Wari, Spirit, mo Ol Skripja

Pikja i kam long Katelyn Budge

Mi bin travel plante taem long laef blong mi. Sam yia i pas, mifala i muv i go long Dubai blong wan sot taem Taem mi stap emti maot basket blong mi, las samting we i stap daon hem i ol skripja blong mi. Mi tingting se mi mas ridim olgeta. Mi mekem, be hem i no semmak olsem oltaem from mi nogud tumas blong stap folem ol filing we mi kasem. Be mi statem gud long stat, mo ting se mi ridim faef o sikis japta.

Be afta, oli askem mi blong givim toktok long jos. Mi bin sapraes blong tokbaot hamas i impoten blong stadi ol skripja. Mi bin raetem toktok blong mi mo tingting, “Woa, mi mas ridim gud moa ol skripja.” Hem i kam wan kompetisen tu long mi mo papa blong mi. Hem i bin stap long Alma, mo mi wantem blong kasem hem. !Mi stat blong ridim ol skripja blong mi evri dei—samtaem 10 o 15 japta olsem!

Mi stat blong luksave moa abaot eksperiens long saed blong spirit. Taem yu ridim plante taem, hem i helpem yu blong gat revelesen blong yuwan. I tru, mi bin krietem taem blong Lod.

Mi stat blong kipim wan jenol long saed blong spirit. Long stat blong wan pej, mi bin raetem, “Mi stap ridim 3 Nifae abaot olsem wanem Jisas Kraes i kam daon long ol pipol mo evri naesfala samting we Hem i bin mekem. Tedei, mi filim moa kolosap long Papa long Heven mo Jisas Kraes.”

Mi bin sapraes tumas long olsem wanem plante eksperiens we mi mi gat, speseli taem mi stap lukaotem olgeta. Mi luksave se, “Waoa, God i stap toktok plante long mi.”

Blong stadi ol skripja i helpem mi bigwan, speseli wetem evri wari long tingting blong mi blong stap travel tumas. Ol skripja oli ol toktok blong God. Hem i stap toktok long yumi tru long ol skripja. Tru long ol toktok blong Hem, mi save kam moa kolosap long Hem.