Tuha’a purera’a nō te po’ipo’i sābati
Te mau tao’a hōro’a rahi nō te tau mure ’ore : Te tāra’ehara, te ti’afa’ahoura’a, te fa’aho’i-fa’ahou-ra’a a Iesu Mesia
Hu’a parau
Tau matahiti i ma’iri, ’ua tāmau ’ā’au tā mātou piha ha’api’ira’a ’evanelia nō te po’ipo’i i te mau ’īrava nō te Bibilia. ’Ua hi’o iho ā ïa vau i te mau ’īrava poto. Tei roto te Ioane 11:35—te ’īrava pāpa’ira’a mo’a poto roa a’e, e toru ta’o—« ’Oto ihora Iesu ».
Nō’u nei, i teienei ē, ’ua ta’i Iesu ma te ’oto ’e ma te ’oa’oa e fa’a’ite pāpū ïa nō te tupura’a mau o te temeio : ’ua haere mai te Tamaiti hanahana a te Atua i roto i te tino tāhuti nei ’e ’ua ha’api’i mai mai te au i te huru o te tino nei e nāhea i te vai noa i pīha’i iho ia tātou ’e i te ha’amaita’i noa ia tātou.
’Ia tuō ana’e tātou ma te ’oto ’aore rā ma te ’oa’oa, ’ua māramarama maita’i roa Iesu Mesia. E nehenehe ’oia e tae mai i te mau taime e hina’aro rahi ai tātou i te mau hōro’a rahi o te tau mure ’ore : Te tāra’ehara a Iesu Mesia, te ti’afa’ahoura’a, te fa’aho’i-fa’ahou-ra’a mai […]
Nā te Pāsa i roto ia Iesu Mesia e fa’ati’a ia tātou ’ia ’ite i te mana’o fāri’ira’a a te Atua. Tē parau nei teie ao ia tātou ē ’ua rahi roa tātou, ’ua poto roa, ’ua ’ā’ano roa, ’ua oaoa roa, ’aita i nava’i tō tātou māramarama, te nehenehe ’e te fāito pae vārua. Nā roto i te tauira’a pae vārua i roto ia Iesu Mesia, e ti’a ia tātou ’ia ora mai i te mana’o ha’aparuru nō te hina’aro ’ore i te hape […]
Maoti te fa’anahora’a a te Atua nō te ti’amāra’a ’ia mā’iti i te pae mōrare ’e i te tāhuti nei e ti’a ai ia tātou ’ia ha’api’i nā roto i te mau mea e tupu i ni’a ia tātou iho […] Nō tona here, ’ua pou’ Iesu Mesia i raro a’e i te mau mea ato’a ’e ’ua ta’uma i ni’a a’e i te mau mea ato’a. Tē ’oa’oa nei ’oia i tō tātou ’aravihi hanahana nō te mana rahi ’e te fa’a’oa’oa, nō te hāmani maita’i ma te tīa’i ’ore i te fa’aho’ira’a, nō te fa’aro’o i roto i te tātarahapara’a ’e i te fa’aorera’a hapa. ’E tē ’oto nei ’oia ma te ’oto i mua i te ’ino rahi roa o tō tātou mamae ta’ata nei, te taehae, te ’ohipa ti’a ’ore—tei tupu pinepine nō te mā’itira’a ta’ata nei—mai tō te mau ra’i ato’a ’e mai te Atua o te ra’i ’e rātou ra […]
E Pāsa teie i roto ia Iesu Mesia : E pāhono ’oia i te mau hia’ai o tō tātou ’ā’au ’e i te mau uira’a o tō tātou vairua. E horoi ’ē ’oia i tō tātou roimata, ’eiaha rā te roimata nō te ’oa’oa.