Երկրորդ Գալուստի նշանները․ վախենալու պատճառ չկա

Փրկիչը նախազգուշացրել է, որ շատ կեղծ Քրիստոսներ և սուտ մարգարեներ կլինեն մինչև Իր գալը, որոնք կխաբեն շատ մարդկանց: Մեր շուրջբոլորը բարձր, շփոթեցնող և բացասական ձայներ կան, որոնք փորձում են մեզ մոլորեցնել: Վերջին օրերին սատանան «կմոլեգնի մարդկանց զավակների սրտերում և կդրդի նրանց բարկության ընդդեմ նրա, ինչը բարի է» (2 Նեփի 28․20)։ Նույնիսկ ընտրյալները հեռու կտարվեն ճշմարտությունից:

Բայց Տերը մեզ հսկայական օգնություն է տվել: Նա կանչել է մարգարեների՝ օրհնելու և առաջնորդելու մեզ: Առաջին Նախագահությունը և Տասներկու Առաքյալների Քվորումը չեն մոլորեցնի մեզ և չեն կարող անել դա։ Փրկիչն ասել է․ «Լինի դա իմ իսկ ձայնով, թե իմ ծառաների ձայնով՝ միևնույն է» (Վարդապետություն և Ուխտեր 1.38)։ Դուք կարող եք խնդրել Երկնային Հորը, որ Սուրբ Հոգին հաստատի այն ճշմարտությունները, որոնք նրանք ուսուցանում են, օրինակ, նախագահ Ռասսել Մ. Նելսոնի վերջին ուսմունքները․ «Լավագույնը դեռ առջևում է … քանի որ Փրկիչը կրկին գալիս է»։ Եվ․ «Նա պատրաստվում է վերստին գալ։ Թող որ մենք նույնպես պատրաստվենք ընդունելու Նրան»։

Եվ երբ դուք հետևեք նրանց ուսմունքներին «ողջ համբերությամբ ու հավատքով» (Վարդապետություն և Ուխտեր 21․5), դուք կտեսնեք, թե ինչպես են դրանք օրհնում ձեր կյանքը:

Յոթանասունից երեց Ալլեն Դ. Հեյնին ասել է. «Երբ երեխա էի, վերջին օրերի այդ մարգարեությունները վախեցնում էին ինձ և ստիպում ինձ աղոթել, որ Երկրորդ Գալուստը տեղի չունենա իմ օրոք … Բայց հիմա ես աղոթում եմ հակառակի համար …

«… Մենք չպետք է վախենանք։ Այն վարդապետություներն ու սկզբունքները, որոնց մենք պետք է հետևենք՝ հոգևորապես գոյատևելու և ֆիզիկապես դիմանալու համար, գտնվում են ապրող մարգարեի խոսքերի մեջ»:

Երբ դուք հետևում եք մարգարեների և առաքյալների առաջնորդությանը, ձեր վախերը կզիջեն հավատքին, հույսին և ուրախությանը:

Փրկիչն ասել է, որ վերջին օրերի աղետների մեջ «իմ աշակերտները պիտի կանգնեն սուրբ տեղերում և չեն շարժվի» (Վարդապետություն և Ուխտեր 45.32): Այս սուրբ վայրերն են՝ մեր տները, հավաքատները և տաճարները:

Տաճարների վերաբերյալ նախագահ Նելսոնն ուսուցանել է, որ «մեր ամենահուսալի ապահովագրությունն է` շարունակել արժանի լինել՝ ընդունվելու Նրա սուրբ տունը»: Եվ «տաճարում անցկացրած հավելյալ ժամանակը կօգնի մեզ նախապատրաստվել ․․․ Երկրորդ Գալուստին»։

Վերջին օրերում Հիսուս Քրիստոսի Եկեղեցու դերերից մեկն այն է, որ օգնի աշխարհին նախապատրաստել Նրա գալուստին: Եվ դուք կարող եք օգնել՝ մասնակցելով Նրա աշխատանքին:

Դուք կարող եք կիսվել ավետարանով ուրիշների հետ և Աստծո լույսն ու ճշմարտությունը բերել նրանց, «որոնք ճշմարտությունից հեռու են մնացել, միայն որովհետև չգիտեն որտեղ գտնեն այն» (Վարդապետություն և Ուխտեր 123.12):

Դուք կարող եք նաև մկրտություններ կատարել տաճարում վարագույրի մյուս կողմում գտնվողների համար, ովքեր ապրել և «մահացել են այս ավետարանի մասին գիտելիք չունենալով» (Վարդապետություն և Ուխտեր 137․7)։

Աշխարհի այսչափ բացասական մթնոլորտի պարագայում դուք կարող եք լույս լինել ուրիշների համար և բժշկություն բերել աշխարհին։ Դուք կարող եք օգնել պատրաստել մի ժողովուրդ, ում մոտ Փրկիչը կարող է գալ և ով պատրաստ կլինի ընդունել Նրան:

Դա մեծ պարտականություն է և մի հրաշալի բան, որին պետք է անհամբերությամբ սպասել։