo glori,’ bae Hem i givim plante janis, blesing, mo merikel long olgeta we oli fetful.”
Long ol nara toktok, yumi save faenem pis mo glad naoia, kasem taem Hem i kambak, mo blong oltaem. Jisas Kraes i laet we i stap long en blong evri tanel. Hem i glad ia long ol hadtaem blong yuwan. Hem i Man blong ronemaot fraet. Hem i Sevya blong yu. Taem yu lukluk nomo long Hem, pis mo glad i stap ia blong yu, naoia, mo blong oltaem.