Ol Blesing blong Prishud Atoriti mo Paoa

Jisas Kraes i hed blong Jos Ia. Jos ia i wan tul we Hem i krietem blong mekem i hapen impoten wok blong pemaot ol pipol blong wol ia. Tru long Jos, Hem i save:

• Talemaot gospel blong Hem raon long wol.

• Mekem baptaes mo evri nara kavenan—iven wan kavenan rod we i go long selestial kingdom.

• Joenem ol famli blong taem we i no save finis.

• Givim ol presen blong fasin blong sevem man, iven i go long olgeta we oli bin ded mo no kasem.

• Givhan long ol pikinini blong God we oli gat nid long saed blong bodi naoia.

Jisas i Stap Tijim Meri, i kam long Dan Burr

Blong mekem ol bigfala stamba tingting oli hapen, mo blong rere from kambak blong Sevya, Jos i nidim daereksen, atoriti mo paoa blong God we i gogohed. Jos hem i “wan jos ia nomo we i tru mo i laef long fes blong ful wol;” (Doktrin mo Ol Kavenan 1:30) from we Kraes i stap gaedem wetem lidasip mo paoa blong Hem tru long prishud blong Hem.

Sapos tabu prishud ia i nogat, Jos ia bae i wan oganaesesen we i olsem plante nara jos, we oli stap mekem gud samting long wol be i nogat paoa blong kasem stamba tingting blong stap mekem rere ol pikinini blong God from glad ia we i no save finis long ples blong Hem. Wetem prishud ia, mo ol ki blong lidim wok blong prishud ia, tugeta, i gat atoriti mo oda insaed long Jos.

“Insaed long Jos, evri prishud atoriti, oli yusum anda long daereksen blong olgeta we oli holem ol ki blong prishud.

“Olgeta we oli ol man mo memba blong Jos mo oli klin inaf, oli kasem prishud atoriti tru long prishud we oli pasem i kam long olgeta, mo tru long odinesen long ol prishud ofis. Evri memba blong Jos oli save yusum atoriti ia we oli pasem i kam long olgeta taem we oli setem olgeta apat, o taem oli kasem wok blong help blong mekem wok blong God i kamtru.”

Taem oli transletem Buk blong Momon long 1829, Lod i stat blong putumbak oda blong prishud blong Hem. Ansa blong prea blong Josef Smit mo Oliva Kaodri abaot baptaes, Jon Baptaes we i laef bakegen long ded i kamkamaot mo pasem long tufala Aronik Prishud, we “i holem olgeta ki blong ol seves blong ol enjel, mo blong gospel blong fasin blong sakem sin, mo blong baptaes andanit long wota blong kam klin aot long ol sin;” (Doktrin mo Ol Kavenan 13:1). Wetem atoriti ia, Josef mo Oliva i baptaesem wanwan long tufala mo ol narafalawan long taem we Jos i bin oganaes folem stret fasin.

Afta long hemia, i no long taem ol Aposol blong bifo, Pita, Jemes, mo Jon oli kamkamaot mo pasem hae o Melkesedek Prishud, we i gat tu “ol ki blong kingdom blong mi, mo wan dispensesen blong gospel ia blong … taem we evri wok blong God i kamtru!” (luk long Doktrin mo Ol Kavenan 27:12–13; 128:20).

Sam moa prishud atoriti i kam taem trifala profet blong bifo, Moses, Elaeas, mo Elaeja oli kamkamaot long Josef mo Oliva insaed long Ketlan Tempol mo pasem long tufala ol ki blong kam tugeta blong Isrel mo wok blong ol tempol blong Lod (luk long Doktrin mo Ol Kavenan 110:11–16).

Long wan wod, stamba tingting blong prishud atoriti mo paoa we Jisas Kraes i putumbak i blong blesem. Hem i mekem se evri Jos memba oli save yusum paoa blong God blong stap givim seves mo blesem ol narawan long Jos, hom, mo raon long wol. Ol memba oli joenem Sevya blong mekem i hapen wok blong Hem blong fasin blong sevem man mo mekem oli kam olsem god, oli yusum tabu presen mo paoa ia i go bitim paoa blong olgetawan blong helpem kingdom blong God i gro blong fulumap wol ia (luk long Doktrin mo Ol Kavenan 65:2, 5–6).

Lod i eksplenem se “[Melkesedek] prishud ia we i moa hae i lukaotem gospel, mo i holem ki blong ol sikret blong kingdom, we i ki blong kasem save long saed blong God.

“From hemia, insaed long ol odinens blong hem, i gat paoa we i olsem hemia blong God, i kamaot” (Doktrin mo Ol Kavenan 84:19–20).

Ol odinens, ol prishud nao oli mekem ol seremoni, we tru long olgeta seremoni ia yumi mekem ol kavenan wetem God, stat wetem baptaes mo i gohed tru ol kavenan we yumi kasem insaed long haos blong Lod. Tru long fasin blong kipim ol kavenan nao yumi jenis aot long man mo woman “we i folem fasin blong wol” mo kam ol sent (luk long Mosaea 3:19) tru long paoa blong gladhat blong Kraes mo, tugeta, kam stret mo tabu—glad mo nogat mak—bifo long God (luk long Doktrin mo Ol Kavenan 20:29–31; 3 Nifae 27:16–20).

Kraes long Amerika, i kam long Ben Sowards

“Restoresen blong Gospel blong Jisas Kraes, we I Fulwan: Tu Handred Yia Ofisol Toktok I Go long Wol,” i kam long Fas Presidensi mo Kworom blong Olgeta Twelef Aposol, oli talemaot i kam sot:

“Mifala i stap talem se Jos Ia blong Jisas Kraes blong Ol Lata-dei Sent, we i bin oganaes long 6 Epril 1830, i Niu Testeman Jos blong Kraes, we oli putumbak. Jos ia i angka long stret laef blong jif konaston blong hem, Jisas Kraes, mo long Atonmen blong Hem, we i no gat en, mo long stret Laef Bakegen long Ded blong Hem. Wan moa taem bakegen, Jisas Kraes i bin singaotem Ol Aposol, mo i bin givim olgeta atoriti ia blong prishud. Hem i stap invaetem yumi evriwan blong go long Hem mo long Jos Ia blong Hem, blong kasem Tabu Spirit, ol odinens blong fasin blong sevem man, mo blong kasem glad ia we i stap oltaem.”