M̧wen̄an eo an Jibbon̄ in Jabōt
Mennin Letok ko Reļļap an Anij: Pinmuur eo an Jisōs Kraist, Jerkakpeje, Jepļaaktok eo
Jidik in kōnono in
Iiō ko ļo̧k, kūlaaj in gospel eo am ilo jibbon̄ tata ekar kakkilōklōke eoon ko ilo Baibōļ. Aaet iaar kakkilōklōki naan ko rekadu. Menin ekar koba Jon 11:35—eoon eo ekadu tata ilo jeje ko rekwojarjar, ruo wōt naan—“Jisōs jan̄.”
N̄an n̄a kiiō, bwe Jisōs ej jan̄ ilo būrum̧ōj im lan̄lōn̄ ilo kam̧ool kōn kien eo ekabwilōn̄lōn̄: Eo Nejin Anij ekwojarjar ekar itok n̄an mour in im katak ekkar n̄an kanniōk elmen an naaj aolep iien kōjeraam̧m̧an kōj.
N̄e jej jan̄ ilo būrom̧ōj ak lan̄lōn̄, Jisōs Kraist ekanooj in meļeļe. E emaron̄ pād ilo iien ko n̄e jej lukkuun in aikuji mennin letok ko reļļap: Pinmuur eo an Jisōs Kraist, Jerkakpeje, jepļaaktok eo.
Ijtō in Jisōs Kraist ej kōtļo̧k ad en̄jake kōmālim eo an Anij. Laļ in ej kōm̧m̧an ad en̄jake bwe ekanooj eļap ad aitok, kadu, depakpak, aidik—ak jejjab māletlet, aiboojoj, ak likjab ilo men ko an jetōb. Kōn oktak in jetōb eo ilo Jisōs Kraist jemaron̄ jo̧o̧r jān ļōmņak ko rejjab em̧m̧an. …
Karōk eo an Anij kōn mour in im anemkwoj eo ilo mour in ej kōtļo̧k ad katak jān iminene eo ad make. Kōn iakwe, Jisōs Kraist ekar wanlaļtak ium̧win im wallōn̄ļo̧k ilōn̄ in men otemjej. E ej lan̄lōn̄ ilo ekkeke kwojarjar ko ad n̄an lo̧ļe im lo̧udin̄din̄, jouj ilo ejjeļo̧k kōtmene kōn kein nebar, tōmak n̄an ukwelo̧k im jeorļo̧k bōd. Im E ej jan̄ ilo būrom̧ōj kōn en̄taan in bōd an armej eo eļap ad, lāj, jab jetjet—eo emakijkij an bōktok kōn kāālet an armej—ejja wōt an lan̄ ko im Anij an lan̄ pād ippāer.b
En̄in ej Ijtō ilo Jisōs Kraist: E ej uwaake jan̄in uwade ko an būruwōd im kajjitōk ko an jetōb ko ad. E ej kōmrāikļo̧k kōmejaaļaļ ko ad, ijello̧kin kōmejaaļaļ in lan̄ļōn̄ ko ad.