Kam Folem Mi
Doktrin mo Ol Kavenan 95; 103; 107
Ol Rij Samting we oli Haed
Go insaed long Ol Skripja Hemia i gud inaf.
Lod, Wetem Lav, i Rimaenem Yumi long Ol Komanmen we Yumi Save Be No Stap Kipim.
Insaed long Doktrin mo Ol Kavenan 95, Lod i no glad long ol Sent. Bifo, Hem i komandem olgeta blong bildim wan tempol (luk long Doktrin mo Ol Kavenan 88:119)—be afta faef manis i pas, oli no mekem eni samting nating abaot tempol ia.
Tedei, yumi tingting long hemia. !Blong stap bildim tempol hemia i kam faswan long lukluk blong yumi! Be Lod i no tokbaot tumas tempol long 1833. Ol Sent oli no andastanem fulwan hamas ol tempol oli impoten.
?So, wanem nao Lod i mekem? Hem i tokbaot gud from wanem Hem i wantem olgeta blong bildim wan tempol (luk long Doktrin mo Ol Kavenan 95:8–17). Hem i eksplenem wanem Hem i bin talem bifo, we i givim niu tingting mo hamas i impoten blong gobak hom.
Sin i Givim Risal blong Koreksen, be Yet, Lod i Promesem Ol Blesing.
Long 1834, ol Sent i stap tingting se from wanem Lod i letem ol enemi blong olgeta blong ronemaot mo panisim olgeta long graon blong olgetawan. Tru long Profet Josef Smit, Lod i givim tu ansa.
Faswan, Lod i talem se samtaem Hem i letem ol nogud man blong mekem ol nogud samting “blong oli save go kasem mak blong ol rabis fasin blong olgeta, blong mekem se kap blong olgeta i fulap” (Doktrin mo Ol Kavenan 103:3). Alma i talem long wei ia: “Hem i letem se oli save mekem [nogud samting], … nao ol jajmen we bae hem i yusum long olgeta long kros blong hem oli save stret” (Alma 14:11).
Narafala risen we Lod i givim long ol Sent from ol problem blong olgeta hem i wan had samting blong harem: “Mo olgeta ia we oli stap singaotem olgeta folem nem blong mi, bae mi panisim olgeta blong wan smol taem … from se oli no bin mekem folem fulwan ol tijing mo ol komanmen we mi bin givim long olgeta.” (Doktrin mo Ol Kavenan 103:4).
Hemia i no minim se God i apruvum ol rabis fasin mo ol aksen blong ol enemi blong olgeta we i agensem loa. Hem i no givim “insperesen” long grup ol ol man ia blong atakem ol Sent; Hem i letem olgeta blong yusum fridom ia blong mekem joes blong olgeta mo Hem i no stopem olgeta.
Be yet, Lod i promesem se sapos ol Sent oli obei, “bae oli neva stop blong win” (Doktrin mo Ol Kavenan 103:7).
?From Wanem oli Singaotem Prishud long Nem blong Melkesedek?
Maet yu stap tingting se from wanem hae prishud oli singaotem long nem blong Melkesedek. Lod i eksplenem hemia tru long Profet Josef Smit:
“Bifo long taem blong hem [Melkesedek] oli bin singaotem prishud ia, Tabu Prishud we i folem Oda blong Pikinini blong God. Be, blong gat respek o ona long nem blong God ia we Paoa blong hem i Bigwan Tumas, blong no stap talemaot nem blong hem oltaem tumas, olgeta, we oli blong jos long taem bifo, oli bin singaotem prishud ia folem Melkesedek, o Melkesedek Prishud” (Doktrin mo Ol Kavenan 107:3–4).
Tingbaot hamas taem yumi stap talem “Melkesedek Prishud” long ol Jos miting mo ol storian we blong aotsaed. Nao pikjarem long maen sapos, i no “Melkesedek” be yumi stap talem “Pikinini blong God” evri taem. Hemia bae i stat blong nogat respek. Lod i wantem blong protektem hemia.