Tuha’a purera’a nō te po’ipo’i sābati
E ’ere tō ’outou tātarahapa i te hōpoi’a nō Iesu Mesia ; tē ha’amāramarama nei te reira i tōna ’oa’oa
Hu’a parau
I teie mahana tē hina’aro nei au e paraparau i te feiā i rotopū ia tātou ’o tē mana’o nei i te tahi mau taime ē, « e ’ohipa te tātarahapa ’e te fa’a’orera’a hara nō te mau ta’ata ato’a ’eiaha rā nō’u ».
’Ua ha’api’i mai au ē, mai te mea e tīa’i ’outou ē tae roa atu i te taime ’ua mā e ’aore rā, ’ua ti’a roa ’outou nō te haere i te Fa’aora ra, ’ua hahi ïa ’outou i te mea faufa’a ! […]
Tē fa’a’ite pāpū nei au ē, noa’tu ē tē ha’ape’ape’a nei te Atua nō tā tātou mau hape, ’ua hau atu tōna ha’ape’ape’a nō ni’a i te mea e tupu i muri a’e i tō tātou ravera’a i te hape. E fāriu fa’ahou ānei tātou iāna ? […]
Te tītaura’a manihini ’ia tātarahapa o te hō’ē ïa fa’a’itera’a nō te here o te Atua.
Te paraura’a ’ē i taua tītaura’a ra ’o te hō’ē ïa fa’a’itera’a nō tō tātou here […]
’Aita tātou e fa’aea noa i ni’a i te ’ē’a nō te fafaura’a ma te ’ore roa e rave i te hō’ē hape. E fa’aea noa tātou i ni’a i te ’ē’a nā roto i te tātarahapara’a i te mau mahana atoa.
’E ’ia tātarahapa ana’e tātou, e fa’a’ore mai te Atua i tā tātou mau hara ma te fa’aha’amā ’ore ia tātou, ma te ’ore e fa’aau ia tātou i te tahi atu ta’ata, ’aore rā, ma te ’ore e a’o ia tātou nō te mea hō’ē ā teie mea ’e te mea tā tātou i tātarahapa i te hepetoma i ma’iri a’e nei.
E ’oa’oa ’oia i te mau taime ato’a e ’ite ’oia ia tātou i ni’a i tō tātou mau turi. E ’oa’oa ’oia i te fa’a’ore i tā tātou hara nō te mea nōna, e mea ’oa’oa roa tātou !
’Aita anei ’outou e mana’o nei ē, e parau mau te reira ?
Nō te aha ïa e mea fifi roa nō tātou ’ia ti’aturi ? ! Tē fa’a’ohipa nei Sātane, te ta’ata pari rahi ’e te ha’avare, i te ha’amā nō te fa’aātea ’ē ia tātou i te Atua […]
[…] E « vai rahi noa tō ’outou faufa’a i mua i te Atua », noa atu i hea tā ’outou mau fa’aotira’a i te arata’ira’a ia ’outou […]
Tē ti’a nei au i ’ō nei nō te fa’a’ite pāpū ē, tē hōro’a nei Iesu Mesia i te māramarama i te feiā e pārahi nei i roto i te pouri […] Haere i mua ’e ’a fa’a’ama i te mōrī—tō tātou ti’aturira’a i te vi’ivi’i ’ore hope roa.