Հիսուս Քրիստոսը նաև լավ օրերի համար է

Երբ ամեն ինչ լավ է ընթանում, լավ է տոնել ձեր օրհնություններն ու ձեռքբերումները: Բայց մի մոռացեք, թե ով է հնարավոր դարձրել, որ դուք հասնեք այդ նվաճումներին: Մորմոնի Գրքի Բենիամին թագավորն այսպես է արտահայտվել իր քարոզում.

«Քանզի ահա, մի՞թե մենք բոլորս մուրացկաններ չենք: Մի՞թե մենք բոլորս կախում չունենք նույն Էակից, այսինքն՝ Աստծուց, բոլոր ստացվածքի համար, որ մենք ունենք, թե՛ ուտելիքի և հագուստի համար, թե՛ ոսկու և արծաթի համար և թե՛ բոլոր հարստությունների համար, որ մենք ունենք ամեն տեսակի»: (Մոսիա 4.19):

Ձեր հաջողության ժամանակ խոնարհ լինելը՝ հիշելով, թե ինչ են արել Երկնային Հայրը և Հիսուս Քրիստոսը ձեզ համար, հիանալի միջոց է Նրանց ներառելու ձեր լավ ժամանակներում:

Երախտագիտությունը հպարտության և մոռացկոտության լավագույն հակաթույներից մեկն է: Աստծուն շնորհակալություն հայտնելը կօգնի ձեզ հիշել Նրան և այն բոլոր լավ բաները, որ Նա և Իր Որդին անում են ձեր կյանքում: Սա նույնքան արդյունավետ է լավ ժամանակներում, որքան դժվար ժամանակներում:

Սատանայի ամենասիրելի հարձակումներից մեկն այսպիսին է․ նա «կխաղաղեցնի և կհանդարտեցնի [ձեզ]՝ տանելով դեպի մարմնական ապահովություն» (2 Նեփի 28․21)։ Այլ կերպ ասած, նրան դուր կգար, եթե դուք այնքան բավարարված և ապահով զգայիք ձեզ լավ ժամանակներում, որ մոռանայիք, թե ինչն է ամենակարևորը: Ուստի, մի՛ մոռացեք Աստծուն։ Երբ դուք զգոն լինեք հակառակորդի խորամանկ հնարքների հանդեպ և դիմադրեք դրանց նույնիսկ ձեր լավ ժամանակներում, դուք մոտ կմնաք Երկնային Հորը և Հիսուս Քրիստոսին։

Նախագահ Ռասսել Մ. Նելսոնն ուսուցանել է. «Երբ մեր կյանքի կիզակետը Աստծո փրկության ծրագրի … և Հիսուս Քրիստոսի ու Նրա ավետարանի վրա է, մենք կարող ենք ուրախություն զգալ, անկախ այն բանից՝ ինչ է կատարվում կամ չի կատարվում մեր կյանքում: Ուրախությունը գալիս է Նրանից ու Նրա շնորհիվ: Նա բոլոր ուրախությունների աղբյուրն է»։

Որքա՞ն հաճախ եք դուք մտածում այս ճշմարտությունից բխող ուրախության մասին, երբ կյանքում ամեն ինչ լավ է ընթանում։ Սա զուտ մխիթարական խորհուրդ չէ այն ժամանակների համար, երբ ամեն ինչ վատ է: Այն միշտ ճիշտ է, նաև ձեր լավագույն օրերին: Այսպիսով, արեք հնարավոր ամեն բան, որպեսզի կենտրոնանաք Քրիստոսի վրա՝ վատ թե լավ ժամանակներում։